វេទិកាសាធារណៈដែលរៀបចំដោយមជ្ឈមណ្ឌលសិទ្ធិមនុស្សកម្ពុជានៅខេត្តសៀមរាប (រូបថត បូ សាវី)
ប្រជាពលរដ្ឋចំនួន ១៧៥គ្រួសារ នៅខេត្តសៀមរាប ដែលមានទំនាស់ដីធ្លីដ៏ចម្រូងចម្រាស់ នៅតំបន់ទំនប់សួង ជាមួយពលរដ្ឋនៅឃុំអន្លង់សំណរ បានអំពាវនាវដល់រដ្ឋាភិបាល ផ្ដល់ដីសម្បទានសង្គមកិច្ច ដល់ពួកគេឲ្យបានឆាប់។
ថ្លែងក្នុងវេទិកាសាធារណៈ ស្ដីពី សិទ្ធិនិងការអភិវឌ្ឍ ដែលរៀបចំដោយមជ្ឈមណ្ឌលសិទ្ធិមនុស្សកម្ពុជា ស្ថិតក្នុងឃុំជីក្រែង ស្រុកជីក្រែង ខេត្ដសៀមរាប នៅព្រឹកថ្ងៃព្រហស្បតិ៍នេះ ឲ្យដឹងថា ប្រជាពលរដ្ឋចំនួន ១៧៥គ្រួសារ ដែលមានទំនាស់ដីធ្លីដ៏រាំរ៉ៃ នៅតំបន់ទំនប់សួង កំពុងជួបការលំបាក និងខ្វះខាតក្នុងជីវភាពប្រចាំថ្ងៃ ដោយពុំមានដីបង្កបង្កើនផល ដោយសារអាជ្ញាធរបានយកដីតំបន់នោះ ឲ្យទៅភាគីពលរដ្ឋអន្លង់សំណរ ធ្វើជាកម្មសិទ្ធ ហើយពួកគេបានអំពាវនាវ ស្នើសុំឲ្យអាជ្ញាធរជួយដោះស្រាយដីសម្បទានសង្គមកិច្ចជូនពួកគេឲ្យបានច្បាស់លាស់ ។
លោក ឆេង សាវឿន ដែលចូលរួមក្នុងវេទិកានោះ ឲ្យដឹងថា កាលពីឆ្នាំ២០១០ លោកអភិបាលស្រុកជីក្រែង លោក ប៉ោ សិរីរដ្ឋមុន្នី និងមេឃុំជីក្រែង អ្នកស្រី ឮ ចិន្ដា បានសន្យាដោះស្រាយដីសង្គមកិច្ចជូនពួកគាត់ចំនួន ១៧៥គ្រួសារ បន្ទាប់ពីដោះស្រាយបញ្ចប់វិវាទ រវាងពលរដ្ឋឃុំជីក្រែងនិងប្រជាពលរដ្ឋនៅឃុំអន្លង់សំណររួចមក។ លោកបន្ដថា ការសន្យាផ្ដល់ដីនេះ ពុំទាន់ដឹងថានៅកន្លែងណាច្បាស់លាស់នៅឡើយទេ ៖ “ខាងក្រុមប្រឹក្សាគ្រប់ជាន់ថ្នាក់ទាំងអស់សូមជួយរកដីដែលប្រជាពលរដ្ឋ ដែលធ្លាប់មានបញ្ហាកន្លងមកនោះ ឲ្យបានរួសរាន់ចែកប្រជាពលរដ្ឋ ព្រោះប្រជាពលរដ្ឋមានការលំបាករឿងហូបចុក។”
អ្នកស្រី ឡុក ហៀ មានប្រសាសន៏ថា អភិបាលស្រុកក៏ដូចមេឃុំ បានយកដីមានទំនាស់នោះ ឲ្យប្រជាជននៅឃុំអន្លង់សំណរ ដើម្បីដោះដូរជាមួយតំណាងពួកគេដែលជាប់ពន្ធនាគារដើម្បីបញ្ចប់ទំនាស់ ហើយថានឹងផ្ដល់ដីសម្បទានសង្គមកិច្ចឲ្យវិញ។ អ្នកស្រីបញ្ជាក់ថា កន្លងមក អាជ្ញាធរមានគម្រោងបែងចែកដីដល់ប្រជាពលរដ្ឋចំនួន ២៣៣គ្រួសារ តែពុំដឹងថាមានឈ្មោះពួកគាត់ទាំង ១៧៥គ្រួសារឬក៏យ៉ាងណា ៖ “ពួកខ្ញុំនេះជាអ្នករងគ្រោះ សំរាប់យកដីសម្បទានសង្គមកិច្ចចុះ សំរាប់ដែរគិច ដែលអ្នកដែលនៅក្នុងពន្ធនាគារ អញ្ចឹងហើយពួកខ្ញុំ ក៏សុខចិត្តដោះដូរ រឿងដីនោះ អ្នកជាប់ពន្ធនាគារកុំឲ្យវាមានរឿង ជំពាក់ជំពិនត៏ទៅទៀត។”
ពាក់ព័ន្ធនឹងបញ្ហានេះ អភិបាលស្រុកជីក្រែង លោក ប៉ោ សេរីរដ្ឋមុន្នី មានប្រសាសន៏ថា តំណាងប្រជាពលរដ្ឋ ១៧៥គ្រួសារ ត្រូវធ្វើពាក្យស្នើសុំដល់អាជ្ញាធរឲ្យបានត្រឹមត្រូវ។ លោកបញ្ជាក់ថា ការសន្យាផ្ដល់ដីសង្គមកិច្ចនេះ គឺជូនពលរដ្ឋណាដែលពុំមានដីតែប៉ុណ្ណោះ ៖ ព្រោះការលើកឡើងថាសុំដីសង្គមកិច្ច ១៧៥គ្រួសារ គឺវាផ្ទុយនឹងច្បាប់ ផ្ទុយយ៉ាងម៉េច? ផ្ទុយត្រង់ថា វាជាការលើកទឹកចិត្តអ្នកទៅប្រឆាំង ប្រឆាំងហើយបានដី ប្រឆាំងហើយបានដី អញ្ចឹងកើតការប្រឆាំងហ្នឹងកាន់តែខ្លាំងឡើង។ អញ្ចឹងបានឲ្យធ្វើពាក្យមក ១៧៥គ្រួសារ អ្នកណាខ្លះ ឲ្យមកឃុំ ឃុំទៅមើលថាគាត់អត់ដីមែនឬអត់។”
គួរបញ្ជាក់ថា កាលពីថ្ងៃទី៦ ខែកញ្ញា ឆ្នាំ២០១០ តំណាងភាគីពលរដ្ឋឃុំជីក្រែង និងឃុំអន្លង់សំណរ បានព្រមព្រៀងផ្សះផ្សា ដោះស្រាយវិវាទទំនាស់ដីធ្លីនៅតំបន់ទំនប់សួង ៧៨ ដែលមានអាជ្ញាធរខេត្ដស្រុកនិងឃុំ ទទួលស្គាល់ ដើម្បីបញ្ចប់ការប្ដឹងទាមទារ និងចូលកាន់កាប់ដីតំបន់នោះបន្ដទៀត ជាថ្នូរការដកពាក្យបណ្ដឹងខាងភាគីពលរដ្ឋអន្លង់សំណរ និងព្រមយកការដោះស្រាយដីគោលនយោបាយសង្គមកិច្ច ជូនដល់ភាគីពលរដ្ឋខាងឃុំជីក្រែង៕
No comments:
Post a Comment
yes