ក្មេងស្រីម្នាក់ដែលត្រូវខ្យល់ព្យុះបក់បោកពន្លិចទូកបាត់ខ្លួនអស់រយៈពេល៦យប់៦ថ្ងៃកន្លងមកនេះត្រូវបានគេប្រទះឃើញនៅមានជីវិតនៅឡើយ ដោយអណ្ដែតនៅលើផ្ទៃទឹកជាមួយកំប្លោក១ដុំកាលពីវេលាម៉ោង១១ព្រឹកថ្ងៃទី៨ខែតុលាឆ្នាំ២០១១នៅចំណុចបឹងខ្យងជាប់ព្រំប្រទល់ឃុំត្បែងនិងឃុំកំពង់គោ ស្រុកកំពង់ស្វាយ ខេត្តកំពង់ធំ។
ក្មេងស្រីរងគ្រោះឈ្មោះ ឃីម គី អាយុ១៤ឆ្នាំនៅភូមិព្រះគន្លង ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំកំពុងស្ថិតនៅក្នុងការជួយសង្គ្រោះបន្ទាន់ដោយក្មេងស្រីនៅមានដង្ហើមប៉ុន្តេខ្លួនប្រាណត្រជាក់និងទន់ស្ទើរកំរើពុំរួច។ចំណែកនាងជុះមកសុទ្ធតែស្លឹកត្រកួន ផ្កាកំប្លោកនិងផ្កាស្នោរដែលតំរូវឲ្យក្រុមគ្រូពេទ្យព្យាបាលដោយលាងក្រពះផងដែរ។
ស្ត្រីជាម្ដាយក្មេងស្រីរងគ្រោះឈ្មោះ នួល គឿន អាយុ៣៣ឆ្នាំកំពុងកំដរជម្ងឺកូននៅក្នុងមន្ទីរពេទ្យខេត្តកំពង់ធំនេះបាននិយាយឲ្យដឹងថាកាលពីវេលាម៉ោង៨ព្រឹកថ្ងៃទី៣ខែតុលាឆ្នាំ២០១១កូនគាត់បានចែវទូកទៅបេះផ្កាស្នោននៅក្រោយផ្ទះចម្ងាយប្រមាណ២០០ម៉ែត្រនៅខណៈនោះមានខ្យល់យ៉ាងខ្លាំងបោកបក់មកដល់បណ្ដាលអោយលំនៅដ្ឋាននៅលើផ្ទៃទឹកជួបឧបសគ្គយ៉ាងខ្លាំង។ស្ត្រីរូបនោះបញ្ជាក់ថាការស្វែងរកកូនស្រីរបស់គាត់នៅតែបន្តរហូតមកដល់ល្ងាចថ្ងៃទី៨ខែតុលាឆ្នាំ២០១១ទើបគាត់ទទួលព័ត៌មានថាកូនស្រីគាត់ត្រូវបានគេប្រទះឃើញហើយត្រូវបានគេយកមកជួយសង្គ្រោះនៅភូមិកំពង់គោ៕
ពីគេហទំព័រ៖ កម្ពុជាថ្មី
No comments:
Post a Comment
yes