ក្រុមគ្រូបង្រៀន ក៏បានលើកឡើងថា នាយកវិទ្យាល័យនោះ ក៏បានប្រព្រឹត្តអំពើពុករលួយ ក្រោមរូប ភាព រក្សាទុកឈ្មោះគ្រូ ដើម្បីបើកប្រាក់ខែ យកច្រើនឆ្នាំ ផ្ញើប្រាក់ម៉ោងបង្រៀនបន្ថែម ឲ្យគ្រូបង់ប្រាក់យាម យកលុយពីសិស្ស និង បំផុសឲ្យមានការបែកបាក់សាមគ្គី ផ្ទៃក្នុង តាមរយៈការគ្រប់គ្រង បង្ខំគ្រូបង្រៀន ខុសមុខជំនាញ។
ប្រភពព័ត៌មាននោះ បានចោទប្រកាន់ថា រយៈពេលជាង ១០ ឆ្នាំ ដែលលោក ឡឹក ពៅ បានឡើង កាន់តំណែង ជានាយកវិទ្យាល័យសម្តេចម៉ែ ហើយបច្ចុប្បន្ន មានផ្ទះស្ថិតនៅចម្ងាយប្រមាណ ៣គីឡូ ម៉ែត្រ ពីសាលាក្នុងភូមិជប់ ឃុំជប់នេះ ។ គាត់បានយកតួនាទីរបស់ខ្លួន ប្រមូលយកផលប្រយោជន៍ របស់សាលា មានដូចជា កាប់គាស់ដើមឈើជាច្រើនដើម នៅក្នុងបរិវេណរបស់សាលា ដែលខាងសាលាបានដាំ មានអាយុចាប់ពី ១៥-២០ឆ្នាំ មានដើមរាំង ប្រសូត្រ ម៉ៃសាក់ លក់ឲ្យឈ្មួញយកលុយម្នាក់ឯង។
ប្រភពបន្តថា លោកនាយកសាលា ក៏បានលើកគម្រោងសុំលុយ ពីម្ចាស់ជំនួយ អង្គការ ខេប បានចំនួន ៣ ម៉ឺនដុល្លារ អាមេរិក និង ម្ចាស់ជំនួយក្រុមហ៊ុន ចម្ការ កៅស៊ូជប់ ចំនួន ៣ពាន់ដុល្លារ បន្ថែម ទៀត ដើម្បីជួសជុសអគារមួយខ្នង។
ជាមួយនោះនៅមានសកម្មភាពមិនប្រក្រតី ជាច្រើនទៀត របស់នាយកម្នាក់នេះ ដូចជា កន្លងមកលោក ហ៊ុន សែន ធ្លាប់បានជួយ ឧបត្ថម្ភ កុំព្យូទ័រ ចំនួន ២០ គ្រឿង និង ម៉ាស៊ីនដេរចំនួន ៥០ គ្រឿង ដល់វិទ្យាល័យសម្តេចម៉ែ ដើម្បីបណ្តុះបណ្តាលវិជ្ជាជីវៈបន្ថែមដល់សិស្ស ។ ប៉ុន្តែមកទល់ពេលនេះ គេប្រទះឃើញ មាននៅសល់តែកុំព្យូទ័រ ២-៣ គ្រឿង ដែលមិនអាចប្រើប្រាស់បានទៀតផង ។ ចំណែកឯកុំព្យូទ័រ និង ម៉ាស៊ីនដេរ ជាច្រើនគ្រឿងទៀត មិនដឹងជា បាត់ទៅអស់ ។
ជុំវិញការចោទប្រកាន់ជាង ១០ ចំណុចខាងលើ ត្រូវបានលោក ឡឹក ពៅ នាយកវិទ្យាល័យសម្តេចម៉ែ បានឆ្លើយបកតាមទូរស័ព្ទ កាលពីថ្ងៃទី៥ ខែធ្នូ ឆ្នាំ២០១១ថា រឿងចោទថា បានកាប់គាស់ដើមឈើ នៅក្នុងបរិវេណសាលាលក់នោះពិតជាមានមែន។ ប៉ុន្តែលោកបានដាំដើកៅស៊ូឡើងវិញជិតបានជៀរយកជ័រហើយ ។
ករណីចោទប្រកាន់ថា លោកបានលើកគម្រោងជួសជុសអគារមួយខ្នង តម្លៃបីម៉ឺនដុល្លារនោះ ត្រូវបានលោកនាយកសាលា បកស្រាយថា គឺជាគម្រោងរបស់អង្គការខេបផ្ទាល់ និង ប្រាក់ចំនួន ៣ពាន់ដុល្លារ នោះ ជាប្រាក់បដិភាគ របស់ក្រុមហ៊ុនចម្ការកៅស៊ូជប់ នៅមិនទាន់បានចាត់ចែងធ្វើអ្វីនៅឡើយទេ។
លោកនាយកសាលា ក៏បានបដិសេធរាល់ការចោទប្រកាន់ ពិសេសរឿងជំនួយកុំព្យូទ័រ និងលុយសប្បុរសជនជាច្រើនទៀតនោះ គឺចាត់ចែងការងារទូទៅប៉ុណ្ណោះ។
ចំណែកលោក ផន ភេន ប្រធានការិយាល័យអប់រំយុវជន និង កីឡា ស្រុកត្បូងឃ្មុំ បានឲ្យដឹងតាមទូរស័ព្ទ នៅថ្ងៃទី៦ ខែធ្នូ ថា ទាក់ទិននឹងព័ត៌មាន ចោទប្រកាន់ លើលោកនាយកសាលា ឡឹក ពៅ គឺលោកនៅមិនទាន់បានទទួលស្ទើរទាំងអស់។
លោកប្រធានការិយាល័យអប់រំ អះអាងថា កន្លងមក លោកគ្រាន់តែទទួលព័ត៌មានពីបុគ្គលិកសិក្សាមួយចំនួន ក្នុងវិទ្យាល័យសម្តេចម៉ែ ដោយមានការមិនពេញ និងក្តៅក្រហាយខ្លះ ទៅលើលោក ឡឹក ពៅ ជានាយកនេះ ហើយលោកបានប្រាប់ឲ្យពួកគាត់មកជួប ដើម្បីផ្តល់ព័ត៌មាន ទាំងអស់នោះ តែបានបាត់រហូតមក និងក៏មិនដែលឃើញមានការតវ៉ាឯណាដែរ។ ប៉ុន្តែលោក នឹងពិនិត្យ និងផ្ទៀងផ្ទាត់ ព័ត៌មានឡើងវិញ។
ជាមួយគ្នានោះ លោក ស្វាយ ផល្លា ប្រធានមន្ទីរអប់រំយុវជន និងកីឡា ខេត្តកំពង់ចាម បានឲ្យដឹងតាមទូរស័ព្ទថ្ងៃទី៦ ខែធ្នូនេះដែរថា ការចោទប្រកាន់នោះ វាច្រើនពេក ដូច្នេះសូមឲ្យបុគ្គលិកសិក្សានៅក្នុងវិទ្យាល័យសម្តេចម៉ែ ដែលកើតទុក្ខ មិនសុខចិត្តទាំងអស់សរសេរជាពាក្យបណ្តឹងរៀបរាប់ឲ្យ អស់ពីសកម្មភាពរបស់លោក ឡឹក ពៅ ជានាយក ដែលពួកគាត់ បានចោទប្រកាន់ថា យកសាលាធ្វើអាជីវកម្ម និងប្រព្រឹត្តអំពើពុករលួយ ដោយមិនចាំបាច់ដាក់ឈ្មោះអ្នកប្តឹង ឬអ្នករាយការណ៍ទេ រួចហើយបញ្ជូនមកខាងមន្ទីរអប់រំ ដើម្បីពិនិត្យ ព្រមទាំងថា នឹងបង្កើតឲ្យមានការស៊ើបអង្កេតរឿងចោទប្រកាន់ទាំងអស់នេះ ឲ្យបានច្បាស់លាស់៕
CEN
No comments:
Post a Comment
yes