ប្រជាពលរដ្ឋរស់នៅភូមិអូរឡង់ ឃុំសៀមបូក ស្រុកសៀមបូក ខេត្តស្ទឹងត្រែង នៅថ្ងៃទី៤ ខែធ្នូ ឆ្នាំ២០១១ បានចោទមន្ត្រីកងប្រដាប់អាវុធមានប៉ូលិស និងទាហានក្នុងឃុំសៀមបូក ស្រុកសៀមបូក ថាបានកាប់រានព្រៃឈើអស់ប្រមាណ ៤០ហិកតារហើយដើម្បីយកដីជាកម្មសិទ្ធិ។
ប្រជាពលរដ្ឋជាសហគមន៍ដែលសុំមិនឲ្យបញ្ចេញឈ្មោះនោះបានបញ្ជាក់ថា ដីដែលសហគមន៍ជនជាតិដើមអភិរក្សសម្រាប់ថែរក្សា និងអាស្រ័យផលជាលក្ខណៈប្រពៃណី មានតំបន់ព្រៃឈើ និងដីចម្ការវិលជុំ ក្នុងភូមិអូរឡង់ ចាប់ពីចំណុចអូររនាម ទៅទល់និងអូររន្ធ ចម្ងាយជាង ៤គីឡូម៉ែត្រ ត្រូវមេប៉ូលិសប៉ុស្តិ៍ គឺលោក ច័ន្ទ សុផាត អនុប្រធានប៉ុស្តិ៍ លោក ឆក និងមន្ត្រីយោធាស្រុក លោក សំយាប នាំគ្នាបាញ់ថ្នាំពណ៌ហ៊ុមព័ទ្ធធ្វើព្រំដី ដើម្បីកាប់រាន។ ប្រជាពលរដ្ឋនោះបន្តទៀតថា ចាប់តាំងពីសប្ដាហ៍មុនមកទល់នឹងថ្ងៃទី៤ ខែធ្នូ ឆ្នាំ២០១១ នេះ តំបន់ព្រៃស្រោងផ្នែកខាងក្នុងតំបន់ដីដែលមន្ត្រីប៉ូលិស និងទាហានបានហ៊ុមព័ទ្ធត្រូវបានកម្មករប្រដាប់ដោយម៉ាស៊ីនកាត់ឈើជាង១០ ទៅ២០គ្រឿង បានចូលទៅអាររំលំឈើថែមទៀត ដើម្បីពង្រីកយកដី ៖ "គាត់វាយផ្លាកគូរថ្នាំព័ទ្ធដីអ៊ីចឹងទៅ ហើយអ្នកដទៃផ្សេងទៀតប្រជាជនពីហ្នឹង គាត់អត់ឲ្យចូលទៅកាប់ទៅលើដីដែលគាត់ហ៊ុមព័ទ្ធហ្នឹង ហើយគាត់បញ្ជូនម៉ាស៊ីនកាត់ត្រង់ស៊ីន័រចូលទៅ។ ហើយដែលគេកាប់ឥឡូវនេះគេកាប់នៅព្រៃខាងក្នុងហ្នឹង ព្រៃដែលគេកាប់ដីព្រៃធំៗ"។
លោក ខាំ រ៉េម ជាប្រធានភូមិអូរឡង់។ លោកបានទទួលស្គាល់ថាដីព្រៃសហគមន៍ពិតជាត្រូវគេជួលកម្មករចូលកាប់រានប្រាកដមែន ប៉ុន្តែទំហំនៃការខូចខាតប៉ុនណានោះលោកមិនបានដឹងច្បាស់នៅឡើយ។ លោកបន្តថា តំបន់ព្រៃដែលគេកំពុងកាប់រានដើម្បីយកដី គឺជាដីព្រៃស្រោងលាតសន្ធឹងរហូតដល់ព្រំប្រទល់ដីខេត្តក្រចេះ ដែលជាគម្របព្រៃដ៏ធំនៅតំបន់នោះ ៖ "មានម៉ាស៊ីនប៉ុន្តែប៉ុន្មានគ្រឿងមិនទាន់ដឹង ឃើញគេកាប់ហៅទៅមើលមួយភ្លែតដែរ មិនដឹងគេមានច្បាប់ពីលើដែរ ឬអត់ ខ្ញុំក៏អត់សូវដឹងដែរ"។
មេប៉ុស្តិ៍ប៉ូលិសរដ្ឋបាលឃុំសៀមបូក លោក ច័ន្ទ សុផាត បានទទួលស្គាល់ថា លោកពិតជាបានកាប់រានព្រៃយកដីមែន ប៉ុន្តែលោកមិនព្រមបញ្ជាក់ពីទំហំដីដែលបានកាប់រាននោះទេ ដោយលោកអះអាងថា ដីដែលលោកកាប់រាននោះ គឺសម្រាប់ធ្វើការដាំដុះដូចប្រជាពលរដ្ឋដែរ ពីព្រោះប្រជាពលរដ្ឋនៅតំបន់នោះក៏បានកាប់រានព្រៃយកដីដូចគ្នា។ លោកបន្តថា ដីដែលលោកដើរបាញ់ថ្នាំពណ៌ គឺធ្វើឡើងដើម្បីរារាំងកុំឲ្យប្រជាពលរដ្ឋចូលទៅកាប់រានព្រៃនោះតែប៉ុណ្ណោះ ៖ "កាប់បង្កបង្កើនផលអត់បានទេចុះ ដល់ពេលយើងកាប់បញ្ហា ដល់ពេលអ្នកស្រុកកាប់មិនឃើញបញ្ហា។ បើអ្នកស្រុកកាប់បាន ចុះយើងម៉េចកាប់មិនបាន បើយើងរាស្ត្រដូចគ្នាហ្នឹង"។
លោក ប៊ុត ខាំថន ជាមេឃុំសៀមបូក។ លោកបានបញ្ជាក់ថា អាជ្ញាធរមូលដ្ឋានមិនបានអនុញ្ញាតឲ្យជនណាម្នាក់កាប់រានព្រៃដើម្បីយកដីនោះទេ ក៏ប៉ុន្តែលោកបដិសេធមិនអធិប្បាយពិស្ដារជុំវិញសេចក្ដីចោទប្រកាន់គ្នារវាងសហគមន៍ និងមន្ត្រីប៉ូលិសក្នុងរឿងកាប់រានព្រៃឈើយកដីនៅមូលដ្ឋាននេះ។
បុគ្គលិកអង្គការភូមិខ្ញុំ គឺកញ្ញា រ៉ាចាន់ និងជាអ្នកសម្របសម្រួលការងារអភិរក្សព្រៃឈើនៅសហគមន៍ភូមិអូរឡង់។ កញ្ញាបានបញ្ជាក់ថា ប្រជាសហគមន៍បានធ្វើសេចក្ដីរាយការណ៍ពីបញ្ហានេះជូនអាជ្ញាធរមូលដ្ឋានភូមិ និងឃុំរួចហើយ ក៏ប៉ុន្តែចំណាត់ការបែបណាមិនទាន់ដឹងនៅឡើយ ៖ "ខ្ញុំបានចុះសម្របសម្រួលគាត់ទាក់ទង និងធ្វើរបាយការណ៍ហ្នឹង គឺគាត់បានរាយការណ៍អ៊ីចឹងមែន"។
វិទ្យុអាស៊ីសេរីនៅថ្ងៃអាទិត្យ ទី៤ ខែធ្នូ ឆ្នាំ២០១១ នេះ មិនអាចទាក់ទងនាយខណ្ឌរដ្ឋបាលព្រៃឈើខេត្តស្ទឹងត្រែង គឺលោក សូន ប៊ុនថន ដើម្បីបញ្ជាក់ពីបញ្ហានេះបានទេ។ យ៉ាងនេះក្តី តំណាងសហគមន៍ គឺអ្នកស្រី ខា ស្រស់ បានបញ្ជាក់ថា ក្រុមសហគមន៍នឹងធ្វើការជួបប្រជុំគ្នានៅដើមសប្ដាហ៍ថ្មីនេះ ដើម្បីធ្វើលិខិតអន្តរាគមន៍ទៅស្ថាប័នជំនាញពាក់ព័ន្ធសុំឲ្យចាត់វិធានការទប់ស្កាត់ជាបន្ទាន់ បើពុំនោះទេ ព្រៃឈើរាប់រយហិកតារនៅទីនោះនឹងត្រូវគេកាប់រំលំអស់ជាមិនខាន៕
អាស៊ីសេរី
No comments:
Post a Comment
yes