មន្ត្រីសង្គមស៊ីវិល និងប្រជាពលរដ្ឋបានអះអាងថា សកម្មភាពកាប់បំផ្លាញជម្រកសត្វព្រៃ នៅស្រុកស្នួល ខេត្តក្រចេះ ដើម្បីទន្ទ្រានយកដីធ្វើចម្ការ និងលក់បន្ត មានភាពអនាធិបតេយ្យ ប៉ុន្តែអាជ្ញាធរខេត្តមិនទាន់មានវិធានការណ៍ទប់ស្កាត់ទេ។
មន្ត្រីមជ្ឈមណ្ឌលសិទ្ធិមនុស្សកម្ពុជា និងប្រជាពលរដ្ឋរស់នៅឃុំឃ្សឹម ស្រុកស្នួល កំពុងព្រួយបារម្ភខ្លាចបាត់បង់ជម្រកសត្វព្រៃ ប៉ះពាល់បរិស្ថាន ដោយសារឈ្មួញ និងមន្ត្រីមានអំណាច ខេត្តក្រចេះ កាប់ទន្ទ្រានព្រៃឈើ វាទយកដីធ្វើចម្ការរាប់រយរាប់ពាន់ហិកតារ។
លោក ឈឹម សាវុធ មន្ត្រីកម្មវិធី នៃមជ្ឈមណ្ឌលសិទ្ធិមនុស្សកម្ពុជា បានអះអាងថា បទល្មើសកាប់បំផ្លាញបរិស្ថានជម្រកសត្វព្រៃ នៅឃុំឃ្សឹម ស្រុកស្នួល មានសកម្មភាពធ្ងន់ធ្ងរ ប៉ុន្តែអាជ្ញាធរមិនមានវិធានការទប់ស្កាត់ទេ។ លោកថា បើគ្មានវិធានការទប់ស្កាត់សកម្មភាពកាប់បំផ្លាញដីព្រៃ នៅស្រុកស្នួល ឲ្យមានប្រសិទ្ធភាពទេ ដីជម្រកសត្វព្រៃ ក្នុងមូលដ្ឋាននេះនឹងបាត់បង់ក្នុងពេលដ៏ឆាប់។ ព្រោះថា សព្វថ្ងៃនេះមានម៉ាស៊ីនរណាអាឈើមិនតិចជាង ១រយគ្រឿងទេ បានធ្វើសកម្មភាពកាប់ទន្ទ្រានដីព្រៃ ដើម្បីវាទយកដីធ្វើចម្ការ និងលក់បន្ត។
លោក ឈឹម សាវុធ៖ «ពាក់ព័ន្ធការកាប់បំផ្លាញព្រៃឈើ និងបទល្មើសព្រៃឈើនៅក្នុងដែនជម្រកសត្វព្រៃអភិរក្សនៅស្នួល ក្នុងឃុំឃ្សឹម គឺកើនឡើងមានម៉ាស៊ីនកាត់ឈើរាប់រយគ្រឿងកំពុងតែកាប់ព្រៃស្រោងធ្វើជាចម្ការ ហើយប្រជាពលរដ្ឋមួយចំនួនធំ គាត់ទិញពីមន្ត្រីបរិស្ថានស្រុកស្នួល គឺកាប់ព្រៃស្រោងតែម្ដង គឺបទល្មើសកើតឡើងពេញបន្ទុកតែម្ដង។ រាប់រយរាប់ពាន់ហិកតារកំពុងកាប់បំផ្លាញព្រៃស្រោង។ និយាយទៅមានរណារយន្តរាប់រយគ្រឿងកំពុងកាប់ឈើរាល់ថ្ងៃនេះ»។
មន្ត្រីសង្គមស៊ីវិលរូបនេះបន្តថា មានមនុស្សរាប់រយនាក់ ជារៀងរាល់ថ្ងៃត្រូវបានគេជួលឲ្យទៅកាប់ព្រៃ ដើម្បីទន្ទ្រានយកដីធ្វើចម្ការ ឬក៏លក់បន្ត។
បន្ថែមលើនេះ តំណាងប្រជាពលរដ្ឋសហគមន៍ ឃុំឃ្សឹម ស្រុកស្នួល ខេត្តក្រចេះ ស្នើមិនបង្ហាញអត្តសញ្ញាណ ក៏បានអះអាងថា សព្វថ្ងៃនេះសកម្មភាពកាប់ទន្ទ្រានដីព្រៃក្នុងមូលដ្ឋានខ្លួនមានរូបភាពអនាធិបតេយ្យបំផុត។ លោកឲ្យដឹងថា រាល់ថ្ងៃនេះមានម៉ាស៊ីនអាឈើរាប់រយគ្រឿង បានធ្វើសកម្មភាពកាប់ទន្ទ្រានដីព្រៃ ដើម្បីវាទយកដីធ្វើចម្ការ ឬក៏លក់បន្ត។
តំណាងពលរដ្ឋ បានស្នើឲ្យមន្ត្រីជំនាញក្រសួងពាក់ព័ន្ធថ្នាក់លើ ជួយទប់ស្កាត់សកម្មភាពកាប់បំផ្លាញដីព្រៃជម្រកសត្វ ដែលធ្វើសកម្មភាព នៅឃុំឃ្សឹម ស្រុកស្នួល ឲ្យបានទាន់ពេល ព្រោះថា បទល្មើសនេះ មានមន្ត្រីធ្វើការតាមស្ថាប័ន ឬមន្ទីរមួយចំនួនក្នុងខេត្តក្រចេះ ជាអ្នកនៅពីក្រោយបទល្មើស។
ទាក់ទងបញ្ហានេះ លោក ស ចំរ៉ុង អភិបាលខេត្តក្រចេះ មានប្រសាសន៍នៅថ្ងៃទី៣០ ខែកក្កដា ថា អាជ្ញាធរកំពុងស៊ើបអង្កេតជុំវិញបទល្មើសបំផ្លាញបរិស្ថានជម្រកសត្វព្រៃ នៅស្រុកស្នួល ដែលពលរដ្ឋព្រួយបារម្ភ ដើម្បីមានវិធានការទប់ស្កាត់រួចហើយ។
លោក ស ចំរុង មានប្រសាសន៍ដូច្នេះ៖ «បញ្ហាកាប់បំផ្លាញបរិស្ថានព្រៃជម្រកសត្វនេះ ខាងសហគមន៍គេរាយការណ៍ប្រាប់ប៉ុន្មានថ្ងៃមុននេះ ខ្ញុំបានឲ្យអាជ្ញាធរស្រុក និងមេព្រៃចុះទៅពិនិត្យមើល គេមិនទាន់រាយការណ៍ប្រាប់ថាម៉េចនៅឡើយទេ ប៉ុន្តែខ្ញុំបានឲ្យមន្ត្រីចុះអង្កេតរួចហើយ»។
យ៉ាងណាក៏ដោយ មន្ត្រីសង្គមស៊ីវិល និងប្រជាពលរដ្ឋ ហាក់មិនមានជំនឿថា ថ្នាក់ដឹកនាំខេត្តក្រចេះ អាចទប់ស្កាត់បទល្មើសកាប់បំផ្លាញបរិស្ថានជម្រកសត្វព្រៃ កំពុងធ្វើសកម្មភាពនៅឃុំឃ្សឹម ស្រុកស្នួល មានប្រសិទ្ធភាពទេ បើគ្មានអន្តរាគមន៍ពីប្រមុខដឹកនាំ ឬមន្ត្រីជំនាញក្រសួងពាក់ព័ន្ធ ចុះមានវិធានការទប់ស្កាត់ទេនោះ៕
No comments:
Post a Comment
yes