មេដឹកនាំគណបក្សប្រឆាំងចំនួនពីរ គឺគណបក្ស សម រង្ស៊ី និងបក្សសិទ្ធិមនុស្ស បានរិះគន់ចំពោះគណៈរដ្ឋមន្ត្រី ដែលបានសម្រេចរក្សាទុកចំនួនអាសនៈក្នុងរដ្ឋសភានាអាណត្តិថ្មីឲ្យនៅដដែលដូចអាណត្តិមុននោះ គឺមិនបានធ្វើបច្ចុប្បន្នភាពឲ្យទៅតាមកំណើនប្រជាពលរដ្ឋ។
កិច្ចប្រជុំគណៈរដ្ឋមន្ត្រី កាលពីថ្ងៃសុក្រ ទី២៥ ខែវិច្ឆិកា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន បានសម្រេចរក្សាចំនួនអាសនៈរដ្ឋសភានីតិកាលទី៥ ត្រឹម ១២៣អាសនៈ ដូចរដ្ឋសភានីតិកាលទី៣ និងទី៤ ដដែល។
លោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី មណ្ឌលភ្នំពេញ។ លោកមានប្រសាសន៍នៅថ្ងៃទី២៦ ខែវិច្ឆិកា ថា បើផ្អែកលើកំណើនប្រជាពលរដ្ឋបច្ចុប្បន្ននេះ គណៈរដ្ឋមន្ត្រីគួរបង្កើនចំនួនអាសនៈរដ្ឋសភានីតិកាលទី៥ ឲ្យបានយ៉ាងហោចពីចំនួន ១២៣ ទៅ ១៣០អាសនៈ។
លោក យឹម សុវណ្ណ បន្ថែម៖ «គណបក្សកាន់អំណាចគេមិនចង់ឲ្យសភាខ្លាំងទេ។ គេចង់ឲ្យសភាខ្សោយ ចង់ឲ្យសភាគ្រាន់តែជាសភាប្រថាប់ត្រា និងគ្មានអំណាចអ្វីទាំងអស់ ទុកឲ្យគេធ្វើអ្វីៗតាមអំពើចិត្ត។ ដូច្នេះហើយបានជាគេមិនចង់ដំឡើងសមាជិកសភាឲ្យកើនតាមចំនួនប្រជាពលរដ្ឋទេ។ ឥឡូវនេះតាំងពីឆ្នាំ១៩៩៣ មកទល់ពេលនេះ ជិត ២០ឆ្នាំហើយ ឡើងតែពី ១ ទៅ ២កៅអីប៉ុណ្ណឹង ដូច្នេះបញ្ជាក់ឲ្យឃើញថា ប្រទេសនេះពុំមានលទ្ធិប្រជាធិបតេយ្យពិតប្រាកដទេ»។
លោកបន្តថា សព្វថ្ងៃនេះកម្ពុជាមានសមាជិកគណៈរដ្ឋមន្ត្រី ឬរដ្ឋាភិបាលចំនួនរហូតដល់ជិត ៥០០នាក់ ដែលជាចំនួនច្រើនជាងគេនៅលើពិភពលោក។ លោកថា ចំនួនសមាជិករដ្ឋាភិបាលនេះ មិនស្របគ្នាជាមួយនឹងស្ថាប័ននីតិប្បញ្ញត្តិ ដែលមានសមាជិកសភាជាង ១២០អាសនៈនោះទេ។
ស្រដៀងគ្នានេះដែរ លោក កឹម សុខា ប្រធានគណបក្សសិទ្ធិមនុស្ស និងជាសមាជិកសភាមណ្ឌលកំពង់ចាម។ លោកបញ្ជាក់ថា ការបោះឆ្នោតសភានីតិកាលទី៥ ឆ្នាំ២០១៣ ចំនួនអាសនៈរដ្ឋសភាគួរបង្កើនតាមខេត្តក្រុងមួយចំនួនដែលមានកំណើនប្រជាពលរដ្ឋច្រើន។
លោកបានចាត់ទុកការរក្សាចំនួនអាសនៈសភានីតិកាលទី៥ របស់គណៈរដ្ឋមន្ត្រីត្រឹម ១២៣អាសនៈដដែល អាចជាយុទ្ធសាស្ត្របក្សកាន់អំណាច ព្រោះគេយល់ថា បក្សខ្លួនមានចំនួនអាសនៈច្រើនស្រាប់ហើយ និងមិនចង់ឲ្យបក្សប្រឆាំងកើនចំនួនអាសនៈថែមទៀត។
លោក កឹម សុខា ឲ្យដឹងបន្ថែម៖ «ទុកអាសនៈឲ្យនៅដដែលនេះ គណបក្សកាន់អំណាចដោយសារគាត់ឃើញថា ចំនួនដែលគាត់គ្រប់គ្រងសព្វថ្ងៃនេះ គាត់បានអាសនៈច្រើន។ ខ្ញុំយល់ឃើញថា គួរតែពិនិត្យឡើងវិញដើម្បីឲ្យខេត្តមួយចំនួន មានប្រជាពលរដ្ឋកើន ដើម្បីត្រូវកើនអាសនៈដែរ»។
លោក កឹម សុខា បន្តថា បច្ចុប្បន្ននេះប្រទេសកម្ពុជា កំពុងប្រឈមនឹងកើតមានបញ្ហាជាតិធំៗជាច្រើនត្រូវដោះស្រាយ។ ដូច្នេះការបង្កើនចំនួនអាសនៈរដ្ឋសភាសម្រាប់អាណត្តិទី៥ ពិតជាសមហេតុផល នៅគ្រាកំណើនប្រជាពលរដ្ឋកើនច្រើន។
ទោះជាបែបនេះក្តី អ្នកស្រី ចក់ សុភាព ជានាយកកម្មវិធីនៃមជ្ឈមណ្ឌលសិទ្ធិមនុស្សកម្ពុជា មិនចាប់អារម្មណ៍ចំពោះការកំណត់ចំនួនអាសនៈសភាសម្រាប់នីតិកាលទី៥ ឆ្នាំ២០១៣ ខាងមុខទេ។ ប៉ុន្តែអ្នកស្រីចង់ឲ្យដំណើរការបោះឆ្នោតនីតិកាលទី៥ មានគណបក្សចម្រុះមកពីគ្រប់គណបក្សនយោបាយ ទាំងបក្សប្រឆាំង និងបក្សកាន់អំណាច អាចធ្វើសកម្មភាពនយោបាយបានស្មើភាពគ្នា។
អ្នកស្រី ចក់ សុភាព បញ្ជាក់បន្ថែម៖ «សំខាន់បំផុតតំណាងដែលចូលរួមហ្នឹងមានចម្រុះគ្រប់គណបក្សនយោបាយ ឬអត់ ហើយតំណាងទាំងអស់ហ្នឹងបានធ្វើការដើម្បីប្រជាពលរដ្ឋឬអត់។ ខ្ញុំគិតថា បរិមាណមិនសំខាន់ទេ។ សំខាន់ថា តើចំនួនសមាជិកសភា ដែលគាត់ធ្វើការសព្វថ្ងៃហ្នឹង បានឆ្លើយតបជាមួយតម្រូវការប្រជាជនហើយ ឬនៅ ទើបបានសំខាន់»។
គណៈរដ្ឋមន្ត្រីបានឲ្យដឹងថា សេចក្ដីព្រាងច្បាប់ស្ដីពីការកំណត់ចំនួនអាសនៈរដ្ឋសភា សម្រាប់នីតិកាលទី៥ បានរៀបចំឡើងអនុលោមតាមមាត្រា ៧ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលប្រកាសឲ្យប្រើដោយព្រះរាជក្រម ចុះថ្ងៃទី២៦ ខែធ្នូ ឆ្នាំ១៩៩៧។
ព្រះរាជក្រមបានចែងថា រៀងរាល់ឆ្នាំទី៣ នៃនីតិកាលរបស់រដ្ឋសភា គណៈរដ្ឋមន្ត្រីត្រូវបង្កើតគណៈកម្មការកំណត់អាសនៈរដ្ឋសភា ដើម្បីកែប្រែចំនួនអាសនៈ និងបែងចែកចំនួនអាសនៈតាមរាជធានីខេត្ត។
គណៈកម្មការនេះត្រូវធ្វើរបាយការណ៍ និងលើកសំណើដើម្បីបន្ថែមចំនួនអាសនៈ និងរក្សាទុកចំនួនអាសនៈឲ្យនៅដដែលជូនរាជរដ្ឋាភិបាល ដោយផ្អែកលើស្ថានភាពប្រជាពលរដ្ឋ ស្ថានភាពភូមិសាស្ត្រសង្គម និងសេដ្ឋកិច្ច ហើយរាជរដ្ឋាភិបាលត្រូវធ្វើសេចក្តីព្រាងច្បាប់ ស្ដីពីការកំណត់ចំនួនអាសនៈនេះជូនរដ្ឋសភាអនុម័ត៕
អាស៊ីសេរី
No comments:
Post a Comment
yes