ពលរដ្ឋនេះសមបង្កើតតំបន់អបគមន៍ទេ?អ្នកភូមិប្រមា ក្រចេះ
ពោធិ៍សាត់ៈ សាលាដំបូងខេត្តពោធិ៍សាត់បានធ្វើការចោទប្រកាន់ពលរដ្ឋបួននាក់ រស់នៅភូមិកំពង់ក្ដី ឃុំក្រពើពីរ ស្រុកវាលវែង ពីបទរុករានហ៊ុមព័ទ្ធយកដីព្រៃរដ្ឋ បន្ទាប់ពីអាជ្ញាធរបានឃាត់ខ្លួនក្នុងយុទ្ធនាការបោសសម្អាត និងបង្ខំអ្នកភូមិឲ្យចាកចេញពីលំនៅដ្ឋានមុននេះ។ នេះបើតាមការអះអាងរបស់មន្ត្រីសាលាដំបូងខេត្ត។
លោក ប៉ង់ ចាន់សុយុទ្ធារា ព្រះរាជអាជ្ញារងអមតុលាការខេត្តបានឲ្យដឹងថា បច្ចុប្បន្នពលរដ្ឋទាំង៤នាក់នោះ បានបញ្ជូនទៅពន្ធនាគារហើយ ដើម្បីរង់ចាំសវនាការ។ លោកបន្តថា ៖ «យើងបានចោទប្រកាន់គាត់ពីបទរុករានហ៊ុមព័ទ្ធដីព្រៃរដ្ឋ។ បើយោងទៅតាមច្បាប់រដ្ឋបាលព្រៃឈើ ប្រសិនរកឃើញមានកំហុសមែនពួកគាត់អាចត្រូវជាប់ពន្ធនាគារពី ៥ ទៅ ១០ឆ្នាំ»។
លោកបន្តឲ្យដឹងថា មកដល់ពេលនេះមានពលរដ្ឋចំនួន៥នាក់ហើយ ដែលត្រូវចោទប្រកាន់ពីបទរុករានហ៊ុមព័ន្ធយកដីព្រៃរបស់រដ្ឋ បន្ទាប់ពីបានឃាត់ខ្លួនពីដំបូងនៅក្នុងខែមីនា ឆ្នាំ២០១២។
អ្នកស្រី លី ស៊ីនួន ភរិយាលោកឌុច ឌៀប ហៅ បុល ដែលត្រូវឃាត់ខ្លួននៅថ្ងៃទី១៦ កក្កដា បានឲ្យដឹងថា ការសម្រេចរបស់តុលាការលើករណីប្តីគាត់គឺជារឿងដែលអយុត្តិធម៌ ព្រោះគាត់មិនបានរស់នៅអនាធិបតេយ្យទេ។ អ្នកស្រីថា ៖ «ខ្ញុំសុំអំពាវនាវដល់សម្តេច ហ៊ុន សែន មេត្តាជួយពលរដ្ឋក្រីក្រពិតប្រាកដផង។ បើពួកយើងមានដីនោះ យើងមិនចាំបាច់ទៅរស់នៅក្នុងព្រៃទេ»។
អ្នកស្រីក៏សូមអង្វរទៅតុលាការសូមមេត្តាពិចារណាលើការចោទប្រកាន់ ប្តីគាត់នោះផង ព្រោះគាត់ ជាអតីតទាហានពិការ គាត់មិនដែលធ្វើអ្វីខុសច្បាប់ម្តងណាទេ។
លោក ចាន់ សុវេត មន្រ្តីស៊ើបអង្កេតជាន់ខ្ពស់របស់អាដហុកសង្កេតឃើញថា បន្ទាប់ពីចេញគោលការណ៍ចាស់សកម្មភាពថ្មីរបស់រាជរដ្ឋាភិបាល គេឃើញមានការចាប់ខ្លួនពលរដ្ឋដែលអះអាងជាម្ចាស់ដីជាបន្ត បន្ទាប់។
លោកថា៖ «តើការចាប់ ចោទប្រកាន់ពលរដ្ឋនោះ វាកើតឡើងដោយចេតនាឬយ៉ាងណា? អាជ្ញាធរគួរតែស៊ើបអង្កេតឲ្យស៊ីជម្រៅជាងនេះ មុននឹងចោទ ចាប់ពលរដ្ឋដាក់គុក ព្រោះវាជាការរំលោភសិទ្ធិពលរដ្ឋយ៉ាងធ្ងន់ធ្ងរ»។
នៅក្នុងយុទ្ធនាការរបស់សមត្ថកិច្ចចម្រុះខេត្តពោធិ៍សាត់ គិតចាប់ពីថ្ងៃទី១៦ ដល់ថ្ងៃទី១៧ ខែកក្កដាមក អាជ្ញាធរមានសមត្ថកិច្ចបានចម្រុះរើផ្ទះប្រជាពលរដ្ឋអស់ចំនួន ៥០០ ខ្នង និងបានចាប់ខ្លួនប្រជាពលរដ្ឋ៤នាក់ឃុំ ហើយនិងកំពុងស្វែងរកចាប់អ្នកតំណាងពលរដ្ឋបីនាក់ថែមទៀត ក្រោមការចោទប្រកាន់ពីបទ ចាប់ដីនៅអនាធិបតេយ្យ ទន្ទ្រានយកដីរដ្ឋខុសច្បាប់ និងប៉ុនប៉ងបង្កើតតំបន់អបគមន៍៕
No comments:
Post a Comment
yes