ភ្នំពេញ ៖ អេស្កាវទ័រមួយគ្រឿងនិងត្រាក់ទ័របីគ្រឿងរបស់ក្រុមហ៊ុនNEOVISION ត្រូវបានផ្នែករដ្ឋបាលព្រៃឈើស្រុកវាលវែងសហការជាមួយស៊ីអាយ និង បញ្ជាផ្ទាល់របស់លោកព្រះរាជអាជ្ញាខេត្តធ្វើការចាប់បាន ខណៈពេលដែលពួកគេកំពុងធ្វើសកម្មភាពឈូសឆាយគំរបដីព្រៃរបស់រដ្ឋគ្មានច្បាប់អនុញ្ញាតកាលពីថ្ងៃទី ១៦ ខែ កក្កដា ឆ្នាំ២០១២ វេលាម៉ោង ១២ ថ្ងៃត្រង់ ស្ថិតនៅចំណុចអូពងមាន់ ភូមិ ស្ទឹងថ្មី ឃុំ ប្រមោល ស្រុក វាលវែង ខេត្តពោធិ៍សាត់។
បើតាមលោក ថន ប៊ុនថេត នាយផ្នែករដ្ឋបាលព្រៃឈើ វាលវែងឲ្យកម្ពុជាថ្មី ដឹងថា ក្រុមហ៊ុន NEOVISOIN នេះ គឺគេបានយកគ្រឿងចក្រឈ្នួលឈូសឆាយតាំងពីខែ កុម្ភៈ ឆ្នាំ ២០១២មកម្ល៉េះ ដោយគេថាមានច្បាប់អនុញ្ញាតត្រឹមត្រូវ ដោយឈូសឆាយដីព្រៃរបស់រដ្ឋបានផ្ទៃដី ៦២,៥២ ហិកតា ខណៈនោះសមត្ថកិច្ចរបស់លោករួមជាមួយកម្លាំងស៊ីអាយ ក៏បានត្រួតពិនិត្យច្បាប់ ប៉ុន្តែខាងក្រុមហ៊ុននេះ ចេះតែពន្យារពេល ដោយយកលេសនេះលេសនោះ ទំនងជាគ្មានច្បាប់អនុញ្ញាតត្រឹមត្រូវ ទើបលោកដាក់ពាក្យបណ្ដឹងទៅតុលាការ ដើម្បីសុំសហការចាត់វិធានការតាមផ្លូវច្បាប់តែម្ដង។ លោក ថនប៊ុនថេត បន្តថា ពេលកម្លាំងរដ្ឋបាលព្រៃឈើ និង កម្លាំងស៊ីអាយចុះទៅ និង មានការបញ្ជាផ្ទាល់របស់លោក តន់ សីហតេជៈ ព្រះរាជអាជ្ញាខេត្តធ្វើការឃាត់ខ្លួន និងរឹបអូសយកគ្រឿងចក្រ ទាំងនោះមករក្សាទុកនៅស្នាក់ការអាយស៊ីជាបណ្ដោះអាសន្ន ។ ពួកគេដែលធ្វើការក្រុមហ៊ុននោះឆ្លើយថា គឺមិនដឹងទេព្រោះថៅកែរបស់គេទៅកូរ៉េបាត់ទៅហើយ ៗឲ្យ ពួកគេយកគ្រឿងចក្រឈូសឆាយតំបន់ដីព្រៃនេះ។
លោក តន់ សីហតេជៈ ព្រះរាជអាជ្ញាខេត្ត បានប្រាប់កម្ពុជាថ្មីថា ក្រុមហ៊ុនខាងលើ ពុំមានច្បាប់ទម្លាប់ត្រឹមត្រូវឡើយ គឺធ្វើការបំពានដីព្រៃរបស់រដ្ឋ ហើយយើងនឹងធ្វើការកិច្ចការនេះបន្តទៀត មិនឲ្យក្រុមហ៊ុន នេះឈូសឆាយអនាធិបតេយ្យបែបនេះទៀតឡើយ។ ការឈូសឆាយកន្លងមកបានផ្ទៃដីជាង ៦២ ហិកតា គឺដកទូជាសម្បត្តិរដ្ឋវិញ ដោយឡែកសម្ភារៈគ្រឿងចក្រនៅសេលសល់នោះយើងនឹងបន្តឲ្យផ្នែកជំនាញធ្វើការស្រាវជ្រាវដើម្បីដកហូតបន្តទៀត ព្រោះក្រុមហ៊ុនខាងលើនេះ បំពានច្បាប់រដ្ឋទាំងស្រុង៕
No comments:
Post a Comment
yes