ឡានដឹកឈើនៅខេត្តសៀមរាប (រូបថត បូ សាវី)
ពលរដ្ឋនៅស្រុកបន្ទាយស្រី លោក ដួង ឌើម ប្រាប់សំឡេងប្រជាធិបតេយ្យ VOD នៅថ្ងៃនេះថា សកម្មភាពដឹកជញ្ជូនឈើប្រណិតនេះ កើតមានទាំងយប់ទាំងថ្ងៃ នៅតាមបណ្ដោយផ្លូវជាតិលេខ៦៧ ដោយមានការដឹកតាមរថយន្ដស៊េរីទំនើបៗ ចេញពីស្រុកអន្លង់វែង ខេត្ដឧត្ដរមានជ័យ យកទៅលក់នៅខេត្ដសៀមរាប និងខេត្ដផ្សេងៗទៀត។ លោកបន្ដថា រីឯព្រៃឈើនៅលើភ្នំគូលេន ទទួលរងការកាប់បំផ្លាញពីសំណាក់យោធា ស្ទើរតែក្លាយជាវាលរហោឋានទៅហើយ។ ពលរដ្ឋដដែល អះអាងថា សមត្ថកិច្ចជំនាញដាក់បុស្តិ៍យាមកាមគ្រប់ទីកន្លែង តែពុំបានធ្វើការទប់ស្កាត់ទេ បង្រ្កាបបានតែអ្នករកស៊ីដឹកអុស និងធ្យូងតិចតួចប៉ុណ្ណោះ៖”រាល់ថ្ងៃគេប្រើរថយន្តទំនើបៗ ដឹកឈើលេខ១ច្រើនប្រភេទ LEXUS ច្រើន Camry ពួកខ្ញុំសង្កេតឃើញត្រង់ចំនុចភូមិក្រាំងរមាស ចំនុចក្បាលស្ពានព្រះវិហារ យកគូលេន មកពីព្រៃផ្អាកចេញច្រកណឹងខ្លាំង”។
ពលរដ្ឋម្នាក់ទៀតនៅក្រុងសៀមរាប លោក សារ៉េត បានរិះគន់នាយខណ្ឌរដ្ឋបាលព្រៃឈើ លោក ទា គឹមសុទ្ធ ខ្លាំងៗថា បានឃុបឃិតស៊ីសំណូកសូកប៉ាន់ជាមួយឈ្មួញទុច្ចរិត មន្ដ្រីយោធា មន្ដ្រីបរិស្ថាន និងជំនាញពាក់ព័ន្ធមួយចំនួនទៀត ដឹកឈើខុសច្បាប់ នៅក្នុងខេត្ដសៀមរាប។ លោកថា នៅពេលដឹកឈើដាក់ដល់ក្រុងសៀមរាប បានដឹកចែកចាយបន្ដតាមរ៉ឺម៉ក គោយន្ដយ៉ាងអនាធិបតេយ្យ ។
VOD នៅថ្ងៃនេះ មិនអាចទាក់ទង លោក ទា គឹមសុទ្ធ នាយខណ្ឌរដ្ឋបាលព្រៃឈើខេត្ដសៀមរាប ដើម្បីបំភ្លឺជុំវិញការលើកឡើងរបស់ប្រជាពលរដ្ឋបានទេ ដោយឲ្យអ្នកយកព័ត៌មាន VOD ទៅជួបដល់កន្លែងធ្វើការរបស់លោក៖”បងអាចមកជួបខ្ញុំនៅប៊ុយរូបានករណីនេះ ករណីដឹកជញ្ជូនជើងក្រញូងឲ្យមន្ត្រីណាបងឲ្យមកជួបខ្ញុំនៅប៊ុយរូ” ។
ចំណែកឯអភិបាលខេត្តសៀមរាប លោក សូ ភារិន្ទ មិនអាចសុំការអត្ថាធិប្បាយបានលើបញ្ហានេះនៅឡើយទេ។
ទាក់ទងនឹងបញ្ហានេះ មន្រ្ដីពង្រឹងអំណាចសហគមន៍នៃមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ យល់ឃើញថា មន្ដ្រីរដ្ឋបាលព្រៃឈើមានចេតនាលាក់បាំងការពិត ដោយសារមិនបានបង្ក្រាបបទល្មើស និងក្រុមមន្ដ្រីទាំងនោះ ដែលបានឃុបឃិតគ្នាជាមួយឈ្មួញទុច្ចរិត ៖”សមត្ថកិច្ចពិសេសរដ្ឋបាលព្រៃឈើតែម្ដងគាត់អត់អាចឆ្លើយរួចទេ ព្រោះយើងមើលឃើញរាល់ថ្ងៃ មិនថាតែប្រជាពលរដ្ឋ មិនថាតែសង្គមស៊ិវិល ឬ មួយក៏អ្នកណាមួយទេក៏គេអាចឃើញ ហើយដឹងលឺផ្ទាល់តែម្ដងថា ការដឹកជញ្ជូនឈើប្រណិតក្ដី ឈើធម្មតាក្ដី ដែលជាប្រភេទបទល្មើសព្រៃឈើកើតឡើងបានលុះត្រាណាតែមានការឃុបឃិតគ្នាពីមន្ត្រីជំនាញជាពិសេសមន្ត្រីរដ្ឋបាលព្រៃឈើតែម្ដង”។
លោកគូសបញ្ជាក់ថា ដើម្បីបង្រ្កាបបទល្មើសដឹកជញ្ជូនឈើខុសច្បាប់នេះ ឲ្យមានប្រសិទ្ធិភាពពិតប្រាកដ លុះត្រាណាតែរដ្ឋាភិបាលមានចេតនាបង្រ្កាបដល់មន្រ្ដីពាក់ព័ន្ធ និងក្រុមអ្នកធ្វើសកម្មភាពដឹកឈើខុសច្បាប់ទាំងនោះ។ លោកបន្ថែមថា បទល្មើសព្រៃឈើដែលកើតមានឡើងនោះ បណ្ដាលពីមន្ដ្រីរដ្ឋបាលព្រៃឈើ ដោះលែងជនដែលបានប្រព្រឹត្តឲ្យរួចខ្លួន៕
No comments:
Post a Comment
yes