មន្ត្រីអង្គការអ្នកឃ្លាំមើលដំណើរការបោះឆ្នោតនៅកម្ពុជា បានបង្ហាញទស្សនៈយល់ឃើញថា ការដែលរដ្ឋាភិបាលមិនអាចដំឡើងចំនួនអាសនៈបន្ថែមក្នុងរដ្ឋសភានោះ គឺមិនមែនជារឿងពាក់ព័ន្ធនឹងបញ្ហាបច្ចេកទេស ឬបញ្ហាសេដ្ឋកិច្ចនោះទេ ប៉ុន្តែវាអាចពាក់ព័ន្ធនឹងបញ្ហានយោបាយច្រើនជាងវិទ្យាសាស្ត្រ។
កិច្ចប្រជុំគណៈរដ្ឋមន្ត្រី កាលពីថ្ងៃសុក្រ ទី២៥ ខែវិច្ឆិកា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន បានសម្រេចរក្សាចំនួនអាសនៈរដ្ឋសភានីតិកាលទី៥ ត្រឹម ១២៣អាសនៈ ដូចរដ្ឋសភានីតិកាលទី៣ និងទី៤ ដដែល។
នាយកប្រតិបត្តិនៃអង្គការខុមហ្វ្រែល (Comfrel) លោក គល់ បញ្ញា មានប្រសាសន៍ថា ចាប់តាំងពីមានការបោះឆ្នោតពីឆ្នាំ២០០៣ រហូតមកដល់ឆ្នាំ២០១៣ ប្រទេសកម្ពុជា មានកំណើនប្រជាពលរដ្ឋគួរឲ្យកត់សម្គាល់។
ស្របពេលជាមួយគ្នានេះដែរ ចំនួនអាសនៈរបស់អ្នកតំណាងរាស្ត្រក៏គួរតែកើនឡើងតាមចំនួនប្រជាពលរដ្ឋទៅតាមភាពចាំបាច់របស់ខេត្ត និងរាជធានីនីមួយៗ៖ «បើយោបល់យើង ៦ល្អ។ បើយើងមើលទៅលើវិទ្យាសាស្ត្របានន័យថា មើលទៅលើប្រជាពលរដ្ឋដែលរស់នៅតាមខេត្តហ្នឹងវាកើនឡើង។ ឧទាហរណ៍ខេត្តព្រះសីហនុ ប្រជាពលរដ្ឋនៅហ្នឹងមានពី ៩ ទៅ ១០ម៉ឺននាក់ វាច្រើនពេក។ មែនទែនយើងចាប់ផ្ដើមពី ១៩៩៨ មកជាមធ្យមមានជាង ៤ ទៅ ៥ម៉ឺននាក់ទេ ហើយនៅតែមួយអាសនៈ តាមពិតវាត្រូវពីរបានត្រូវ ១០ម៉ឺន»។
ទាក់ទិននឹងបញ្ហានេះ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យនៃទីស្ដីការគណៈរដ្ឋមន្ត្រី បានពន្យល់ថា បញ្ហានេះមានទិដ្ឋភាពពីរដែលចាំបាច់តម្រូវឲ្យរដ្ឋាភិបាលនៅរក្សាចំនួន អ្នកតំណាងរាស្ត្រសម្រាប់អាណត្តិខាងមុខនេះឲ្យនៅដដែលនោះ។ ទីមួយ គឺទិដ្ឋភាពនយោបាយដែលផ្ដល់ឱកាសដល់អ្វីដែលគេហៅថា លំហនយោបាយនៃលទ្ធិប្រជាធិបតេយ្យដែលនាំឲ្យមានអំណាចប្រកួតប្រជែង។ ម្យ៉ាងទៀតចំនួនសមាជិកសភាបន្ថែមទៀត មិនទាន់មានសារសំខាន់ដល់ការប្រកួតប្រជែងក្នុងសភាប៉ុន្មានទេ ហើយចំនួនសព្វថ្ងៃនេះមានការឆ្លើយតបគ្រប់គ្រាន់ដើម្បីធ្វើការវែកញែកលើការអនុម័តច្បាប់នីមួយៗ។ ទិដ្ឋភាពទីពីរពាក់ព័ន្ធនឹងបញ្ហាសេដ្ឋកិច្ច គឺវាអាចកាត់បន្ថយលើការចំណាយថវិកាជាតិមួយផ្នែកធំដែរ។
លោក ផៃ ស៊ីផាន៖ «ចំណុចពីរនេះហើយដែលរដ្ឋាភិបាលមើលឃើញ គឺទុកឱកាសនៃថវិកាយើងមាន ដើម្បីអភិវឌ្ឍន៍ជាជាងមកដោះស្រាយបញ្ហាដំណើរការក្នុងរដ្ឋសភានេះឯង។ យើងចង់ឃើញដំណើរការរដ្ឋសភាមានគុណភាពជាងអ្វីដែលមានតែចំនួន ឬបរិមាណ»។
លោក គល់ បញ្ញា មានប្រសាសន៍ថា លោកមើលមិនឃើញថា បញ្ហាសេដ្ឋកិច្ចជាកត្តាដែលធ្វើឲ្យមានឧបសគ្គនៃការដំឡើងចំនួនអាសនៈក្នុងរដ្ឋសភានេះទេ ពីព្រោះរដ្ឋាភិបាលធ្លាប់បានដំឡើងចំនួនទីប្រឹក្សារបស់ខ្លួនមានទៅដល់ជាង ៤០០នាក់ គឺច្រើនជាងចំនួនអ្នកតំណាងរាស្ត្រជាពាក់កណ្ដាល ហើយបញ្ហានេះវាធ្វើឲ្យបាត់តុល្យភាពគ្នារវាងនីតិប្បញ្ញត្តិ និងនីតិប្រតិបត្តិ។
លោក គល់ បញ្ញា៖ «យើងមើលទៅសព្វថ្ងៃវាបាត់តុល្យភាពគ្នាទាំងអំណាចទាំងចំនួនរដ្ឋាភិបាលបើនិយាយពីមន្ត្រីវិញមានចំនួន ៤០០ជាងអានេះគ្រានតែមន្ត្រីនយោបាយទេ នៅមន្ត្រីដែលចាត់តាំងជាទីប្រឹក្សារាប់រយទៀតច្រើនណាស់ ហើយសភាមានតែ ១២៣នាក់ បើមែនទែនយើងសុខចិត្តដំឡើងចំនួនសមាជិកសភាបានខ្លះ អាហ្នឹងជាការល្អដើម្បីឲ្យបានប្រើប្រាស់តំណាងរាស្ត្រខ្លួន ព្រោះតំណាងរាស្ត្រអស់ហ្នឹងបានសន្លឹកឆ្នោតពីប្រជារាស្ត្រ»។
ទាក់ទិននឹងបញ្ហានេះ លោក ផៃ ស៊ីផាន បានពន្យល់ថា វាជាករណីពីរដាច់ដោយឡែកពីគ្នារវាងចំនួនទីប្រឹក្សា និងតួនាទីអ្នកតំណាងរាស្ត្រ៖ «ទីប្រឹក្សាខ្លះគេចង់រួមចំណែកផ្ដល់យោបល់ឲ្យថ្នាក់ដឹកនាំនៅកន្លែងហ្នឹង គេមិនយកប្រាក់បៀរវត្ស ដូច្នេះក្បាលច្រើនគេដឹងរឿងច្រើន ដោយសារមានទីប្រឹក្សាច្រើនហ្នឹងហើយបានជាគណបក្សប្រជាជន ធ្វើការងារបានជោគជ័យ កៅអីសភាគ្រាន់តែឆ្លុះបញ្ចាំងពីចំនួនប្រជាពលរដ្ឋធ្វើឲ្យមានលំហតតាំងនយោបាយនៅក្នុងរដ្ឋសភា រវាងអ្នកភាគច្រើន និងអ្នកភាគតិច»។
ទាក់ទិននឹងបញ្ហានេះដែរ លោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី មណ្ឌលភ្នំពេញ បានមានប្រសាសន៍ថា បើផ្អែកលើកំណើនប្រជាពលរដ្ឋបច្ចុប្បន្ននេះ គណៈរដ្ឋមន្ត្រីគួរបង្កើនចំនួនអាសនៈរដ្ឋសភានីតិកាលទី៥ ឲ្យបានយ៉ាងហោចណាស់ពីចំនួន ១២៣ ទៅ ១៣០អាសនៈ។ ប៉ុន្តែគណបក្សកាន់អំណាចគេមិនចង់ឲ្យសភាខ្លាំងទេ គឺគេចង់ឲ្យសភាខ្សោយចង់ឲ្យសភាគ្រាន់តែជាសភាប្រថាប់ត្រា និងគ្មានអំណាចអ្វីទាំងអស់។
លោក យឹម យុវណ្ណ៖ «ដូច្នេះហើយបានជាបានជារដ្ឋាភិបាលមិនចង់ដំឡើងចំនួនសមាជិកសភាឲ្យកើនតាមចំនួនប្រជាពលរដ្ឋទេ សឲ្យឃើញថា ប្រទេសនេះពុំមានលទ្ធិប្រជាធិបតេយ្យពិតប្រាកដទេ ហើយម្យ៉ាងទៀតគេចង់ដឹកនាំប្រទេសដែលដឹកនាំដោយគណបក្សតែមួយ»។
ចំណែកលោក កឹម សុខា ប្រធានគណបក្សសិទ្ធិមនុស្ស និងជាសមាជិកសភាមណ្ឌលកំពង់ចាម បានចាត់ទុកការរក្សាចំនួនអាសនៈសភានីតិកាលទី៥ របស់គណៈរដ្ឋមន្ត្រីចំនួន ១២៣អាសនៈដដែល អាចជាយុទ្ធសាស្ត្របក្សកាន់អំណាច៖ «ព្រោះគេយល់ថា បក្សខ្លួនមានចំនួនអាសនៈច្រើនស្រាប់ហើយ និងមិនចង់ឲ្យបក្សប្រឆាំងកើនចំនួនអាសនៈថែមទៀត។ ខ្ញុំយល់ឃើញថា គួរតែពិនិត្យឡើងវិញដើម្បីឲ្យខេត្តមួយចំនួនមានប្រជាពលរដ្ឋកើន ដើម្បីត្រូវកើនអាសនៈដែរ»។
ក៏ប៉ុន្តែលោក ផៃ ស៊ីផាន បានអះអាងថា បើទោះបីមានកំណើនកៅអីក្នុងសភាបន្ថែមទៀតក៏ដោយ ក៏ចំនួនភាគច្រើនដាច់ខាតនឹងធ្លាក់មកគណបក្សប្រជាជនជាបក្សកាន់អំណាចដដែល។ ផ្ទុយទៅវិញគណបក្សប្រឆាំងទេដែលត្រូវពង្រឹងសមត្ថភាពខ្លួនឯង។
គណៈរដ្ឋមន្ត្រីបានឲ្យដឹងថា សេចក្ដីព្រាងច្បាប់ស្ដីពីការកំណត់ចំនួនអាសនៈរដ្ឋសភាសម្រាប់នីតិកាលទី៥ បានរៀបចំឡើងអនុលោមតាមមាត្រា ៧ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលប្រកាសឲ្យប្រើដោយព្រះរាជក្រមចុះថ្ងៃទី២៦ ខែធ្នូ ឆ្នាំ១៩៩៧។
ព្រះរាជក្រមបានចែងថា រៀងរាល់ឆ្នាំទី៣ នៃនីតិកាលរបស់រដ្ឋសភាគណៈរដ្ឋមន្ត្រី ត្រូវបង្កើតគណៈកម្មការកំណត់អាសនៈរដ្ឋសភា ដើម្បីកែប្រែចំនួនអាសនៈ និងបែងចែកចំនួនអាសនៈតាមរាជធានីខេត្ត។
គណៈកម្មការនេះត្រូវធ្វើរបាយការណ៍ និងលើកសំណើដើម្បីបន្ថែមចំនួនអាសនៈ និងរក្សាទុកចំនួនអាសនៈឲ្យនៅដដែលជូនរាជរដ្ឋាភិបាល ដោយផ្អែកលើស្ថានភាពប្រជាពលរដ្ឋ ស្ថានភាពភូមិសាស្ត្រ សង្គម និងសេដ្ឋកិច្ច ហើយរាជរដ្ឋាភិបាល ត្រូវធ្វើសេចក្ដីព្រាងច្បាប់ ស្ដីពីការកំណត់ចំនួនអាសនៈនេះជូនរដ្ឋសភាអនុម័ត៕
អាស៊ីសេរី
No comments:
Post a Comment
yes