លោក សម រង្ស៊ី និងលោក កឹម សុខា ដែលព្រមព្រៀងធ្វើជាប្រធាន អនុប្រធានចលនាប្រជាធិបតេយ្យសង្រ្គោះជាតិកាលពីពេលថ្មីៗនេះ នឹងរួមគ្នាបង្កើតគណបក្សថ្មីមួយដើម្បីធ្វើការប្រកួតប្រជែងក្នុងការបោះឆ្នោតសកលឆ្នាំ២០១៣ខាងមុខ ដោយរក្សាទុកចាស់ គឺគណបក្សសមរង្ស៊ី និងសិទ្ធិមនុស្សនៅដដែល។
លោក កឹម សុខា ប្រធានគណបក្សសិទ្ធិមនុស្ស និងជាអនុប្រធានចលនាប្រជាធិបតេយ្យសង្រ្គោះជាតិបាននិយាយប្រាប់បណ្តាញព័ត៌មានក្នុងស្រុកថា បន្ទាប់ពីព្រមព្រៀងគ្នារវាងរូបលោក និងលោក សម រង្ស៊ី ប្រធានគណបក្សសមរង្ស៊ីកាលពីថ្ងៃទី១៧ កក្កដា កន្លងទៅនៅប្រទេសហ្វីលីពីន គណបក្សទាំងពីរនេះបានចាត់ក្រុមមន្រ្តីជំនាញជជែកគ្នាលើបញ្ហានយោបាយ បញ្ហាច្បាប់ ដើម្បីឈានទៅរកការច្របាច់បញ្ចូលគ្នា បង្កើតគណបក្សថ្មីមួយឲ្យបានមុនការបោះឆ្នោតឆ្នាំ២០១៣។ ហើយការបង្កើតគណបក្សថ្មីនេះ នឹងមិនរំលាយចោលគណបក្សចាស់ គឺគណបក្សសមរង្ស៊ី និងគណបក្សសិទ្ធិមនុស្សឡើយ ដោយរក្សានៅដដែល។ «យើងអត់រំលាយបក្សទេ គឺនៅតែជាគណបក្សសមរង្ស៊ី នៅតែជាគណបក្សសិទ្ធិមនុស្សដដែល។ យើងនឹងនាំគ្នាបង្កើតបក្សថ្មីមួយផ្សេងពីបក្សទាំងពីរហ្នឹង ដើម្បីចូលរួមការបោះឆ្នោត»។
លោក កឹម សុខា បាននិយាយដោយមានជំនឿថា គណបក្សថ្មីដែលបង្កើតឡើងនោះ នឹងទទួលបានសំឡេងឆ្នោតគាំទ្រកាន់តែច្រើនឡើង ព្រោះវាជាសំឡេងពីសមាជិកគណបក្សសិទ្ធិមនុស្ស និងគណបក្សសមរង្ស៊ីរួមគ្នា៕
No comments:
Post a Comment
yes