ប្រាសាទព្រះវិហារ: លោក ជុច ភឿន ប្រធានអាជ្ញាធរព្រះវិហារ បានឲ្យដឹងថា ច្រកទ្វារព្រំដែនកម្ពុជា និងថៃ នៅទល់មុខប្រាសាទព្រះវិហារ ដែលជាអតីតផ្លូវចេញ-ចូលប្រាសាទព្រះវិហារ ទៅ កាន់ទឹកដីនោះ រដ្ឋាភិបាលបានសម្រេចចាក់សោរ បិទជាស្ថាពរ ដោយមិនបើកឲ្យដំណើរការឡើងវិញទេ។ ក៏ប៉ុន្តែលោកជុចភឿន បានអះអាងថា ប្រមុខរដ្ឋាភិបាលកម្ពុជា និងថៃ បានសម្រេចបើកច្រកទ្វារព្រំដែន អានសេះ នៅជិតនោះ ដើម្បីឲ្យអ្នក ទេសចរ ចេញ-ចូលទស្សនាប្រាសាទព្រះវិហារ និងឆ្លងដែនទៅកាន់ប្រទេសថៃ។
បន្ទាប់ពីពិធីកែសម្រួល ដកកងទ័ពកម្ពុជា លើកទី១ ចេញពីតំបន់ព្រំដែនប្រាសាទព្រះវិហារ នាព្រឹកថ្ងៃទី១៨កក្កដា ឆ្នាំ២០១២ នៅព្រំដែនប្រាសាទព្រះវិហារ លោក ជុច ភឿន បានថ្លែងទៅកាន់អ្នកកាសែតថា រដ្ឋាភិបាល មិនបើកច្រកព្រំដែន នៅទល់មុខប្រាសាទព្រះវិហារឡើងវិញទេ ព្រោះច្រកនោះ បានបង្កជម្លោះរវាងប្រទេសទាំងពីរ។ ប៉ុន្តែរដ្ឋាភិបាលកម្ពុជា និងថៃ បានឯកភាពគ្នា បើកច្រកព្រំដែន តាថាវ ដែលស្ថិតក្នុងស្រុកជាំក្សាន្ត ជិតប្រាសាទព្រះវិហារ ដែលជាច្រកសេដ្ឋកិច្ចអាស៊ាន។
សូមរម្លឹកថា ក្នុងកិច្ចប្រជុំ កាលពីរសៀលថ្ងៃទី១៣កក្កដា ឆ្នាំ២០១២ ប្រមុខរដ្ឋាភិបាលកម្ពុជា និងថៃ ក្រៅពីការឯកភាពសម្រួល ដកកងទ័ព ចេញពីតំបន់គ្មានកងទ័ពបណ្តោះអាសន្ន ភាគីទាំងពីរក៏បានឯកភាព បើកច្រកព្រំដែន តាថេវ និងអានសេះ ឡើងវិញ សម្រាប់ឱ្យភ្ញៀវជាតិ និងអន្ដរជាតិ ចូលទស្សនាប្រាសាទព្រះវិហាររបស់ខ្មែរ។
ក្នុងសន្និសីទកាសែត សម្តេចនាយករដ្ឋមន្ត្រី ហ៊ុន សែន បានអំពាវនាវឲ្យភ្ញៀវទេសចរជាតិ និងអន្តរជាតិ ទៅទស្សនាប្រាសាទព្រះវិហារ និងឆ្លងដែន ទៅទស្សនាខេត្តរបស់ថៃ ដែលនៅទល់មុខតំបន់ប្រាសាទព្រះវិហាររបស់កម្ពុជា។
សូមរម្លឹកថា កងទ័ពថៃ បានចូលឈ្លានពានទឹកដីកម្ពុជា នៅព្រំដែនប្រាសាទព្រះវិហារ ចាប់តាំងពីថ្ងៃទី១៥កក្កដា ឆ្នាំ២០០៨ ដែលនាំឲ្យមានការតានតឹង និងប្រឈមមុខដោយអាវុធ រហូតដល់ផ្ទុះសង្គ្រាមជាញឹកញាប់។ ច្រកព្រំដែនកម្ពុជា-ថៃ នៅមុខប្រាសាទព្រះវិហារ ក៏ត្រូវបានបិទ ចាប់តាំងពីពេលនោះមក៕
No comments:
Post a Comment
yes