រូបភាព ៖ ម៉ី សុភក្ត្រា / ជំនួប មេដឹកនាំ គណបក្សសមរង្ស៊ី និងគណបក្សសិទ្ធិមនុស្ស ក្នុងសន្និសីទ សារព័ត៌មាន តាម វីដេអូ មួយ កាលពីថ្ងៃទី១៧ ខែកក្កដា ឆ្នាំ២០១២ នៅ ទីស្នាក់ការ គណបក្សសមរង្ស៊ី
(ថ្ងៃទី១៧ ខែកក្កដា ឆ្នាំ២០១២) ៖ ថ្លែង តាមរយៈ វិដេអូ បន្តផ្ទាល់ចេញពី រដ្ឋធានីម៉ានីល ប្រទេសហ្វលីពីន មេដឹកនាំគណបក្សប្រឆាំងពីរ គឺ ឯកឧត្តម សម រង្ស៊ី (គណបក្សសមរង្ស៊ី) និង ឯកឧត្តម កឹម សុខា (គណបក្សសិទ្ធិមនុស្ស) បានប្រកាសជាសាធារណៈម្តងទៀតថា គណបក្សទាំងពីរនេះ បានឯកភាពគ្នា បង្កើតគណបក្សថ្មី មួយឈ្មោះ "ចលនាប្រជាធិបតេយ្យសង្រ្គោះជាតិ" ក្នុងពេលឆាប់ៗ។
ការបង្កើតគណបក្សថ្មីនេះ ត្រូវបានប្រធានគណបក្សទាំងពីរប្រើ ភាសាដូចគ្នាថា ជាការប្រមូលផ្តុំកម្លាំងខ្មែរស្នេហាជាតិ និងកម្លាំងប្រជាធិបតេយ្យជាធ្លុងមួយ ដើម្បីបំពេញបេសកម្មកម្មសង្រ្គោះជាតិ។ ជាភាសារួមគ្នាដដែល ចំណងសម័្ពន្ធភាពមួយនេះ មានទស្សនៈវិស័យ ផ្លាស់ប្តូររបបនយោបាយបច្ចុប្បន្ន ផ្លាស់ប្តូរសមាសភាពគណៈកម្មាធិការជាតិរៀបចំការបោះឆ្នោត កែតម្រូវនីតិវិធីបោះឆ្នោតដ៏ស្មុគស្មាញ កែទម្រង់ប្រព័ន្ធតុលាការ និងពង្រឹងកិច្ចសហការរវាងប្រធាន និងសមាជិកជាប់ឆ្នោត មកពីគណបក្សទាំងពីរ ដើម្បីផ្លាស់ប្តូររបៀបដឹកនាំឃុំ សង្កាត់ឱ្យបានប្រសើរនៅថ្នាក់មូលដ្នាន។
តាមការអះអាងរបស់ ឯកឧត្តម សមរង្ស៊ី តាមវិដេអូ បន្តផ្ទាល់ រចនាសម័្ពន្ធថ្នាក់ដឹកនាំ របស់ គណបក្សនិមិត្តថ្មីនេះ លោក សម រង្ស៊ី នឹងបានឋានៈជា ប្រធានគណបក្ស ចំណែកលោក កឹម សុខា ជាអនុប្រធានគណបក្ស។ ទោះបីជាយ៉ាងនេះក្តី មេដឹកនាំ គណបក្សប្រឆាំងទាំងពីរ ព្យាយាមមិនអត្ថាធិប្បាយ ដល់កាលបរិច្ឆេទជាក់លាក់ក្នុងការបង្កើតរូបរាង គណបក្សចលនាប្រជាធិបតេយ្យសង្គ្រោះជាតិទេ។
ម្ចាស់ឆ្នោត នៅចាំបានថា ប្រធានគណបក្សសមរង្ស៊ី និងប្រធានគណបក្សសិទ្ធិមនុស្ស ធ្លាប់បានប្រកាស ចាប់ដៃចុះហត្ថលេខារួមគ្នា្ម្តងរួចមកហើយ កាលពីថ្ងៃទី១៥ ខែមករា ឆ្នាំ២០០៩ ដើម្បីបង្កើតជា សម្ព័ន្ធភាពអ្នកប្រជាធិបតេយ្យមួយ ក៏ប៉ុន្តែសម្ព័ន្ធភាពនោះមិនបានលូតលាស់ធំពេញវ័យទេ៕
No comments:
Post a Comment
yes