ខ្មែរ​ក្រោមក្លាយជាបក្ខជននៃរបបកុម្មុយនិស្តវៀតណាម តែគ្មានសិទ្ធិជាមនុស្ស ?

ដោយ សឺង មាលា l សារព័ត៌មាន ព្រៃនគរ

ខណៈដែលវៀតណាមជាញឹកញាប់ត្រូវបានអង្គការក្រៅរដ្ឋាភិបាលខ្មែរក្រោមនៅកម្ពុជា និងនៅក្រៅប្រទេសថ្កោល ទោស ពីនយោបាយកណ្ដាប់ដៃដែករបស់បក្សកុម្មុយនិស្តមួយនេះថា តែងតែគាបសង្កត់ និងជិះជាន់លើសិទ្ធិ សេរីភាពរបស់ពលរដ្ឋខ្មែរក្រោម នៅកម្ពុជាក្រោម កម្មាភិបាលបក្សកុម្មុយនិស្តវៀតណាម មួយរូបបានអះអាង ខណៈមន្ត្រីកម្ពុជាទៅបំពេញទស្សនកិច្ចនៅវៀតណាមថា ពលរដ្ឋខ្មែរក្រោម នៅវៀតណាម ត្រូវបានបក្សកុម្មុយនិស្ត លើកកម្ពស់ ឲ្យចូលជាបក្ខជននៃរបប កុម្មុយនិស្តវៀតណាម ។

លេខា​បក្ស​កុម្មុយនិស្ត​វៀតណាម អះអាងថា ប្រជាជន​ខ្មែរ​ក្រោម ដែល​សព្វថ្ងៃ​មាន​សញ្ជាតិ​វៀត ណាម ហើយ​បាន​ក្លាយជា​ជនជាតិភាគតិច នៅ​វៀតម​ណាម ត្រូវបាន​បក្ស​ជ្រើសរើស​បញ្ចូល​ជា​ បក្ខជន មាន​តំណែង​តួនាទី និង​កាន់ការ​ក្នុង​បក្ស និង​មូលដ្ឋាន​គ្រប់​មន្ទីរ​អង្គភាព ​។ ឯ​កុមារ និង​ យុវជន​ខ្មែរ​ក្រោម ក៏ត្រូវ​លើកកម្ពស់​អភិវឌ្ឍន៍​ជា​ធនធានមនុស្ស​ល្អ ចេះដឹង តាមរយៈ​ការ​បំប៉ន​ ជីវភាព សុខភាព ឲ្យ​រៀនសូត្រ និង​មាន​អគារ​អន្តេវាសិកដ្ឋាន ស្នាក់នៅ​តាំងពី​រៀន​ថ្នាក់​ទី ​៨ ដល់ ទី​ ១២ សាលា​ចំណេះ​ទូទៅ និង​បាន​ប្រឡង​ជាប់​រៀន​នៅ​មហាវិទ្យាល័យ មាន​ជំនាញ​នានា​ ។​ ​ ​ ​

ទាំងនេះ​ជាការ​អះអាង​របស់​អ្នកស្រី ដាំង ធី ​ង៉ុ​ក​ ធិញ សមាជិក​ម​ជ្ឈិម​បក្ស​កុម្មុយនិស្ត​វៀតណាម និង​ជា​លេខា​បក្ស ខេត្ត​វិញ​ឡុង នៅ​ទីស្នាក់ការ​បក្ស​ខេត្ត​វិញ​ឡុង ប្រទេស​វៀតណាម ខណៈ​ជួប​ ប្រតិភូ​ជាន់ខ្ពស់​គណបក្ស​ប្រជាជន​កម្ពុជា​-​ខេត្តបន្ទាយមានជ័យ ដឹកនាំ​ដោយ​លោក អ៊ុង អឿន សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា និង​ជា​ប្រធាន​គណបក្ស​ខេត្ត កាលពី​ ថ្ងៃទី​ ២៣ មេសា ឆ្នាំ​ ២០១២​ ។​ ​ ​ ​

អ្នកស្រី ធិញ និយាយ​បន្តថា ជនជាតិខ្មែរ​ក្រោម​ជិត ៣ % នៅ​ខេត្ត​ [លង់ហោរ ] នេះ ត្រូវបាន​បក្ស និង​រដ្ឋ ជួយ​លើកកម្ពស់​ជីវភាព​ផុតពី​ភាពក្រីក្រ ៣៦ % ក្នុង​ ២ ឆ្នាំ​ចុង​ក្រោយនេះ​ ។ ​ ​ ​ ​

លេខា​បក្ស​ខេត្ត​រូបនេះ និយាយ​ពី​គោលនយោបាយ​បក្ស​ថា ជនជាតិខ្មែរ ដែលមាន​គុណសម្បត្តិ គុណបំណាច់ក្នុង​បដិវត្ត ត្រូវបាន​លើកទឹកចិត្ត​ ។ ជនជាតិខ្មែរ ក៏​ចេះ​សម្របសម្រួល​រស់នៅ​ធើ្វ​ការ​ ជាមួយ​ជនជាតិ​វៀតណាម និង​ជនជាតិ​ដទៃទៀត ហើយ​ចេះ​សាមគ្គីភាព​ទំនាក់​ទំនង​ល្អ​ ។​ ​ ​

​ក្នុងឱកាស​នោះ លោក អ៊ុង អឿន ប្រធាន​គណបក្ស​ប្រជាជន​កម្ពុជា ខេត្តបន្ទាយមានជ័យ និង​ជា​ អភិបាលខេត្ត​បន្ទាយមានជ័យ បាន​លើកឡើងថា គណបក្ស​ខិតខំ​បន្ត​ធើ្វ​ល្អ និង​ដើម្បី​សេចក្តីចម្រើន​ របស់​ពល​រដ្ឋ ទើប​ពលរដ្ឋ​គ្រាំទ្រ​បោះឆ្នោត​ជូន​រហូតមក​។​ ​ ​ ​

លោក​និយាយ​ ដូច្នេះ ឆ្លើយតប​នឹង​លេខា​បក្ស​កុម្មុយនីស្ត​វៀតណាម​ខេត្ត​វិញ​ឡុង ដែលថា បក្សបាន​ ធើ្វ​គំរូ​ល្អ ទើប​ប្រជាជន​ស្រឡាញ់ និង​ជំហរ​គាំទ្រ ​។ កម្មាភិបាល​វៀតណាម​អះអាងពី​ការចាត់តាំង​ កម្មាភិបាល​បក្ស និង​រដ្ឋ​សួរ​សុខ​ទុក្ខជនជាតិភាគតិច​ខ្មែរ ក្មុង​ឱកាស​បុណ្យចូលឆ្នាំ​ខ្មែរ និង​ពិធី​ ប្រពៃណី​នានា​ ។ ប៉ុន្តែ​គេពុំ​ឃើញ​លេខា​បក្ស​ខេត្ត​រូបនេះ អះអាង​ពី​ការបន្ធូរបន្ថយ​សេរីភាព​នានា ដល់​ពលរដ្ឋ​ខ្មែរ​​ក្រោម​នោះទេ​ ។

នៅក្នុងកិច្ចប្រជុំលើកទី ៨០ នៃគណៈកម្មការលុបបំបាត់ការរើសអើងពូជសាសន៍ (CERD) នៃអង្គការសហប្រជា ជាតិ កាលពីចុងខែកុម្ភៈ និង ដើមខែមីនា កន្លងទៅនេះ សហព័ន្ធខ្មែរកម្ពុជាក្រោម(KKF) ដែលមានទីស្នាក់ការ នៅសហរដ្ឋអាមេរិក និងអង្គការប្រជាជាតិគ្មានតំណាង (UNPO) បានជូនរបាយការណ៍ដល់គណៈកម្មការ CERD ថា ពលរដ្ឋខ្មែរក្រោម នៅកម្ពុជាក្រោម ត្រូវបានអាជ្ញាធរវៀតណាមរំលោភសិទ្ធិ និងរើសអើងពូជសាសន៍យ៉ាង ធ្ងន់ធ្ងរ ។ នៅក្នុងរបាយការណ៍នេះ សហព័ន្ធខ្មែរកម្ពុជាក្រោមបានរាយការណ៍ថា កុមារខ្មែរក្រោម មិនមាន ឱកាសសិក្សាភាសាខ្មែរ និងត្រូវបានអាជ្ញាធរបង្ខំ ឲ្យច្រៀងបទចម្រៀងសរសើររដ្ឋាភិបាល  ការចាប់ព្រះសង្ឃខ្មែរ ក្រោម ផ្សឹករួចដាក់គុកទាំងទទឹងទិស   ការចាប់ លោក ចៅ ហេន ដាក់ពន្ធនាគារ ដោយគ្រាន់តែគាត់តវ៉ាយកដី កេរដូនតាមកវិញ និង ការព្យាយាមកាឡៃពូជសាសន៍ខ្មែរក្រោម ឲ្យក្លាយជាយួនជាដើម ។

ទស្សនាវដ្ដីដ៏មានប្រជាប្រីយ៍ឈ្មោះ Foreign Policy នៅថ្ងៃទី ១៧ ខែមេសា ទើបបានចេញផ្សាយអត្ថបទមួយ ដោយអ្នកកាសែត Dustin Roasa បានសរសេរផ្តោតលើប្រទេសវៀតណាមថាបច្ចុប្បន្ន វៀតណាមបានក្លាយ ជាប្រទេស ដែលព្រៃផ្សៃបំផុតនៅអាស៊ីអាគ្នេយ៍ ? ឬ The Terrible Tiger (សត្វខ្លាគួរឲ្យខ្លាច) ដែលនិយាយ អំពីអំពើផ្ដាច់ការរបស់បក្សកុម្មុយនិស្តវៀតណាម លើពលរដ្ឋរបស់ខ្លួន ក្នុងនោះមានការចាប់ខ្លួននិងធ្វើទុក្ខបុកម្នេញ ដល់អ្នកបញ្ចេញមតិជាដើម ។

នៅថ្ងៃទី ២៥ ខែមេសា អង្គការឃ្លាំមើលសិទ្ធិមនុស្ស (HRW) បាន ចេញសេចក្ដីថ្លែងការណ៍មួយជម្រុញ ឲ្យប្រទេសអូស្រ្តាលី ដាក់សម្ពាធវៀតណាម ឲ្យដោះលែងអ្នកទោសនយោបាយ និង គោរពសិទ្ធិពលរដ្ឋ ក្នុងនោះ មានសិទ្ធិនៃការបញ្ចេញមតិ សិទ្ធិនៃការជួបជុំគ្នា និង សិទ្ធិជំនឿសាសនា ជាដើម ។ អង្គការឃ្លាំមើលសិទ្ធិមនុស្ស ចេញសេចក្ដីថ្លែងការណ៍នេះ ព្រោះអូស្រ្តាលី និង វៀតណាមនឹងសន្ទនាគ្នាជុំវិញបញ្ហាសិទ្ធិមនុស្ស ដែលប្រព្រឹត្តទៅ នៅទីក្រុងហាណូយចាប់ពីថ្ងៃទី ២៦ ដល់ ២៧ ខែមេសា នេះ ៕