ស្រី្តវ័យ ៤៩ ឆ្នាំ ម្នាក់ត្រូវរងរបួសយ៉ាងធ្ងន់ចំនួន ៤ កាំបិត ដោយសារប្តីប្រើអំពើហឹង្សាក្នុងគ្រួសារដោយទាញកាំបិតបុ័ងតោកាប់ប្រពន្ធយ៉ាងសាហាវ ព្រោះប្រពន្ធរៀបចំបាយទឹកអោយខ្លួនពុំទាន់ពេលកំពុងឃ្លាន ផ្គាប់ចិត្តខ្លួនមិនត្រូវ។
ហេតុការណ៍ដ៏ឃោរឃៅនេះ បានធ្វើអោយអ្នកភូមិឆោរឡោឡើង ខ្លះបានរត់ទៅប្តឹងសមត្ថកិច្ចអោយជួយអន្តរាគមន៍ចាប់បុរសជាប្តីនោះបានភ្លាមៗ ពេលដែលបុរសនោះកំពុងកាប់ប្រពន្ធ នៅវេលាម៉ោង ៣ រសៀល ថ្ងៃទី២៤ ខែវិច្ឆិកា ឆ្នាំ២០១១ នៅផ្ទះប្តីប្រពន្ធខាងលើ ស្ថិតនៅក្នុងភូមិប្រសូត្រ ទី១ ឃុំកណ្តៀងរាល ស្រុកស្វាយទាប ខេត្តស្វាយរៀង។
ស្រ្តីរងគ្រោះដោយកាំបិតបុ័ងតោរបស់ប្តីនេះឈ្មោះ ហ៊ី សារ៉ុន អាយុ ៤៩ ឆ្នាំ រងរបួសត្រូវដៃស្តាំចំនួន ២ កាំបិត ដៃឆ្វេង ១ កាំបិត ក្បាលខាងស្តាំ ១ កាំបិត ផុងលលាដ៍សន្លប់ក្នុងថ្លុកឈាម កុំតែបានសមត្ថកិច្ចមកជួយទាន់ពេល កុំអីត្រូវប្តីចិត្តសាហាវនេះ កាប់អោយស្លាប់ពុំខានឡើយ។ ចំណែកប្តីចិត្តមាកាប់ប្រពន្ធនោះ ឈ្មោះ ឡឹក ហាយ អាយុ ៥២ ឆ្នាំ ជនជាតិវៀតណាម កាន់អត្តសញ្ញាណប័ណ្ណខ្មែរ មានមុខរបរជាពេទ្យដើរចាក់ថ្នាំតាមភូមិ មានទីលំនៅភូមិឃុំខាងលើ។
តាមប្រភពពត៌មានពីអ្នកភូមិបានអោយដឹងថា មុនពេលកើតហេតុ គេឃើញបុរសជាប្តីមកពីដើរចាក់ថ្នាំអោយគេនៅតាមភូមិ លុះមកដល់ផ្ទះក្នុងភាពស្រវឹងផងនោះ ក៏បានប្រើប្រពន្ធអោយរៀបបាយអោយហូប ស្រាប់តែពេលនោះអ្នកភូមិក៏លឺមានសំលេងប្រពន្ធតមាត់ មួយម៉ាត់ពីរម៉ាត់ ធ្វើអោយប្តីផ្ទុះកំហឹង រត់ទៅទាញយកកាំបិតបុ័ងតោកាប់ប្រពន្ធយ៉ាងសាហាវដូចមានគំនុំពីកាលណាមកអញ្ជឹង។ បច្ចុប្បន្នស្រ្តីរងគ្រោះដែលត្រូវប្តីកាប់នោះ កំពុងសំរាកព្យាបាលនៅមន្ទីរពេទ្យខេត្តស្វាយរៀង ចំណែកប្តីចិត្តសាហាវនោះ ត្រូវសមត្ថកិច្ចធ្វើការឃាត់ខ្លួន និងចាត់ការតាមនីតិវិធីច្បាប់។
សង្គម
No comments:
Post a Comment
yes