ប្រជាពលរដ្ឋរស់នៅភូមិដោះក្រមុំ ខេត្តមណ្ឌលគិរី ចោទប្រកាន់អាជ្ញាធរក្រុងសែនមនោរម្យ ថាបានប្រើប្រាស់កងកម្លាំងនគរបាល និងកងរាជអាវុធហត្ថរុះរើលំនៅឋានប្រជាពលរដ្ឋដោយបង្ខំ និងមិនបានដោះស្រាយផលប៉ះពាល់ជីវភាពរស់នៅរបស់ប្រជាពលរដ្ឋឡើយ។ ចំណែកអាជ្ញាធរបានចោទថា ផ្ទះទាំងនោះសង់លើដីមជ្ឈមណ្ឌលវប្បធម៌របស់ខេត្ត។
ប្រជាពលរដ្ឋរស់នៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី នៅថ្ងៃអាទិត្យ ទី៤ ខែវិច្ឆិកា ឆ្នាំ២០១២ ឲ្យដឹងថា លំនៅឋានប្រជាពលរដ្ឋ ៣ខ្នង ត្រូវបានក្រុមសមត្ថកិច្ចរុះរើចោល និងផ្ទះជាង ២០ខ្នង ត្រូវប្រឈមមុខនឹងការរុះរើដោយគ្មានការទទួលខុសត្រូវ។
ប្រជាពលរដ្ឋជាម្ចាស់ផ្ទះមួយរូបឈ្មោះ លោក ង៉ែត ផាន់ មានប្រសាសន៍បញ្ជាក់ថា ការរុះរើលំនៅឋានប្រជាពលរដ្ឋនេះ ធ្វើឡើងកាលពីថ្ងៃទី២ ខែវិច្ឆិកា កន្លងទៅ ហើយការរុះរើនឹងបន្តទៅដើមសប្ដាហ៍ក្រោយនេះ។
លោកបន្តថា ការរុះរើនេះគឺអាជ្ញាធរមិនបានអនុវត្តច្បាប់ស្មើភាពចំពោះប្រជាពលរដ្ឋនោះទេ គឺនៅមានការរើសអើង និងប្រកាន់បក្ខពួករវាងអ្នកក្រ និងអ្នកមានប្រាក់មានអំណាច៖ «និយាយរួមអ្នកណាអត់មាន អ្នកក្រីក្រ គឺដេញចេញ។ អ្នកមានគឺគេធ្វើបាន ដូចផ្ទះ នួន ស្រី គេធ្វើផ្ទះប៉ុណ្ណាណីអស់ហើយ»។
ចំណែកប្រជាពលរដ្ឋភូមិដោះក្រមុំ ម្នាក់ទៀត គឺលោក សេង លី បានកត់សំគាល់ថា ប្រជាពលរដ្ឋមួយចំនួនបានមកតាំងទីលំនៅក្នុងតំបន់នោះច្រើនឆ្នាំហើយ ក្រុមអាជ្ញាធរសម្រេចរុះរើលំនៅឋានពួកគាត់ដោយមិនបានផ្ដល់ដីសម្បទានសង្គមកិច្ចជាគោលនយោបាយសម្រាប់ប្រជាពលរដ្ឋតាំងទីលំនៅថ្មី៖ «ថាចែកដីឲ្យពួកខ្ញុំម្នាក់មួយប្លង់ៗ អត់ឃើញចែក។ គេមានលុយមានកាក់គេធ្វើប្លង់បាន គេសាងសង់ផ្ទះថ្មរួចអត់មានការងាររអាក់រអួលទេ ធ្វើអ៊ីចឹងអយុត្តិធម៌ពេក គេអត់និយាយសំណងគេរុះទទេៗអ៊ីចឹងតែម្ដង»។
អាជ្ញាធរខេត្តមណ្ឌលគិរី កាលពីប៉ុន្មានឆ្នាំមុននេះបានបណ្ដេញប្រជាពលរដ្ឋមួយចំនួនចេញតំបន់ភ្នំដោះក្រមុំ ដើម្បីរក្សាតំបន់នោះទុកជាមជ្ឈមណ្ឌលវប្បធម៌ជនជាតិដើមភាគតិច។
ចៅសង្កាត់សុខដុម លោក អ៊ិន អ៊ីវ បានចាត់ទុកការរុះរើលំនៅឋានប្រជាពលរដ្ឋថា ជាប្រការមិនត្រឹមត្រូវ ប៉ះពាល់ជីវភាពរស់នៅរបស់ពលរដ្ឋ។
លោកមានប្រសាសន៍បញ្ជាក់ថា ក្នុងនាមជាមន្ត្រីមូលដ្ឋាន លោកមិនគាំទ្រផែនការរុះរើលំនៅឋានប្រជាពលរដ្ឋដោយបង្ខំនោះទេ៖«ទៅរុះរបស់ប្រជាពលរដ្ឋវាប៉ះហើយផ្ទះសំបែងរបស់គេ...។ អត់បានទៅចូលរួមនឹងគេទេ ខ្ញុំអត់ទៅ ព្រោះខ្ញុំកាលបោះឆ្នោតប្រជាពលរដ្ឋអ្នកបោះ»។
អភិបាលក្រុងសែនមនោរម្យ លោក តេង សម្បត្តិ មិនធ្វើអធិប្បាយពិស្ដារស្ដីពីមូលហេតុនៃការរុះរើលំនៅឋានពលរដ្ឋនោះទេ។ លោកបញ្ជាក់យ៉ាងខ្លីថា ដីដែលពលរដ្ឋតាំងទីលំនៅជាដីមជ្ឈមណ្ឌលវប្បធម៌របស់អាជ្ញាធរខេត្ត។
ប្រធានមន្ទីរវប្បធម៌ខេត្តមណ្ឌលគិរី លោក ស្រ៊ុន ផល្លីម មានប្រសាសន៍បញ្ជាក់ថា ផ្ទះប្រជាពលរដ្ឋ ១១ផ្ទះ ឋិតក្នុងគម្រោងបង្ខំឲ្យរុះរើចេញពីតំបន់វប្បធម៌ភ្នំដោះក្រមុំ ដើម្បីយកដីទុកជាសម្បត្តិរដ្ឋ។
លោកបដិសេធថា ការរុះរើនេះមិនមានរើសអើងប្រជាពលរដ្ឋក្រីក្រ ឬអ្នកមានឡើយ ក៏ប៉ុន្តែអាជ្ញាធរនឹងអនុវត្តវិធានការផ្លូវតុលាការចំពោះផ្ទះចំនួនបីខ្នងផ្សេងទៀត ដែលបានសាងសង់មានលក្ខណៈយុទ្ធសាស្ត្រ៖ «ខាងក្រុងគាត់ក៏ចេញដីកាមួយឲ្យគាត់រុះរើយ៉ាងបន្ទាន់រយៈពេលមួយអាទិត្យ ឥឡូវវាលើសហើយ អាជ្ញាធរសម្រេចរុះរើចេញ បើមិនរុះទេដីមជ្ឈមណ្ឌលរបស់យើងគាត់យកអស់ហើយ»។
របាយការណ៍អង្កេតរបស់មន្ត្រីសមាគមអាដហុក ខេត្តមណ្ឌលគិរីឲ្យដឹងថានៅតំបន់តំណាក់ស្តេចក្នុង សង្កាត់សុខដុម ក៏មានប្រជាពលរដ្ឋជាច្រើនគ្រួសារមកតាំងទីលំនៅលើដីរដ្ឋដូចគ្នា។
អ្នកសម្របសម្រួលសមាគមអាដហុក ខេត្តមណ្ឌលគិរី លោក ហូ សំអុល មានប្រសាសន៍បញ្ជាក់ថា ប្រជាពលរដ្ឋអ្នករងផលប៉ះពាល់មួយចំនួនបានសុំកិច្ចអន្តរាគមន៍ពីសមាគមលោកឲ្យជួយគាំពារសិទ្ធិរស់នៅតាំងទីលំនៅរបស់ពលរដ្ឋ។ លោកអំពាវនាវសុំឲ្យអាជ្ញាធរខេត្តអនុវត្តគោលនយោបាយផ្តល់ដីសម្បទានជាថ្នូរសម្រាប់ប្រជាពលរដ្ឋបានសង់លំនៅឋានឡើងវិញ៕
No comments:
Post a Comment
yes