ប្រទេសកម្ពុជា និងវៀតណាម បានឯកភាពគ្នាបន្តពង្រឹងចំណងមិត្តភាពទ្វេភាគីឲ្យកាន់តែរឹងមាំថែមទៀត ដើម្បីធ្វើឲ្យប្រជាជននៅតាមបណ្ដោយព្រំដែននៃប្រទេសទាំងពីរស្គាល់គ្នា និងប្រកបមុខរបររកទទួលទានបានជិតស្និទ្ធ និងកើនឡើងថែមទៀត។
ភាគីកម្ពុជា និងវៀតណាម បានឯកភាពគ្នានឹងបង្កើនការផ្លាស់ប្ដូរពាណិជ្ជកម្មឲ្យកើនដល់ចំនួន ៥.០០០លានដុល្លារអាមេរិក នៅឆ្នាំ២០១៥។ ការផ្លាស់ប្ដូរពាណិជ្ជកម្មរវាងប្រទេសទាំង២ នៅ ៩ខែ ឆ្នាំ២០១១ កន្លងមកនេះបានកើនដល់ចំនួនជាង ២.០០០លានដុល្លារអាមេរិករួចទៅហើយ។
ការឯកភាពនេះបានធ្វើឡើងនៅក្នុងជំនួបរវាងរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាឧបនាយករដ្ឋមន្ត្រីជាមួយរដ្ឋមន្ត្រីក្រសួងការបរទេសវៀតណាម លោក ផាម ប៊ិញ ម៉ិញ (Pham Binh Minh) នៅឯក្រសួងការបរទេសកម្ពុជា នៅថ្ងៃទី៧ ខែធ្នូ ឆ្នាំ២០១១។
លោក ហោ ណាំហុង បានមានប្រសាសន៍ប្រាប់អ្នកកាសែតថា នៅឆ្នាំ២០១២ ខាងមុខនេះ ជាឆ្នាំពិសេសដែលប្រទេសទាំងពីរប្រារព្ធខួប ៤៥ឆ្នាំ នៃទំនាក់ទំនងការទូតជាមួយគ្នា៖ «កម្ពុជា និងធ្វើជាប្រធានអាស៊ាន នៅឆ្នាំ២០១២ វៀតណាម បាននិយាយថា នឹងត្រៀមខ្លួនដើម្បីសហការជាមួយកម្ពុជា ដើម្បីធ្វើយ៉ាងណាជួយកម្ពុជា ឲ្យបានធ្វើប្រធានអាស៊ាននេះឲ្យបានល្អ ឲ្យបានជោគជ័យ ដើម្បីឈានទៅរកការកសាងសហគមន៍អាស៊ាន នៅឆ្នាំ២០១៥នេះ»។
នៅក្នុងជំនួបរយៈជិត ២ម៉ោង រវាងអគ្គលេខាធិការមជ្ឈិមបក្សកុម្មុយនិស្តវៀតណាម លោក ង្វៀន ភូត្រុង (Nguenyen Phu Trong) ជាមួយលោកនាយកដ្ឋមន្រ្តី ហ៊ុន សែន នៅឯវិមានសន្តិភាពនៅថ្ងៃទី៦ ខែធ្នូ ឆ្នាំ២០១១ ថ្មីៗនេះ ក៏បានឯកភាពដូចគ្នានេះដែរ៕
អាស៊ីសេរី
No comments:
Post a Comment
yes