លោក ទី វុទ្ធី ជាតំណាងឲ្យប្រជាពលរដ្ឋ រស់នៅ ឃុំកោះសំពៅ ស្រុកពាមជរ ខេត្តព្រៃវែង។ លោកមានប្រសាសន៍ នៅថ្ងៃទី៦ ខែធ្នូ ថាសព្វថ្ងៃនេះប្រជាពលរដ្ឋក្នុងមូលដ្ឋាននេះ មិនអាចធ្វើរបរនេសាទជាលក្ខណៈគ្រួសារ ចិញ្ចឹមជីវិត ក្នុងឡូត៍នេសាទលេខ១៥ និងឡូលេខ១៩ បានទេ ព្រោះម្ចាស់ឡូ និងមន្ត្រីជលផលមិនអនុញ្ញាតឲ្យចាប់ត្រីនៅទីនោះ។
លោកបន្តថា ឡូនេសាទលេខ១៥ និងឡូលេខ១៩ មានទីតាំងក្នុង ស្រុកពាមជរ ដែលលោកហ៊ុន សែន ចេញ ស.ជ.ណ កាលពី ថ្ងៃទី២៥ ខែវិច្ឆិកា ឆ្នាំ២០១១ ឲ្យកាត់រំសាយ មន្ត្រីរដ្ឋបាលជលផលខេត្ត មិនបានអនុវត្តតាមទេ ៖ «ឡូហ្នឹងពីដើមឡើយមានការដេញថ្លៃដ៏ដេញថ្លៃទៅមានភាពមិនប្រក្រតីសម្ដេចនាយក គាត់ដឹងក៏រំសាយឡូហ្នឹងចេញ កាលពី ថ្ងៃទី២៥ ខែវិច្ឆិកា ឆ្នាំ២០១១។ ជូនដំណឹងមកក្រសួងកសិកម្ម និង នាយកដ្ឋានជលផល ហើយនាយកដ្ឋានជលផលបានឯកភាពឲ្យឡូទាំងពីររុះរើរបាំងៗ ទាំងអស់ ប៉ុន្តែមកដល់ពេលនេះមិនទាន់រុះរើទេ»។
តំណាងប្រជាពលរដ្ឋ បានអំពាវនាវទៅថ្នាក់ដឹកនាំក្រសួងកសិកម្ម និង ថ្នាក់ដឹកនាំនាយកដ្ឋានជលផល ឲ្យជួយមានវិធានការណ៍រុះរើ ឬរំសាយឡូ លេខ១៥ និងឡូលេខ១៩ តាម ស.ជ.ណ របស់ប្រមុខដឹកនាំឲ្យបានឆាប់ ដើម្បីឲ្យពលរដ្ឋអាចចូលនេសាទឡូទាំងពីរបានឡើងវិញ។
ទាក់ទងបញ្ហានេះ លោក អូន ស៊ីណាត ជានាយខណ្ឌរដ្ឋបាលជលផល ខេត្ត ព្រៃវែង។ លោកបដិសេធន៍មិនផ្ដល់អត្ថាធិប្បាយជុំវិញ ស.ជ.ណ របស់ថ្នាក់ដឹកនាំ លើករណីឲ្យកាត់រំសាយឡូលេខ១៥ និងឡូលេខ១៩ ក្នុង ខេត្តព្រៃវែង បានទេតាមទូរស័ព្ទ ព្រោះលោកជាប់រវល់ប្រជុំ។
ទោះយ៉ាងណា លោក ម៉ម សំបូរ ជាមេឃុំកោះសំពៅ ស្រុកពាមជរ ខេត្តព្រៃវែង។ លោកទទួលស្គាល់ថា មន្ត្រីជលផលខេត្ត និងមន្ត្រីជំនាញពាក់ព័ន្ធ ពិតជាមិនទាន់ចុះអនុវត្តតាម ស.ជ.ណ របស់ប្រមុខដឹកនាំ ស្ដីពីប្រកាសកាត់រំសាយឡូ លេខ១៥ និងឡូលេខ១៩ ពិតមែន។
លោកថា ស.ជ.ណ កាត់រំសាយឡូលេខ១៥ និងឡូលេខ១៩ ផ្ដើមដោយលោកនាយករដ្ឋមន្ត្រី ពេលនេះ បានឆ្លើយតបចំពោះតម្រូវការពលរដ្ឋ និងបានផ្ដល់សារប្រយោជន៍ច្រើនដល់ពលរដ្ឋក្នុងមូលដ្ឋាន ធ្វើរបរនេសាទចិញ្ចឹមគ្រួសារប្រចាំថ្ងៃ។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៥ ខែវិច្ឆិកា ឆ្នាំ២០១១ បានចេញសេចក្ដីជូនដំណឹង ឬស.ជ.ណ ទៅឲ្យមន្ត្រីក្រសួងកសិកម្ម រុក្ខាប្រមាញ់ និងនេសាទ ឬមន្ត្រីនាយកដ្ឋានជលផល ឲ្យកាត់រំសាយឡូលេខ១៥ និងឡូលេខ១៩ នៅស្រុកពាមជរ ខេត្ត ព្រៃវែង ដោយត្រូវរុះរើរបាំងផ្សេងៗព័ទ្ធជុំវិញដែនឡូទាំងពីរ ដើម្បីទុកឡូទាំងនេះជូនប្រជាពលរដ្ឋធ្វើនេសាទឡើងវិញ៕
អាស៊ីសេរី
No comments:
Post a Comment
yes