កាលពីព្រឹកថ្ងៃទី៣០ ខែតុលា ឆ្នាំ២០១១ នេះ ប្រជាពលរដ្ឋជាង១០០គ្រួសាររស់នៅភូមិលេខ៣ សង្កាត់លេខ១ ក្រុង-ខេត្តព្រះសីហនុ បាននាំគ្នាធ្វើបាតុកម្មបិទផ្លូវជាតិលេខ៤ ត្រង់ចំណុចមុខសាលាអនុវិទ្យាល័យ និងសាលាបឋមសិក្សា ហ៊ុន សែន ឃ្លាំងលើ ប្រឆាំងនឹងការសម្រេចសាលដីការបស់សាលាកំពូល ពាក់ព័ន្ធនឹងជម្លោះដីធ្លីរាប់សិបហិកតា ជាមួយលោក ចាន់ កាំង មន្ត្រីកំពង់ផែស្វយ័តក្រុងព្រះសីហនុ។
តំណាងប្រជាពលរដ្ឋម្នាក់បានប្រាប់តាមទូរស័ព្ទថា ការធ្វើបាតុកម្មរបស់ពួកគាត់ គឺប្រឆាំងនឹងការសម្រេចសាលដីកា របស់តុលាការកំពូលឲ្យលោក ចាន់ កាំង ឈ្នះក្តីលើសំណុំរឿងជម្លោះដីធ្លីជាមួយប្រជាពលរដ្ឋជាង១០០គ្រួសារ នៅភូមិ៣ សង្កាត់លេខ១ ហើយគ្រោងនឹងចុះអនុវត្តសាលដីកានៅថ្ងៃទី៤ ខែវិច្ឆិកា ខាងមុខនេះ។
តំណាងប្រជាពលរដ្ឋដដែលនេះ បានអះអាងថា ដីដែលមានជម្លោះខាងលើនេះ ពួកគាត់បានមករស់នៅអស់ជាច្រើនឆ្នាំមកហើយ គាត់មិនឲ្យគេមករំលោភយកដីធ្លី និងផ្ទះសម្បែងរបស់ពួកគាត់នោះទេ គាត់នឹងបន្តធ្វើកូដកម្មជារៀងរហូត ប្រសិនបើគ្មានដំណោះស្រាយសមស្របណាមួយទេនោះ ។
ភាគីខាងលោក ចាន់ កាំង ក៏បានអះអាងផងដែរថា ដីដែលមានជម្លោះខាងលើនេះ ជាដីរបស់ខ្លួន ហើយរឿងក្តីនេះត្រូវបានសាលាដំបូងរហូតដល់តុលាការកំពូលបានកាត់ក្តីឲ្យលោកឈ្នះ ព្រោះតែលោកមានបណ្ណកម្មសិទ្ធិកាន់កាប់ដីខាងលើនេះ។
តាមសេចក្តីរាយការណ៍បានឲ្យដឹងថា រហូតមដល់វេលាម៉ោង ១០និង៤០ព្រឹកថ្ងៃដដែលនេះ ក្រុមប្រជាពលរដ្ឋ មិនទាន់រំសាយការធ្វើបាតុកម្មរបស់ពួកគាត់នោះទេ ធ្វើឲ្យកកស្ទះចរាចរណ៍យ៉ាងខ្លាំងមិនអាចធ្វើចរាចរណ៍បាននោះទេ។ ជាមួយគ្នានោះគេសង្កេតមន្ត្រីអាជ្ញាធរចុះទៅអន្តរាគមន៍ផងដែរ តែក្រុមប្រជាពលរដ្ឋមិនព្រមរំសាយនោះឡើយ៕
ពីគេហទំព័រ៖ នគរវត្ត
No comments:
Post a Comment
yes