ក្រុមអ្នកភូមិជាច្រើននាក់មកពីឃុំចែងមានជ័យ ស្រុកបាណន់ ខេត្តបាត់ដំបង បាននាំគ្នាតវ៉ាសុំឲ្យតុលាការខេត្តបាត់ដំបង ដោះលែងអ្នកភូមិចំនួន ៦នាក់ ដែលសមត្ថកិច្ចប៉ូលិសចាប់ខ្លួនតាមដីកាតុលាការខេត្តបាត់ដំបង ទាក់ទិននឹងករណីទំនាស់ដីធ្លី។
១៩-កក្កដា-២០១២៖ សមត្ថកិច្ចប៉ូលិសព្យាយាមហាមឃាត់ពលរដ្ឋមិនឲ្យធ្វើដំណើរទៅតុលាការខេត្តបាត់ដំបង។
ប៉ុន្តែ គម្រោងការលើកគ្នាមកតវ៉ា ត្រូវបានសមត្ថកិច្ចប៉ូលិសរារាំង ហើយបានជ្រើសរើសតំណាងអ្នកភូមិចំនួន ៧នាក់ ឲ្យចូលទៅជួបជាមួយតំណាងអយ្យកាវិញ។
តំណាងអ្នកភូមិចំនួន ៧នាក់ បានវិលត្រឡប់ទៅលំនៅឋានវិញហើយ កាលពីរសៀលថ្ងៃទី១៩ ខែកក្កដា បន្ទាប់ពីបានចូលទៅជួបជាមួយតំណាងអយ្យកាសាលាដំបូងខេត្តបាត់ដំបង ដើម្បីសុំឲ្យតុលាការដោះលែងអ្នកភូមិចំនួន ៦នាក់ ដែលសមត្ថកិច្ចប៉ូលិសចាប់ឃាត់ខ្លួន កាលពីរសៀលថ្ងៃពុធ ទី១៨ ខែកក្កដា ឆ្នាំ២០១២ ពាក់ព័ន្ធជម្លោះដីធ្លីនៅចំណុចអណ្ដូងកន្ទួត ឃុំដូនបា ស្រុកគាស់ក្រឡ ខេត្តបាត់ដំបង។
លោក ប៊ុត សំបូរ អធិការនគរបាលស្រុកបាណន់ ដែលបាននាំប្រជាពលរដ្ឋចំនួន ៧នាក់ ចូលទៅជួបតំណាងអយ្យកា នៅថ្ងៃទី១៩ ខែកក្កដា បានឲ្យដឹងថា តុលាការកំពុងចាត់ការទៅតាមនីតិវិធីលើករណីជនជាប់សង្ស័យបីនាក់។
លោកបន្តថា កាលពីល្ងាចថ្ងៃទី១៨ សមត្ថកិច្ចប៉ូលិសបានឃាត់ខ្លួនមនុស្សបីនាក់តាមដីកា របស់តុលាការ ក្នុងនោះមានឈ្មោះ សើរ សាមេន ឃឿន សារ៉េត និងយឹម វិរៈ។
ចំណែកឯបីនាក់ទៀតមានឈ្មោះ ឌី សាវុធ រៀម រួន និងឈួយ ស៊ីន ត្រូវបានសមត្ថកិច្ចឃាត់ខ្លួនដែរ ដោយសារតែពួកគេបានព្រួតគ្នាវាយតតាំងជាមួយសមត្ថកិច្ចប៉ូលិសក្នុងការអនុវត្តដីកា អាចត្រូវតុលាការពិចារណាដោះលែងឲ្យរួចខ្លួនវិញ។
ទោះជាយ៉ាងនេះក្តី ជំនួបរវាងអ្នកភូមិ និងតំណាងអយ្យកានេះ គេនៅពុំទាន់បានដឹងពីលទ្ធផលបែបណានោះទេ។
លោក នួន សាន ព្រះរាជអាជ្ញាអមសាលាដំបូងខេត្តដំបង បានមានប្រសាសន៍ថា មន្ត្រីនគរបាលយុត្តិធម៌ បានបញ្ជូនជនដែលត្រូវឃាត់ខ្លួនមកឲ្យតំណាងអយ្យកា។ តំណាងអយ្យកាកំពុងធ្វើការសាកសួរ ប៉ុន្តែនៅពុំទាន់ដំណើរការនីតិវិធីបែបណាទេ។ លោកព្រះរាជអាជ្ញាបានបញ្ជាក់ថា តុលាការបានចេញដីកាសម្រាប់មនុស្សតែបីនាក់ទេ ប៉ុន្តែនៅពេលសមត្ថកិច្ចចុះអនុវត្ត ស្រាប់តែមានមនុស្សជាច្រើននាក់ទៀតចូលទៅជួយ ទើបមានការឃាត់ខ្លួនច្រើននាក់ដូច្នេះ។
លោក នួន សាន៖ «មុនដំបូង ដោយសារមានបណ្ដឹងពីប្រជាពលរដ្ឋពាក់ព័ន្ធមនុស្សបីនាក់ ហើយយើងធ្វើដីកាអញ្ជើញគាត់យកមក ហើយដល់ពេលយើងកំពុងអនុវត្តដីកា មានមនុស្សច្រើនប្រតាយប្រតប់សមត្ថកិច្ចហ្នឹង ដើម្បីយកបងប្អូនបីនាក់ទៅវិញ។ ប៉ុន្តែសមត្ថកិច្ចយើងមិនអនុញ្ញាតឲ្យគាត់យកទៅ ព្រោះក្នុងពេលបំពេញកិច្ចការអញ្ចឹង គាត់ត្រូវឃាត់ខ្លួនពីររូបបីរូបហ្នឹង ពីបទល្មើសជាក់ស្ដែងដោយប្រើអំពើហិង្សាដោយចេតនាទៅលើសមត្ថកិច្ចកំពុងប្រតិបត្តិការហ្នឹង»។
លោក អ៊ឹង ហួម អាយុ៦៦ឆ្នាំ រស់នៅឃុំចែងមានជ័យ ស្រុកបាណន់ ខេត្តបាត់ដំបង និងត្រូវជាម្តាយរបស់ សើរ សាមេន បានស្រែកទ្រហោយំដោយរៀបរាប់ថា កូនគាត់អត់មានទោសកំហុសទេ។ លោកស្រីចោទក្រុមអាជ្ញាធរមូលដ្ឋានភូមិឃុំ ជាអ្នកយកដីលក់ ហើយទម្លាក់កំហុសមកលើប្រជាពលរដ្ឋ។
លោកស្រី ហ៊ន ទី ត្រូវជាប្រពន្ធរបស់ឈ្មោះ ឃឿន សារ៉េត បានថ្លែងថា ក្រុមអ្នកភូមិស្នើសុំឲ្យតុលាការដោះលែងអ្នកភូមិចំនួន ៦នាក់នោះ ឲ្យមានសេរីភាពឡើងវិញ។ លោកស្រីបញ្ជាក់ថា ប្ដីលោកស្រី និងមនុស្ស៥នាក់ផ្សេងទៀតនោះ ពុំមានទោសកំហុសនោះឡើយ។
លោកស្រី ហ៊ន ទី៖ «មិនមានយកលុយមួយកាក់ បើមិនជឿយកប្រជាជនមកប្រជុំ បើសិនថាលក់កន្លះហិកតារ ប្ដីខ្ញុំសុខចិត្តដើរចូលគុក ហើយវាចេះតែថាអញ្ចេះ ថាវាចង់លក់ទាំងអស់នេះ អា ម៉ម សង អា ជិន សំអន ហ្នឹង វាស៊ីញេវ៉ៃត្រាថា បងប្អូនឯងទៅវិញ ដីនេះទុកឲ្យប្រជាជនពេលចេញទៅផុត វាយកម៉ៃខូ ជីកទល់ភ្លឺ»។
នៅក្នុងដីកាបញ្ជាឲ្យចូលខ្លួន ចុះថ្ងៃទី១៤ ខែកក្កដា ឆ្នាំ២០១២ លោក នួន សាន ព្រះរាជអាជ្ញាតុលាការខេត្តបាត់ដំបង បានបញ្ជាក់ថា ឈ្មោះ សើរ សាមេន ភេទប្រុស អាយុ ៣៨ឆ្នាំ ឈ្មោះ ឃឿន សារ៉េត ភេទប្រុស អាយុ ៥៧ឆ្នាំ និងឈ្មោះ យឹម វិរៈ ហៅប្រុស អាយុ ៤២ឆ្នាំ អ្នកទាំងបីស្នាក់នៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។
ពួកគេបានតាំងខ្លួនជាអាជ្ញាធរឃោសនាឲ្យប្រជាពលរដ្ឋចាប់ដី ហើយឲ្យបង់ប្រាក់ឲ្យពួកគេតាំងពីដើមឆ្នាំ២០១២ រហូតមកដល់បច្ចុប្បន្ន។
ករណីនេះ តុលាការយល់ឃើញថា ឈ្មោះជនជាប់សង្ស័យទាំងបីនាក់ បានឆបោកប្រាក់ប្រជាពលរដ្ឋនៅចំណុចភូមិឆករកា ដោយអំពើរបស់ពួកគេជាចេតនាទុច្ចរិត ដែលច្បាប់មានចែង និងបញ្ញត្តិឲ្យផ្ដន្ទាទោស។
ប្រធានសម្របសម្រួលសមាគម អាដហុក (Adhoc) លោក យិន ម៉េងលី បានថ្លែងថា ករណីនេះតុលាការបានចោទប្រជាពលរដ្ឋបីនាក់ ពីបទឆបោក។ រឿងនេះជាប់ពាក់ព័ន្ធរឿងដី ប៉ុន្តែអ្វីដែលអង្គការមើលឃើញ គឺការអនុវត្តមិនស្មើភាពគ្នា។ មិនស្មើគ្នាត្រង់ចំណុចប្រជាពលរដ្ឋ គាត់តែងតែធ្វើការចោទប្រកាន់ទៅលើអាជ្ញាធរភូមិឃុំ ជាអ្នកយកដីរបស់រដ្ឋ និងដីរបស់ប្រជាពលរដ្ឋលក់។ ប្រជាពលរដ្ឋបានធ្វើពាក្យបណ្ដឹងជាច្រើន ប៉ុន្តែមិនមានសមត្ថកិច្ចណាចុះទៅស្រាវជ្រាវថា តើដីនោះលក់ពិតប្រាកដមែនអត់។ ចំណែកឯឈ្មួញដែលបានដីនៅតំបន់នោះរាប់សិបហិកតារ សមាគម អាដហុក ចោទសួរថា តើពួកគេបានដីនោះមកពីណា?
លោក យិន ម៉េងលី៖ «នេះជាចំណុចអវិជ្ជមានមួយ ដែលមិនមានការចាត់ការ តែនៅពាក់ព័ន្ធទៅដល់រឿងនេះ មិនទាន់មានបណ្ដឹងពីខាងជនរងគ្រោះផង គ្រាន់តែមានរបាយការណ៍របស់ស្នងការទេ ខាងសមត្ថកិច្ច ខាងតុលាការ លោកចាត់ការដោយរួសរាន់។ ដូច្នេះ យើងឃើញចំណុចទាំងពីរនេះមានភាពខុសគ្នានៅក្នុងការអនុវត្តច្បាប់នេះ អញ្ចឹងករណីនេះ យើងតាមដានទៀត ហើយយើងផ្តល់មេធាវីជូនពួកគាត់ ប្រសិនបើមានការឃុំខ្លួនពួកគាត់ពាក់ព័ន្ធនឹងបទឆបោកនេះ»។
លោក នួន សាន ព្រះរាជអាជ្ញាតុលាការខេត្តបាត់ដំបង បានថ្លែងថា ការសម្រេចឃុំខ្លួន ឬមិនឃុំខ្លួនជនជាប់សង្ស័យ គេអាចដឹងបាននៅថ្ងៃស្អែក នៅពេលខាងតំណាងអយ្យកាបញ្ជូនសំណុំរឿងនេះទៅឲ្យចៅក្រមស៊ើបសួរ៕
No comments:
Post a Comment
yes