ក្រុមដែលតុលាការចោទជាសមាជិកចលនាសុវណ្ណភូមិ
ពេលនាំឡើងសវនាការពីខែតុលាឆ្នាំមុន
ភ្នំពេញៈ ក្រុមគ្រួសារនិងមេធាវីការពារក្តីរបស់បុរសម្នាក់ដែលត្រូវបានផ្តន្ទាទោសឲ្យជាប់ពន្ធនាគារ១៥ឆ្នាំ កាលពីឆ្នាំមុន ដោយសារតែជាសមាជិកនៃក្រុមប្រដាប់អាវុធប្រឆាំងរដ្ឋាភិបាលហៅថា ចលនាកងទ័ពសុវណ្ណភូមិ បានស្នើសុំឲ្យសាលាឧទ្ធរណ៍ដោះលែងបុរសម្នាក់នោះឲ្យមានសេរីភាព កាលពីម្សិលមិញ។
លោក វី សុទ្ធ អាយុ ៣៤ ឆ្នាំ ជាកូនប្រុសរបស់លោក ផ្លត វី អាយុ ៦៣ ឆ្នាំ បានថ្លែងថា ឪពុកលោកជាជនគ្មានកំហុស ហើយត្រូវគេល្បួងបញ្ចុះបញ្ចូលដោយលោក ផេង ឌីម៉ា មន្រ្តីជាន់ខ្ពស់នៅទីស្តីការគណៈរដ្ឋមន្រ្តី ឲ្យបន្លំខ្លួនជ្រៀតចូលក្នុងចលនាកងទ័ពសុវណ្ណភូមិ ដើម្បីប្រមូលព័ត៌មានមកឲ្យរដ្ឋាភិបាលកម្ពុជា។
លោក វី សុទ្ធ បានរៀបរាប់ប្រាប់ ភ្នំពេញ ប៉ុស្តិ៍ថា៖ «គាត់មិនមែនជាជនក្បត់ជាតិនោះទេ ប៉ុន្តែ គាត់ត្រូវបានចោទប្រកាន់ដោយអាជ្ញាធរមានសមត្ថកិច្ចកម្ពុជា ហើយត្រូវផ្តន្ទាទោសឲ្យជាប់ពន្ធនាគារចំនួន ១៥ ឆ្នាំ»។ លោកបានបញ្ជាក់ថា ឪពុករបស់លោក ដែលជាអតីតគ្រូថ្នាំបុរាណ មានកូនប្រាំបួននាក់ត្រូវថែទាំ។ «ដើម្បីរកយុត្តិធម៌ឲ្យគាត់ ខ្ញុំសូមសាលាឧទ្ធរណ៍យករឿងក្តីរបស់គាត់បើកសវនាការឲ្យ បានឆាប់ ហើយរកយុតិ្តធម៌ឲ្យគាត់ និងដោះលែងឲ្យមានសេរីភាព»។
លោក ផ្លត វី ជាមនុស្សម្នាក់ក្នុងចំណោម ៦នាក់ ដែលត្រូវបានផ្តន្ទាទោសកាលពីខែតុលា ឆ្នាំមុន ពីបទបង្កើតចលនាប្រដាប់អាវុធខុសច្បាប់។ នៅពេលនោះ លោក ជា សារ៉ាន់ មេដឹកនាំក្រុមនេះបានថ្លែងថា ក្រុមនេះបានបង្កើតឡើងនៅពេលមន្រ្តីរដ្ឋាភិបាលតៃវ៉ាន់ បានផ្តល់ប្រាក់ ២០លានដុល្លារអាមរិក ដើម្បីផ្តួលរំលំរដ្ឋាភិបាលកម្ពុជា ជាការអះអាងដែលគ្មានភស្តុតាង។
លោក ជា សុភី មេធាវីការពារលោក ផ្លត វី បានបដិសេធថា កូនក្តីរបស់លោក មិនបានពាក់ព័ន្ធនឹងក្រុមនេះទេ។
លោកលើកឡើងថា៖ «កូនក្តីខ្ញុំត្រូវចាត់តាំងដោយមន្រ្តីរដ្ឋាភិបាលកម្ពុជាឲ្យ ចូលរួម និងធ្វើការជាមួយនឹងចលនាប្រដាប់អាវុធនេះ ដើម្បីប្រមូលព័ត៌មានពីសកម្មភាពរបស់ចលនា និងរាយការណ៍ជូនរដ្ឋាភិបាល»។
លោកបានសង្កត់ធ្ងន់លើភាពគ្មានកំហុសរបស់លោក ផ្លត វី ហើយបានអំពាវនាវឲ្យតុលាការឧទ្ធរណ៍ពន្លឿនសវនាការ។
លោក ផ្លត វី និយាយផ្ទាល់ កាលពីខែតុលា ឆ្នាំ២០១១ ថា ការចូលរួមចលនារបស់លោកបានដឹង និងឯកភាពយល់ព្រមពីលោក ផេង ឌីម៉ា។ លោក ផេង ឌីម៉ា មិនអាចទាក់ទងបានទេ កាលពីម្សិលមិញ ហើយមន្រ្តីសាលាឧទ្ធរណ៍ក៏មិនអាចទាក់ទងបានដែរ។ លោកង៉ែត សារ៉ាត អគ្គព្រះរាជអាជ្ញារងសាលាឧទ្ធរណ៍ បានបដិសេធមិនផ្តល់ការអត្ថាធិប្បាយរឿងក្តីនេះ៕
No comments:
Post a Comment
yes