សម្តេចឪ និងសម្តេចម៉ែ សម្រេច​ ព្រះទ័យគង់ប្រថាប់ នៅមាតុប្រទេស

 ព្រះករុណាសម្តេច ព្រះនរោត្តមសីហុន ព្រះមហាវីរៈក្សត្រ ទ្រង់បានមានព្រះរាជ បន្ទូលប្រកាស ទៅកាន់ជនរួមជាតិ នៅទីនាំងចន្ទឆាយា ក្នុងពិធីមីទ្ទីញ មហាជន អបអរខួប២០ឆ្នាំ នៃការយាង និវត្តន៍របស់ព្រះអង្គ និងព្រះវររាជមាតាជាតិខ្មែរថា ព្រះអង្គនឹងគង់ប្រថាប់នៅមាតុប្រទេស របស់ ព្រះអង្គតទៅ ទោះបីជាព្រះអង្គមានបញ្ហាព្រះរាជសុខភាពយ៉ាងណាក្តី។

មានព្រះបន្ទូលក្នុងវេទិកាសាធារណៈ ដែលប្រារព្វធ្វើឡើង នៅព្រះបរមរាជវាំង សម្តេចព្រះនរោត្តម សីហនុ ដែលអមដោយ សម្តេចព្រះវររាជមាតាជាតិខ្មែរ សម្តេចព្រះនរោត្តម មុនិនាថ សីហនុ ព្រះករុណា សម្តេចព្រះបរមនាថ នរោត្តម សីហមុនី និងប្រមុខស្ថាប័នជាតិផងដែរនោះ បាន មាន ព្រះបន្ទូលថា “ទោះបីមានបញ្ហាសុខភាព អំណឹះតទៅ សម្តេចឪ សម្តេចតា សម្តេចតាទួត សម្តេច តាលួត សម្តេចម៉ែ សម្តេចយាយ សម្តេចយាយទួត សម្តេចយាយលួត សម្រេចព្រះហឫទ័យ គង់ ប្រថាប់ នៅប្រទេសជាតិមាតុភូមិ។ សម្តេចឳ សប្បាយរីករាយហឫទ័យ ជាពន់ពេកក្រៃ ដោយបាន នៅជាមួយបងប្អូនកូនចៅ ជាទីនឹកស្រលាញ់ជាទីស្នេហាបំផុត នៃខ្ញុំព្រះករុណា។ អំណឹះតទៅ សម្តេចឪ សូមរស់នៅក្រោមបារមី ព្រះពុទ្ធ ព្រះធម៌ ព្រះសង្ឃ បងប្អូន កូនចៅ ចៅទួត ទាំងអស់ ជាស្រលាញ់ស្នេហា ជាអតិបរមាបស់សម្តេចឪ សម្តេចម៉ែ ”។

ព្រះរាជឱង្ការដ៏ស្រទន់ ប្រកបដោយកម្លាំងពលំ បានទទួលការសាទរពីថ្នាក់ដឹកនាំជាតិទាំងបី ប្រជា រាស្រ្ត ជាកូនចៅ ចៅទួត ចៅលួត នៅក្នុងព្រះរាជពិធី ជាមួយសំឡេងស្នូរទះដៃយ៉ាងឮកងរំពង។

តាមធម្មតាសម្តេចឪ និងសម្តេចម៉ែ ទ្រង់ទាំងទ្វេ តែងតែស្តេចយាងគង់ សម្រាក ព្យាបាល ព្រះរោគ នៅទីក្រុងប៉េកាំងប្រទេសចិន ជាមហាមិត្តដ៏រឹងមាំរបស់កម្ពុជា។

តាមរយៈការស្តេចយាងចូលរួមជាអធិបតីក្នុងព្រះរាជពិធី គេកត់សម្គាល់ឃើញនូវកម្លាំងថាមពល របស់សម្តេចឪ មានសុខភាពល្អបរិបូរណ៍ ជាមួយនឹងព្រះសូរសៀង ថ្លែងសង្កថា ប្រកបដោយ អត្ថន័យយ៉ាងជ្រាលជ្រៅបំផុត ចំពោះជនរួមជាតិព្រះអង្គ និងមាតុភូមិជាទីស្នេហារបស់ព្រះអង្គ។

ព្រះករុណា ព្រះមហាវីរៈក្សត្រ សម្តេចព្រះនរោត្តម សីហនុ ប្រសូតនៅថ្ងៃទី៣១ខែតុលា ឆ្នាំ១៩២២ ជាបុត្រារបស់អតីតព្រះករុណា សម្តេចព្រះនរោត្តម សុរាម្រឹត និងសម្តេចព្រះមហាក្សត្រីយានី ស៊ីសុវត្ថិ កុសមៈនារីរ័ត្ន សេរីវឌ្ឍនា៕

ពីគេហទំព័រ៖ ដើមអំពិល