បន្ទាប់ពីមានបាតុភាពជម្លោះដីធ្លីដ៏ក្តៅគគុកមួយ រវាងអាជ្ញាធរមានសមត្ថកិច្ច
ជាមួយនិងប្រជាពលរដ្ឋស្ថិតនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះកាលពីពេលកន្លងទៅនេះ
ពីបទបង្កើតតំបន់អបគមន៏ ។ ជាថ្មីម្តងទៀតនៅលើទឹកដីនៃខេត្តពោធិ៏សាត់
ក៏មានករណីនៃការចោទប្រកាន់ដូចគ្នានេះមកលើប្រជាពលរដ្ឋផងដែរ ។
សូមជំរាបថាយ៉ាងហោចណាស់មានផ្ទះរបស់ប្រជាពលរដ្ឋជាង៥០០ខ្នង
ដែលស្ថិតនៅចំណុចស្រែយក្ស ភូមិកំពង់ក្ដី
ឃុំក្រពើពីរ ស្រុកវាលវែង ខេត្តពោធិ៏សាត់ ត្រូវបានរុះរើ និងពលរដ្ឋម្នាក់
ត្រូវបានកម្លាំងចម្រុះធ្វើការឃាត់ខ្លួន
នៅខណៈពេលដែលអាជ្ញាធរបានបើកយុទ្ធនាការបណ្តេញពលរដ្ឋឲ្យចាកចេញពីលំនៅដ្ឋានរបស់ពួកគេ
ដោយចោទប្រកាន់ពីបទរស់នៅអនាធិបតេយ្យ ទន្ទ្រានយកដីរដ្ឋខុសច្បាប់
និងបង្កើតតំបន់អបគមន៏ ។
តំណាងប្រជាពលរដ្ឋចំនួន៦០០គ្រួសារលោក
ជិន វន ដែលកំពុងតែគេចខ្លួនពីការតាមចាប់របស់អាជ្ញាធរ
ដែលបានចោទពីបទបំផុសឲ្យពលរដ្ឋ ចូលទន្ទ្រានយកដីរដ្ឋ និងបង្កើតតំបន់អបគមន៏នោះបានប្រាប់សារព័ត៌មានក្នុងស្រុកឲ្យដឹងថា
អាជ្ញាធរចម្រុះដែលមានប៉ូលិស
ប៉េអឹមប្រមាណ៥០នាក់ បានចុះមករុះរើ
បង្ខំឲ្យពលរដ្ឋចាកចេញពីលំនៅដ្ឋាន និងតាមស្វែងរកចាប់ខ្លួនពួកលោក ។ លោក ជិន វន
ដែលជាតំណាងរបស់ប្រជាពលរដ្ឋចំនួន៦០០គ្រួសារ នៅក្នុងភូមិកំពង់ក្ដី ឃុំក្រពើពីរ ស្រុកវាលវែងបានបន្តថា លោកធ្វើអ្វីៗដើម្បីឲ្យប្រជាជនក្រីក្រមានដីរស់នៅ
ហើយលោកធ្វើគឺអនុវត្តទៅតាមច្បាប់ត្រឹមត្រូវមិនមានការក្លែងបន្លំអ្វីឡើយ ។ ហើយបែរជាគេចោទលោកថាបង្កើតតំបន់អបគមន៏ប្រឆាំងនឹងគេទៅវិញ ។ លោក ជិន វន បាននិយាយទាំងឆ្ងល់ថា តើលោកមានអ្វីធ្វើអបគមន៏នោះ? ហើយលោកក៏មិនបានធ្វើដូចជាការចោទប្រកាន់ពីសំណាក់អាជ្ញាធរនោះដែរ
។
លោក ជិន វន បានឲ្យដឹងទៀតថា
មុននឹងលោកចូលមករស់នៅក្នុងទីតាំងខាងលើនេះ ដែលជាដីរបស់ជនជាតិភាគតិចរស់នៅកាលពីមុននោះ លោកបានស្នើសុំទៅលោក ហ៊ុន សែន នាយករដ្ឋមន្រ្តី រដ្ឋសភា អាជ្ញាធរស្រុក ឃុំ
ដើម្បីឲ្យពលរដ្ឋចំនួន២០៣ គ្រួសាររស់នៅលើផ្ទៃដីចំនួន៧០០០ហិកតា នៅក្នុងឆ្នាំ២០០៨ហើយលោកមេឃុំ និងអភិបាលស្រុក
ក៏បានយល់ព្រមតាមសំណើរបស់លោកផងដែរ ។
លោក ជិន វន បានបន្តរទៀតថា ដោយសារតែការរស់នៅរបស់ពលរដ្ឋទាំងនោះយូរទៅ ក៏បានធ្វើឲ្យពលរដ្ឋមួយចំនួនផ្សេងទៀត ចូលមករស់នៅបន្ថែមជាហូរហែគឺចាប់តាំងពីឆ្នាំ២០០៩ រហូតដល់ពេលបច្ចុប្បន្ននេះ ដែលធ្វើឲ្យចំនួនប្រជាពលរដ្ឋមានការកើនឡើងរហូតដល់ចំនួន៦០០គ្រួសារ ។ លោក ជិន វន បានឲ្យដឹងទៀតថា នៅក្នុងយុទ្ធនាការរបស់អាជ្ញាធរចម្រុះទាំងនោះ គឺបានចាប់ធ្វើឡើងតាំងពីថ្ងៃចន្ទមកម្លេះ ហើយនៅក្នុងយុទ្ធនាការរបស់ពួកគេនោះ
អាជ្ញាធរក៏បានចាប់ខ្លួនពលរដ្ឋម្នាក់ដែលជាជនពិការផងដែរ
និងកំពុងតែស្វែងរកតាមចាប់ខ្លួនពួកលោកចំនួនបីនាក់បន្ថែមទៀត ។
ចំណែកឯលោក ប៊ុល ស៊ុន
អាយុ៦១ឆ្នាំ ដែលត្រូវអាជ្ញាធរចោទប្រកាន់ពីបទ បង្កើតតំបន់អបគមន៏ និងកំពុងតែតាមចាប់ខ្លួនផងដែរនោះ
ក៏បានថ្លែងប្រាប់ស្រដៀងទៅនិងលោក
ជិន វន ថា
កាលពីថ្ងៃច័ន្ទ គឺមានកម្លាំងចម្រុះប្រមាណជា៥០នាក់ រួមជាមួយនិងកម្មករប្រមាណជាង២០០នាក់ ដែលត្រូវបានអាជ្ញាធរជួលមកឲ្យរុះរើផ្ទះរបស់ពលរដ្ឋទាំងអស់នៅតំបន់ស្រែយក្ស ភូមិកំពង់ក្ដី ឃុំក្រពើពីរ ស្រុកវាលវែង
ដោយក្រុមកម្មករទាំងនោះទទួលបានប្រាក់ឈ្នួលក្នុងម្នាក់ចំនួន២ម៉ឺនរៀល
ដើម្បីយកតំបន់នោះទៅលក់ឲ្យឈ្មួញ ។ លោក ប៊ុន ស៊ុន
បន្តរថាទាំងអស់នេះគឺជាល្បិចរបស់លោក ឆេ ឈីវ ដែលជាអភិបាលស្រុកវាលវែង ក្នុងការប្រព្រឹត្តអំពើពុករលួយដើម្បីផលប្រយោជន៏របស់ខ្លួន
និងបក្ខពួក បែជាមកចោទប្រកាន់ពួកគាត់ដែលជាពលរដ្ឋស្លូតត្រង់ ថាមកបង្កើតតំបន់អបគមន៏ទៅវិញ
។ លោកថាឯណាទៅច្បាប់ស្រុកខ្មែរ មានទេភាពយុត្តិធម៌សម្រាប់ប្រជាពលរដ្ឋក្រីក្រទុនខ្សោយនោះ
! ។
លោក ជិន វន និងលោក
ប៊ុន ស៊ុន បានធ្វើការបដិសេធថា ពួកលោកមិនបានញុះញង់ឲ្យប្រជា ពលរដ្ឋចូលមករស់នៅក្នុងតំបន់ខាងលើនេះដោយខុសច្បាប់
និងបង្កើតតំបន់អបគមន៏ស្អីនោះទេ គឺពួកគាត់បានចូលមករស់នៅតំបន់ខាងលើនេះគឺមានការស្នើសុំត្រឹមត្រូវ
ហើយការរស់នៅរបស់ពួកគាត់គឺមិនមែនទើបតែមកនៅនោះទេ គឺពួកគាត់បានចូលមករស់នៅទីនេះតាំងពីឆ្នាំ២០០៨មកម្លេះ
។
គួរជំរាបជូនផងដែរថា កាលពីថ្ងៃទី១៦
ខែឧសភា ឆ្នាំ២០១២នេះ កងកម្លាំងចម្រុះប្រមាណ១០០០នាក់
បានចុះទៅអនុវត្តវិធានការរដ្ឋបាល ដើម្បីបង្ខំឲ្យពលរដ្ឋនៅក្នុងភូមិប្រម៉ា ឃុំកំពង់ដំរី ស្រុកឆ្លូងខេត្តក្រចេះ
ឲ្យចាកចេញពីលំនៅដ្ឋានរបស់ពួកគេ ដោយចោទប្រកាន់ថា រស់នៅអនាធិបតេយ្យ និងបង្កើតតំបន់អបគមន៏ ហើយនៅក្នុងហេតុការណ៏នោះ អាជ្ញាធរបានបាញ់យុវតីម្នាក់អាយុ១៤ឆ្នាំស្លាប់នៅនឹងកន្លែង និងឃាត់ខ្លួនមនុស្សចំនួន៨នាក់ និងមេខ្លោងចំនួន៥នាក់
ដែលត្រូវបានចោទប្រកាន់កំពុងតែរត់គេចខ្លួន ដែលមុខសញ្ញាធំគឺ ប៊ុន
រដ្ឋា ជាមួយគ្នានោះលោក ម៉ម ស៊ូណង់ដូ ប្រធានសមាគមន៏អ្នកប្រជាធិបតេយ្យ
និងជានាយកវិទ្យុ សំបុកឃ្មុំ ក៏ត្រូវបានអាជ្ញាធរធ្វើការចាប់ខ្លួន និងដាក់ឃុំនៅពន្ធនាគារព្រៃស
ផងដែរ ដោយត្រូវបានចោទពីបទជាប់ពាក់ព័ន្ធទៅនិងករណីបង្កើតតំបន់អបគមន៏នៅក្នុងភូមិប្រម៉ា
ឃុំកំពង់ដំរី ស្រុកឆ្លូង ខេត្តក្រចេះនេះ ។
អ្នកសង្កេតការណ៏បានលើកឡើងថា គេចាំមើលថាតើថ្នាក់លើនិងដោះស្រាយករណីខាងលើនេះ
ជូនប្រជាពលរដ្ឋដោយរបៀបណា ។ ហើយលោក
ភួង សុធា មន្ត្រីសម្របសម្រួលសមាគមសិទ្ធិ
មនុស្សអាដហុក ប្រចាំខេត្តពោធិ៏សាត់ បានឲ្យដឹងថា បើពិនិត្យតាមឯកសារគឺពលរដ្ឋបានស្នើសុំរស់នៅក្នុងតំបន់នោះតាំងពីឆ្នាំ២០០៨
មកម្លេះដូចអ្វីដែលជាការលើកឡើងរបស់ពួកគាត់ ។ លោកថាទង្វើរបស់អាជ្ញាធរ
ក្នុងការបណ្តេញពលរដ្ឋចេញពីដីធ្លីនៅតំបន់ស្រែយក្ស ភូមិកំពង់ក្ដី
ឃុំក្រពើពីរ
ស្រុកវាលវែង ខេត្តពោធិ៏សាត់ គឺបានធ្វើផ្ទុយទៅនឹងអនុសាសន៏របស់លោកនាយករដ្ឋមន្ត្រី ហ៊ុន សែន ដែលថារាល់ទំនាស់ដីធ្លី
មិនត្រូវចាប់ពលរដ្ឋនោះទេ តែអាជ្ញាធរបានចាប់ពលរដ្ឋ ហើយរុះរើផ្ទះពលរដ្ឋអស់រលីង។
លោកបញ្ជាក់ថា បើអាជ្ញាធរចោទថាប្រជាពលរដ្ឋរស់នៅខុសច្បាប់លើដីរដ្ឋ និងបង្កើតតំបន់អបគមន៏ ហេតុអីក៏មិនហាមពលរដ្ឋ
នៅពេលពួកគាត់បានដាក់ពាក្យស្នើសុំនោះតែម្តងទៅ
ហេតុអ្វីក៏ទើបមកចាត់ការនៅពេលនេះទៅវិញ ៕
No comments:
Post a Comment
yes