ភ្នំពេញៈ តំណាងអយ្យការពីថ្ងៃសុក្របានចុះអនុវត្តការសម្រេចរបស់តុលាការ ក្រុងភ្នំពេញលេខ០៩ញ ចុះថ្ងៃទី២៥ កក្កដា នៅទីស្នាក់ការគណបក្សនរោត្តមរណឫទ្ធិនៅភ្នំពេញ ហើយបានដកត្រាគណបក្ស ប្រគល់ឲ្យលោក សៅ រ៉ានី អគ្គលេខាធិការគណបក្សជាដើមបណ្ដឹង។
លោក គង់ សំសារ៉េត ព្រះរាជអាជ្ញារងអមតុលាការភ្នំពេញបានថ្លែងថា តុលាការភ្នំពេញ កាលពីរសៀលថ្ងៃទី២៧ ខែកក្កដា បានចុះអនុវត្តការសម្រេចលេខ ០៩ញ ចុះថ្ងៃទី២៥ កក្កដា ហើយដកយកត្រារបស់គណបក្សនរោត្ដមរណឫទ្ធិ ស្ថិតនៅក្នុងសង្កាត់បឹងកក់២ ខណ្ឌទួលគោក ប្រគល់ទៅឲ្យអគ្គលេខាធិការបក្សលោក សៅ រ៉ានី ដែលជាដើមបណ្ដឹង។
ព្រះរាជអាជ្ញារងរូបនេះបន្ថែមថា ការចុះដកយកត្រាគណបក្សនរោត្ដម រណឫទ្ធិ ប្រគល់ទៅឲ្យលោក សៅ រ៉ានី បានធ្វើឡើងយោងទៅលើការសម្រេចរបស់តុលាការភ្នំពេញ ចុះថ្ងៃទី ២៥កក្កដា ក្នុងគោលបំណងប្រគល់ត្រានេះឲ្យទៅ លោក សៅ រ៉ានី តាមសេចក្ដីសម្រេចពីតុលាការនិងពាក្យបណ្ដឹងរបស់លោក។
លោកព្រះរាជអាជ្ញាបានប្រាប់ភ្នំពេញ ប៉ុស្តិ៍ក្នុងបទសម្ភាសតាមទូរស័ព្ទថា៖ «តុលាការបានអនុវត្តតាមការសម្រេចរបស់តុលាការចុះថ្ងៃទី២៥ ខែកក្កដា ចំពោះជម្លោះនៅក្នុងគណបក្សនរោត្ដមរណឫទ្ធិរួចហើយ។ តុលាការក៏បានដកយកត្រាពីគណបក្សជាចុងបណ្ដឹង ហើយបានប្រគល់វាទៅឲ្យលោក សៅ រ៉ានី ដែលជាដើមបណ្ដឹងហើយដែរ»។
លោក ប៉ែន សង្ហា អ្នកនាំពាក្យគណបក្សនរោត្ដម រណឫទ្ធិមានប្រសាសន៍ថា អំឡុងពេលព្រះរាជអាជ្ញារងលោក គង់ សំសារ៉េត ចុះអនុវត្តដីការក្សាការពាររបស់តុលាការពីថ្ងៃសុក្រកន្លងទៅនេះ គណបក្សមិនបានជំទាស់នឹងការសម្រេចនេះទេ។ លោកប្រធានស្ដីទី គណបក្សនរោត្ដម រណឫទ្ធិឈឹម សៀកឡេង បានផ្ដល់ត្រាគណបក្សទៅឲ្យលោក សៅ រ៉ានី តាមការសម្រេចនោះរួចហើយ។
លោកថ្លែងថា៖ «យើងបានគោរពតាមការសម្រេចរបស់តុលាការ។ យើងមិនបានតវ៉ាទេ ហើយបានយល់ព្រមប្រគល់ត្រានេះទៅឲ្យលោក សៅ រ៉ានី តាមតុលាការសម្រេចផងដែរ»។
លោក សៅ រ៉ានី អគ្គលេខាធិការមានប្រសាសន៍ថា លោកមានសេចក្ដីរីករាយ ដែលតុលាការបានចេញដីការក្សាការពារតាមការស្នើរបស់លោក និងបានចុះអនុវត្តសេចក្ដីសម្រេចនេះ។
លោកប្រាប់ភ្នំពេញ ប៉ុស្តិ៍ពីថ្ងៃម្សិលមិញថា៖ «ខ្ញុំជាជនរងគ្រោះម្នាក់ ក្នុងចំណោម៦នាក់ ដែលត្រូវប្រធានគណបក្សដកហូតតួនាទីនិងភារកិច្ចនេះ។ ខ្ញុំមានសេចក្ដីរីករាយដែល តុលាការសម្រេចចេញដីការក្សាការពារតាមការស្នើសុំរបស់ខ្ញុំ ហើយបានដកយកត្រាប្រគល់ឲ្យខ្ញុំ»។
លោកបន្តថា ត្រាគណបក្សកំពុងរក្សាទុកប្រើប្រាស់សម្រាប់ផលប្រយោជន៍បក្សផ្នែក រដ្ឋបាលគណបក្សនៅក្នុងសង្កាត់បឹងកក់២ ខណ្ឌទួលគោក ក្នុងរាជធានីភ្នំពេញ៕
No comments:
Post a Comment
yes