គណបក្សប្រជាជន បន្តរប្រើល្បែងប្រជាភិថុត ដើម្បីស្វែងរកការគាំទ្រ ពីប្រជាពលរដ្ឋ នៅពេលបោះឆ្នោតថ្នាក់ជាតិ

គណបក្សប្រជាជនកម្ពុជា ដែលជាគណបក្សកាន់អំណាច ជានិច្ចជាកាលត្រូវបានគេដឹងថា ជា​គណ​​​​បក្សដែល​តែងតែប្រើល្បែងនយោបាយប្រជាភិថុតជាបន្តរបន្ទាប់ឥតឈប់ឈរ ដើម្បី​ស្វែង​រក​ការគាំទ្រពីប្រជាពលរដ្ឋ នេះបើតាមការលើកឡើងរបស់អ្នកតាមដានស្ថានការណ៏​នយោបាយ​នៅក្នុងប្រទេសកម្ពុជា ។

មិនខុសពីការលើកឡើងរបស់អ្នកតាមដានស្ថានការណ៏នយោបាយនៅក្នុងប្រទេសកម្ពុជាទេ ថ្មីៗ នេះបើយោងតាមសេចក្តីរាយការណ៏ពីខេត្តតាកែវមកបានឲ្យដឹងថា គណបក្សប្រជាជនកម្ពុ​ជានៅ​ក្នុង​​ខេត្តតាកែវ កំពុងតែធ្វើសកម្មភាពនយោបាយប្រជាភិថុត បោកប្រាស់ប្រជាពលរដ្ឋដើម្បី​ទទួលបានការគាំទ្រនៅពេលបោះឆ្នោតថ្នាក់ជាតិនៅខែកក្កដា ឆ្នាំ២០១៣ ខាងមុខនេះ ។

ប្រភពពីខេត្តតាកែវបានឲ្យដឹងបន្តរទៀតថា កាលពីថ្ងៃទី១៦ ខែមិថុនា ឆ្នាំ២០១២ លោក ម៉ៅ ហាល់វណ្ណាល់ ដែលជាប្រធានទ្រទ្រង់នៅក្នុងឃុំអង្គកែវ ស្រុកទ្រាំង ខេត្តតាកែវ  បានចុះទៅចែក​ប្រាក់ដល់ប្រជាពលរដ្ឋក្នុងម្នាក់ចំនួន១ម៉ឺនរៀល ដែលពួកគេបានធ្វើការសន្យាជាមួយនិងប្រជា ពលរដ្ឋកាលពីមុនពេលបោះឆ្នោតថា ប្រសិនបើនៅក្នុងឃុំអង្គកែវ គណបក្សប្រជាជន​ដណ្តើម​បាន​មេឃុំ នៅក្រោយថ្ងៃបោះឆ្នោតគេនិងចែកប្រាក់ឲ្យទៅប្រជាពលរដ្ឋក្នុងម្នាក់ចំនួន១ម៉ឺនរៀល​បន្ថែមទៀត លើអ្វីដែលពួកគេបានចែកនៅមុនពេលបោះឆ្នោត ដែលមានដូចជាក្រមា សារ៉ុង ប៊ីចេង ទឹកត្រី ទឹកស៊ីអៀវ …..ជាដើមនោះ ។​ ដែលការចែកប្រាក់ដល់ប្រជាពលរដ្ឋនៅ​ក្នុងឃុំអង្គ​កែវ ពីសំណាក់លោក ម៉ៅ ហាល់វណ្ណាល់ គឺបានធ្វើឡើងនៅមន្ទីរបក្សរបស់គណបក្ស​ប្រជាជន​ផ្ទាល់តែម្តង ។

ប្រភពដ៏គួរឲ្យទុកចិត្តដែលបែកចេញមកពីសមាជិកគណបក្សប្រជាជន បានប្រាប់មកកម្មជន​របស់​គណបក្ស​ សម រង្ស៊ី នៅក្នុងខេត្តតាកែវថា  គណបក្សប្រជាជនរបស់ពួកគេហ៊ានធ្វើ​អ្វីៗគ្រប់​បែបយ៉ាង ដើម្បីយកឈ្នះមកលើគណបក្ស​សម រង្ស៊ី ហើយគេនិងរកគ្រប់វិធីធ្វើយ៉ាងណា​ឲ្យគណ​បក្ស សម រង្ស៊ី សូន្យតែម្តង មិនមានសូម្បីតែមួយសម្លេង ។ ជាមួយគ្នានោះពួកគេក៏បានសម្តែង កា​រ​​ខឹងសម្បារ ចំពោះប្រជាពលរដ្ឋមួយចំនួននៅក្នុងឃុំអង្គកែវ ស្រុកទ្រាំង ខេត្តតាកែវ ផងដែរ ដែលពួកគេបានចំណាយប្រាក់អស់រាប់សិបពាន់ ម៉ឺនដុល្លា ក្នុងការធ្វើជាអំណោយយកមកចែក ជូនប្រជាពលរដ្ឋនោះ ដើម្បីជាការទិញទឹកចិត្កឲ្យប្រជាពលរដ្ឋបោះឆ្នោតឲ្យគណបក្សប្រជាជន របស់ពួកគេ តែបែរជាប្រជាពលរដ្ឋមួយចំនួនទាំងនោះ នៅតែបោះឆ្នោតគាំទ្រគណបក្ស សម រង្ស៊ី ធ្វើឲ្យគណបក្ស សម រង្ស៊ី កើនសម្លេង១សម្លេងបន្ថែមទៀត ដែលធ្វើឲ្យពួកគេកាន់តែមានការក្តៅ​ក្រហាយ​ជា​ខ្លាំង ចំពោះការកើនសម្លេងឆ្នោតរបស់គណបក្ស​សម រង្ស៊ី នៅក្នុងឃុំអង្គកែវនោះ ។

ជុំវិញករណីគណបក្សប្រជាជនរបស់លោក ហ៊ុន សែន យកអំណោយ និងប្រាក់ទៅចែកជូនប្រជា ពលរដ្ឋដើម្បីទទួលបានការគាំទ្រដែលជាល្បែងនយោបាយរបស់ពួកគេ ដែលបានធ្វើមកលើប្រ ជាពលរដ្ឋ ដើម្បីបិទបាំងនូវទង្វើអាក្រក់របស់ពួកគេដែលបានធ្វើមកលើប្រជាពលរដ្ឋនោះ ត្រូវ បានលោក ឃី វណ្ណដេត តំណាងរាស្រ្តរបស់គណបក្ស​ សម រង្ស៊ី លើកឡើងថា អ្វីដែលគណបក្ស ប្រជាជនបានធ្វើនេះ វាជាការរំលោភច្បាប់បោះឆ្នោតរួចទៅហើយ ហើយវាក៏ជាទំលាប់របស់ គណបក្សប្រជាជននេះផងដែរ ដែលគណបក្សមួយនេះពុំមានសមត្ថភាពក្នុងការប្រគួតប្រជែង​ឲ្យ​បានស្មើភាពទៅតាមផ្លូវច្បាប់ជាមួយនិងគណបក្ស សម រង្ស៊ី នោះទេ ។ លោក ឃី វណ្ណដេត បាន​បន្តទៀតថា គណបក្សប្រជាជនគឺគ្មានប្រជាប្រិយភាពអ្វីទាំងអស់ សម្រាប់ធ្វើការទាក់​ទាញនិង​ទទួលបានការគាំទ្រពីសំណាក់ប្រជាពលរដ្ឋ ក្រៅតែពីការបំភ័ណ្ឌភ្នែកប្រជាពលរដ្ឋ និងមហាជន​ទូទៅក្នុងការប្រើប្រាស់លុយកាក់ និងអំណោយផ្សេងៗ​យកមកទិញទឹកចិត្តរបស់ប្រជាពល​រដ្ឋ​នោះ​ ។ លោកថាជាក់ស្តែងយើងបានឃើញហើយ បើទោះបីជាគណបក្សប្រជាជន គេបាន​​ចំ​ណាយ​អស់ប្រាក់ជាច្រើនម៉ឺនដុល្លា នៅក្នុងឃុំអង្គកែវ ដើម្បីទិញទឹកចិត្តប្រជាពលរដ្ឋ​ បោះឆ្នោត​ឲ្យ​​គណបក្សរបស់គេក៏ដោយ តែលទ្ធផលគណបក្ស សម រង្ស៊ី នៅតែមានការកើនសម្លេងដដែល លោកថាទង្វើនេះត្រូវបានគណបក្សប្រជាជនធ្វើនៅទូទាំងប្រទេស មិនមែនតែនៅក្នុង​ខេត្តតាកែវ​មួយនេះទេ ។

តំណាងរាស្រ្ត ឃី វណ្ណដេត បានបន្ថែមទៀតថា​អំណោយគេឲ្យសូមបងប្អូនប្រជាពលរដ្ឋទទួល យកចុះ ព្រោះអំណោយដែលគណបក្សប្រជាជន បានយកទៅចែកជូនបងប្អូននោះគឺជាប្រាក់ កាសរបស់បងប្អូនទេ គេបានមកពីការប្រព្រឹត្តអំពើពុករលួយ កឹមកេងគ្រប់រូបភាពលើបងប្អូន មានន័យថាគឺគេបានធ្វើស្រែនៅលើខ្នងរបស់បងប្អូន ។ ដូចនេះសូមបងប្អូនប្រជាពលរដ្ឋទទួល យកចុះ តែនៅពេលបោះឆ្នោតត្រូវតែសម្រេចចិត្តឲ្យបានត្រឹមត្រូវ ព្រោះអនាគត់របស់បងប្អូន និង ប្រទេសជាតិគឺស្ថិតនៅលើកណ្តាប់ដៃរបស់បងប្អូនហើយ ប្រសិនបើបងប្អូនបោះឆ្នោតខុសនោះ យើងពិតជាលំបាកវេទនា៥ឆ្នាំបន្ថែមទៀតជាក់ជាមិនខាន លោកថាដូចទិដ្ឋភាពនៅក្នុងសង្គម ដែលបងប្អូនបានឃើញស្រាប់ ។ អ្នកតំណាងរាស្រ្ត ឃី វណ្ណដេត បានបន្ថែមទៀតថា សូមឲ្យប្រ​ជា​ពលរដ្ឋមានស្មារតីភ្ញាក់រលឹកឡើងទាំងអស់គ្នា ដូចអ្វីដែលប្រជាពលរដ្ឋនៅក្នុងឃុំអង្គកែវ បាន​ធ្វើ​នោះ បើទោះបីជាមានការទិញទឹកចិត្ត ប្រជាពលរដ្ឋភ្លូកទឹក ភ្លូកដី យ៉ាងណាក៏ដោយ ​ក៏សម្លេង​របស់ប្រជាពលរដ្ឋគាំទ្រលើគណបក្ស សម រង្ស៊ី គឺមានការកើនឡើងដដែល ។ ជាមួយគ្នានោះ​លោក ឃី វណ្ណដេត ក៏បានសម្តែងក្តីសង្ឃឹមនិងជឿជាក់ផងដែរថា នៅឆ្នាំ២០១៣ ខាងមុខ​នេះ​ប្រ​ជាពលរដ្ឋ និងពិតជាធ្វើឲ្យមានព្រឹត្តិការណ៏ដ៏អស្ចារ្យមួយ ដោយ​ពួកគាត់ទាំងអស់គ្នានិង​នាំគ្នា​បោះ​ឆ្នោតធ្វើការផ្លាស់បន្តូររដ្ឋាភិបាលសព្វថ្ងៃនេះចេញ ហើយផ្តល់ការទុកចិត្តមកលើគណបក្ស​សម រង្ស៊ី វិញម្តង ព្រោះជានិច្ចជាកាលគណបក្ស សម រង្ស៊ី តែងតែចេញមុខជួយប្រ ជាពលរដ្ឋ​គ្រប់​វេលា រាល់ពេលប្រជាពលរដ្ឋមានបញ្ហាម្តងៗ ។ ដូចនេះមានតែគណបក្ស សម រង្ស៊ី មូយកត់​ដែលជាក្តីសង្ឃឹមសម្រាប់ប្រជាពលរដ្ឋខ្មែរទូទៅ ក្នុងការសង្គ្រោះប្រទេសកម្ពុជា ឲ្យរួច ចេញផុត​ពីកណ្តាប់ដៃរបស់គណបក្សប្រជាជន ដែលកាន់អំណាចជាង៣០ហើយនោះ ដែលធ្វើ​ឲ្យប្រជា​ពល​រដ្ឋខ្មែរស្គាល់តែពាក្យថា ខ្លៅ ខ្លាច ហើយនិងឃ្លានតែប៉ុណ្ណោះ ។

គួរជំរាបជូនផងដែរថា កាលពីថ្ងៃទី១១ ខែមិថុនា ឆ្នាំ២០១២ លោក ចាប រិទ្ធី ដែលជាសមាជិក គណៈកម្មាធិការកណ្តាលរបស់គណបក្សប្រជាជន ចុះជួយនៅខណ្ឌពោធិ៏សែនជ័យ ក៏បានធ្វើលិ ខិតស្នើសុំថវិការចំនួន១០០ដុល្លា ទៅប្រធានក្រុមហ៊ុនមួយ ដោយសំណើរនោះលោក ចាប រិទ្ធី បានលោកឡើងថា ដោយក្រុមការងាររបស់គណបក្សប្រជាជនខណ្ឌពោធិ៏សែនជ័យមានកម្មវិធី អបអរសាទរក្នុពិធី ជប់លៀងដែលទទួលបានជ័យជំនះការបោះឆ្នោតក្រុមប្រឹក្សាឃុំ-សង្កាត់ នាថ្ងៃ អាទិត្យ ទី០៣ ខែមិថុនា ឆ្នាំ២០១២ កន្លងមកថ្មីៗនេះ ។

ដូចនេះស បញ្ជាក់ឲ្យឃើញថាគណបក្ស ប្រជាជនមិនត្រឹម​តែយកថវិការរបស់ជាតិ​ទៅបំរើឲ្យការ​ឃោសនារបស់គណបក្សខ្លួនប៉ុណ្ណោះទេ ថែមទាំងបានដើរសុំលុយពីប្រធានក្រុមហ៊ុននានា​ដើម្បី​យកមកបំរើការជុបលៀងរបស់ពួកក្រុមខ្លួន ។ ដូចនេះសូមបងប្អូនធ្វើការពិចារណា តើយើងគួរឲ្យ​មនុស្សរបៀបនេះ ឬក៏គណបក្សរបៀបហ្នឹង នៅគ្រប់គ្រងអំណាចដដែលឬមួយក៏យ៉ាងណា ?

ជាមួយគ្នានោះគណបក្ស សម រង្ស៊ី ធ្លាប់បានធ្វើការរិះគន់ហើយថា សម្លេងដែលគណបក្សប្រជា ជនទទួលបានក្នុងការបោះឆ្នោតនាពេលកន្លងមកមិនមែនជាសម្លេងដែលទទួលបានពីឆន្ទួះរបស់ ប្រជាពលរដ្ឋនោះទេ គឺជាសម្លេងទិញទឹកចិត្ត សម្លេងលួច និងសម្លេងបន្លំ ។ ដូចនេះនិយាយឲ្យខ្លី តំណែងដែលមេឃុំ-ចៅសង្កាត់ របស់គណបក្សប្រជាជនទទួលបានគឺជាតំណែងមេឃុំ-ចៅ​សង្កាត់លួច និងតំណែងមេឃុំ-ចៅសង្កាត់បន្លំ ៕