អាជ្ញាធរខ្មែរបានឱ្យដឹងថា ប្រជាពលរដ្ឋខ្មែរចំនួន ៣នាក់ ដែលទាហានថៃ បាញ់សម្លាប់នោះ គឺជាអ្នកភូមិអូរបាត់ដាវ សង្កាត់បន្សាយរាក់ នៃក្រុងសំរោង ខេត្តឧត្តរមានជ័យ។
មន្ត្រីទំនាក់ទំនងព្រំដែនកម្ពុជា-ថៃ ប្រចាំច្រកប្រាសាទតាមាន់ធំ បានឱ្យដឹងថា គេកំពុងទាក់ទងទៅកាន់អាជ្ញាធរថៃ ខេត្តសុរិន្ទ ដើម្បីស្នើសុំឱ្យបញ្ជូនសាកសពបុរសខ្មែរ ៣នាក់ ដែលកងទាហានថៃ បានបាញ់សម្លាប់ប្រគល់មកឱ្យក្រុមគ្រួសារវិញ។
លោក ជុំ សេរី ជាប្រធានក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកប្រាសាទតាមាន់ធំ នៃស្រុកបន្ទាយអំពិល ខេត្តឧត្តរមានជ័យ។ លោកបានមានប្រសាសន៍កាលពីរសៀលថ្ងៃសុក្រ ទី២៥ ខែវិច្ឆិកា ថា លោកកំពុងរង់ចាំនៅច្រកទ្វារព្រំដែនកម្ពុជា-ថៃ អូរស្មាច់ ដើម្បីបំពេញបែបបទស្នើសុំទៅអាជ្ញាធរថៃ នៃខេត្តសុរិន្ទ ឱ្យបញ្ជូនសាកសពប្រជាពលរដ្ឋខ្មែរ ៣នាក់ត្រឡប់មកភូមិរបស់គេវិញ។
លោក ជុំ សេរី៖ «គេប្រាប់យើងថា មានសាកសពគេឱ្យយើងត្រួតពិនិត្យមើលថា យើងមានបាត់ ឬទេ? ហើយយើងទើបនឹងត្រួតពិនិត្យមើលពីព្រឹកមិញហ្នឹង ឃើញក្រុមគ្រួសារគេហ្នឹងមកទាក់ទង។អ៊ីចឹងទេ យើងឱ្យធ្វើលិខិតបញ្ជាក់ពីភូមិពីឃុំមកសុំទៅគេ»។
ប្រភពពីអ្នកភូមិអូរបាត់ដាវ បានឱ្យដឹងថា បុរស ៣នាក់ ដែលជាអ្នកភូមិរបស់គេ ត្រូវទាហានថៃ បាញ់ស្លាប់ តាំងតែពីថ្ងៃទី២១ ខែវិច្ឆិកា បន្ទាប់ពីនាំគ្នាឡើងភ្នំ និងឆ្លងចូលព្រំដែនថៃ ដើម្បីស្វែងរកកាប់ឈើគ្រញូងមកលក់ដូរ។
លោក ខួង ធឿ ជាប្រធានភូមិអូរបាត់ដាវ។ លោកបានមានប្រសាសន៍ថា អ្នកភូមិរបស់លោកទាំង ៣នាក់ បានចូលទៅកាប់ឈើនៅជិតតំបន់ប្រាសាទខ្នារ ចម្ងាយប្រមាណ ១គីឡូម៉ែត្រភាគខាងកើតពីបង្គោលឡាក់ព្រំដែនលេខ២០៖ «គាត់យកម៉ាស៊ីនទៅអារ ដល់ពេលទៅគាត់មិនអារនៅជើងភ្នំទេ គឺឡើងទៅលើ (ភ្នំ)។ ទាហានរបស់យើងហ្នឹងបានឮម៉ាស៊ីនអារ ដើរតម្រង់ទៅម៉ាស៊ីនហ្នឹង ក្រែងលោប៉ះប្រជាពលរដ្ឋយើង ចៃដន្យទាហានរបស់យើងហ្នឹងបាននាំឆ្កែទៅផង។ ដល់អាឆ្កែនេះវារត់មុខដល់ឆ្កែទៅដល់កន្លែងម៉ាស៊ីននោះ ម៉ាស៊ីនវាស្ងាត់ ទាហានយើងរកកន្លែងអត់ឃើញ។ ដើរបកមកវិញមួយសន្ទុះទៅបានឮម៉ាស៊ីនហ្នឹងអារម្ដងទៀត ដល់មួយស្របក់ក្រោយមកបានឮស្នូរថៃ បាញ់ច្រើន ប្រើកាំភ្លើងអែរប៉េកា (RPK ) ប្រហែល ៣០គ្រាប់។ បាត់មនុស្សតាំងពីថ្ងៃហ្នឹងទៅទើបក្រុមគ្រួសារជនរងគ្រោះហ្នឹង មកសុំជំនួយពីខ្ញុំហ្នឹង ពីល្ងាចមិញនេះឯង»។
នៅតាមតំបន់ព្រំដែនខ្មែរ-ថៃ ក្នុងខេត្តឧត្តរមានជ័យ និងខេត្តព្រះវិហារ ពេលបច្ចុប្បន្ននេះក្រុមឈ្មួញនៅតែរកស៊ីទិញ និងដឹកជញ្ជូនឈើគ្រញូងតាមរថយន្តជារៀងរាល់ថ្ងៃ ដែលអាជ្ញាធរបង្រ្កាបអំពើខុសច្បាប់ទាំងនោះមិនបានជោគជ័យទេ។ ការដែលនៅតែមានពួកឈ្មួញដឹកជញ្ជូនឈើគ្រញូង ដើម្បីនាំចេញទៅក្រៅប្រទេសនោះ បានធ្វើឱ្យប្រជាពលរដ្ឋខ្មែរដែលរស់នៅជាប់ព្រំដែនតែងនាំគ្នាលួចឆ្លងដែនខុសច្បាប់ទៅកាប់ឈើក្នុងទឹកដីថៃ បណ្តាលឱ្យរងគ្រោះថ្នាក់ខ្លះស្លាប់ ខ្លះរងរបួស ដោយសារការបាញ់ និងខ្លះទៀតត្រូវទាហានថៃចាប់ខ្លួន។
របាយការណ៍ត្រួសៗពីតាមព្រំដែននៃខេត្តឧត្តរមានជ័យ និងខេត្តព្រះវិហារ ឱ្យដឹងថា ចាប់តាំងពីថ្ងៃទី៩ ខែតុលា រហូតដល់ថ្ងៃទី២៥ ខែវិច្ឆិកា ឆ្នាំ២០១១ គឺមានប្រជាពលរដ្ឋខ្មែរចំនួន ១១នាក់បានស្លាប់ ម្នាក់រងរបួស និង ១០នាក់ ត្រូវទាហានថៃ ចាប់ខ្លួន ដោយសារតែការលួចឆ្លងដែនខុសច្បាប់ចូលទៅក្នុងទឹកដីថៃ ដើម្បីកាប់ឈើគ្រញូងមកលក់ឱ្យពួកឈ្មួញ៕
អាស៊ីសេរី
No comments:
Post a Comment
yes