បុរសទាំងបីនាក់នោះ ត្រូវមន្ត្រីប៉ូលិសខេត្តកំពតជំរិតទារប្រាក់ចំនួន ១,២លានរៀល ជាថ្នូរនឹងការដោះលែងឲ្យមានសេរីភាពពីការឃាត់ខ្លួន ទាក់ទិននឹងជម្លោះក្នុងរឿងស៊ីផឹក។
ម្នាក់ក្នុងចំណោមបុរសទាំងបីនាក់ មកពីភូមិដុបស្រឡៅ ឃុំត្រពាំងព្រីង ស្រុកទឹកឈូ ខេត្តកំពត លោក សួន នៅ អាយុ ៤៨ឆ្នាំ បានឲ្យដឹងថា កាលពីថ្ងៃទី១៧ ខែវិច្ឆិកា ឆ្នាំ២០១១ ពួកគាត់ទាំងបីនាក់ដែលត្រូវជាសាច់ញាតិនឹងគ្នា បានជួបជុំហូបចុកដោយមានស្រាសចំណុះកន្លះលីត្រផង ហើយបានប្រឡែងគ្នា ក៏ស្រាប់តែឈ្មោះ សួង រ៉ា វាយពួកគាត់ ហើយកាប់រូបគាត់នឹងពូថៅឲ្យរបួសលើខ្នងជើងខាងស្ដាំ។
លោក សួន នៅបន្តថា ពួកគាត់មិនត្រឹមតែមិនទទួលបានយុត្តិធម៌ទេ គឺថែមទាំងត្រូវប៉ូលិសជំរិតទារប្រាក់ទៀត៖ «អាអ្នកកាប់គេវាយគេនោះអត់ដាក់ខ្នោះដាក់អីទេ ដាក់ខ្នោះតែពួកខ្ញុំបីនាក់នេះអត់ដឹងរឿងអីផង។ គេសម្លុតមកអ៊ីចឹង ខ្ញុំស្មានតែហៅខ្ញុំមកធ្វើកសិណ ដល់មកគេដាក់ខ្នោះឡើងឡានឡើងអីទៅ! យកមកគេជំរិតយក គេថា បើមិនបាន ៤០ម៉ឺន (រៀល) អ្ហែងបញ្ចូលគុកទាំងអស់»។
ទាក់ទិននឹងបញ្ហានេះ ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពត លោក ប៊ុត សាបាន មានប្រសាសន៍ថា លោកខ្លាចក្រែងតែការអះអាងរបស់ក្រុមប្រជាពលរដ្ឋស្ដីពីការជំរិតទារប្រាក់នោះមិនមែនជាការពិត៖ «អឺខ្ញុំ ខ្ញុំមិនច្បាស់ដែរ ប៉ុន្តែគ្រាន់តែចង់ឲ្យលោកសួរគាត់ម្ដងទៀត ថាតើស្អីដែលគាត់និយាយហ្នឹងពិត ឬមិនពិត ហើយបើថាយកល្អ ខ្ញុំថា ថាអ៊ីចេះតែម្ដងទៅ ឲ្យគាត់ដុតធូបស្បថតែម្ដងទៅមុននឹងនិយាយ ទោះយើងនៅកន្លែងតុលាការក៏អ៊ីចឹងដែរ ដើម្បីការពិតគេត្រូវស្បថ។ អ៊ីចឹងមុននឹងនិយាយការពិតនៅកន្លែងវិទ្យុអាស៊ីសេរី ឲ្យគាត់ស្បថមក ឲ្យគាត់ស្បថ»។
ពាក់ព័ន្ធនឹងបញ្ហានេះដែរ អ្នកសម្របសម្រួលសាខាសមាគមការពារសិទ្ធិមនុស្សអាដហុក ខេត្តកំពត អ្នកស្រី ទ្រី ឈូន ថ្លែងថា អ្នកស្រីជឿជាក់លើការអះអាងរបស់ក្រុមប្រជាពលរដ្ឋ៖ «ព្រោះប្រជាពលរដ្ឋក្រីក្រគាត់មិនដែលកុហកទេ ហើយគាត់មិនសុខចិត្តទៅកាប់ដើមអន្សងហើយលក់យកលុយធ្វើសោហ៊ុយមក មកយំស្រែក មកតវ៉ាដល់ការិយាល័យសមាគមអាដហុកប្រចាំខេត្តកំពតហ្នឹង ហើយមុននឹងមកដល់ការិយាល័យសមាគមអាដហុកហ្នឹង គាត់បានទៅប្ដឹងដល់ភ្នំពេញឯណោះ ដោយសារតែគាត់ស្មានតែការិយាល័យអាដហុកហ្នឹងមានតែនៅខាងភ្នំពេញ។ អ៊ីចឹងខាងភ្នំពេញក៏គេបញ្ជូនគាត់ត្រឡប់មកវិញ ព្រោះកន្លែងកើតហេតុគឺនៅខេត្តកំពត»។នៅថ្ងៃទី២៥ ខែវិច្ឆិកា ប្រជាពលរដ្ឋទាំងបីនាក់បានដាក់ពាក្យបណ្ដឹងតាមរយៈសាខាសមាគមការពារសិទ្ធិមនុស្សអាដហុក ខេត្តកំពត ចំពោះមន្ត្រីប៉ូលិសនៃស្នងការដ្ឋាននគរបាលខេត្តកំពត ពីបទជំរិតទារប្រាក់ពីពួកគាត់អស់ម្នាក់ចំនួន ៤០ម៉ឺនរៀល៕
អាស៊ីសេរី
No comments:
Post a Comment
yes