លោក សួន វិច្ឆិកា តំណាងប្រជាពលរដ្ឋចំនួន ១៣៦គ្រួសារ ដែលបាននាំគ្នាតវ៉ាប្រឆាំងនឹងការឈូសឆាយនេះ បានប្រាប់ភ្នំពេញប៉ុស្តិ៍ថា ភាគីក្រុមហ៊ុនបានដឹកនាំកម្លាំងយោធាចំនួន ៦ នាក់ដែលប្រដាប់ដោយអាវុធអាកាគ្រប់ដៃ បានអាមេកាំភ្លើងភ្ជង់គំរាមកំហែងមកលើអ្នកភូមិ ខណៈពួកគាត់បានស្រាក់ដៃគ្នាដើរចូលទៅរាំងពីមុខអាប៊ុល(Bulldozers)ចំនួន ៥គ្រឿង ដែលកំពុងឈូសឆាយចំការដំឡូងមីរបស់ពួកគាត់។
លោកបានថ្លែងថា៖ «ពួកគេបានគំរាមថានឹងបាញ់សម្លាប់ប្រជាជនយើងដោយមិនរើសមុខ ប្រសិនបើប្រជាពលរដ្ឋយើងណាម្នាក់ធ្វើឲ្យខូចខាតដល់គ្រឿងចក្ររបស់ពួកគេ»។
តំណាងអ្នកភូមិម្នាក់ទៀត លោក ស៊ុំ ព្រឿង អាយុ ៤៧ឆ្នាំ បាននិយាយថា ទោះជាបែបណាក្ដី មិនមានអំពើហិង្សាកើតឡើងនោះទេ ហើយបន្ទាប់មកអ្នកបើកគ្រឿងចក្រទាំងនោះបានបញ្ឈប់សកម្មភាពឈូសឆាយដីស្រែរបស់អ្នកភូមិ។
លោកបានបន្តថា៖ «យើងគ្រាន់តែចង់ឲ្យភាគីក្រុមហ៊ុនបញ្ឈប់សកម្មភាពឈូសឆាយរំលោភលើដីចំការរបស់យើង»។
លោកអភិបាលស្រុកស្នួល អ៊ីវ សុភុំ បានថ្លែងថា លោកបានបញ្ជូនមន្ត្រីចុះទៅពិនិត្យពីស្ថានភាពនៃទំនាស់នៅក្នុងតំបន់នេះហើយ ប៉ុន្តែលោកនៅមិនទាន់ទទួលបានសេចក្ដីរាយការណ៍ពីអាជ្ញាធរថ្នាក់ក្រោមនៅឡើយទេ។
ចំណែកលោក ស៊ុំ ជួន ប្រធានគណៈកម្មការដោះស្រាយវិវាទដីធ្លីនៅស្រុកស្នួល បានប្រាប់ឲ្យដឹងថា ទោះយ៉ាងណា លោកនឹងមិនបណ្ដោយឲ្យភាគីក្រុមហ៊ុនធ្វើការឈូសឆាយរំលោភលើដីចំការរបស់ប្រជាពលរដ្ឋឡើយ។
លោកបានថ្លែងថា៖ «យើងបានបញ្ជូនក្រុមការងាររបស់យើងទៅពិនិត្យទីតាំងកន្លែងដែលមានជម្លោះនោះហើយ យើងនឹងស្នើឲ្យពួកគេបញ្ឈប់ការឈូសឆាយជាបណ្ដោះអាសន្ន ប្រសិនបើការឈូសនោះបានរំលោភលើដីប្រជាពលរដ្ឋមែននោះ»។
នៅថ្ងៃអង្គារនេះ ភ្នំពេញប៉ុស្តិ៍មិនអាចទំនាក់ទំនងសុំការបំភ្លឺពីខាងភាគីក្រុមហ៊ុន Horizon Agriculture development Co.,Ltd បានទេ៕ភ្នំពេញប៉ុស្តិ៏
No comments:
Post a Comment
yes