ភ្នំពេញ: គណៈកម្មាធិការខុមហ្វ្រែល និងគណៈកម្មាធិការនិកហ្វិច សូមសម្ដែងនូវការសោកស្តាយ និងព្រួយបារម្ភជាខ្លាំង ចំពោះការធា្លក់ចុះសេរីភាពនៃការបញ្ចេញមតិ និងសេរីភាពបង្កើតសមាគម ដោយសារតែការចាប់ខ្លួនលោកម៉ម សូណង់ដូ ប្រធានវិទ្យុសំបុកឃ្មុំ FM105MHz នៅក្នុងប្រទេសកម្ពុជា ដែលប្រកាន់របបប្រជាធិបតេយ្យសេរីពហុបក្ស។
សេចក្តីប្រកាសព័ត៌មានរួម ចុះថ្ងៃទី១៧ ខែកក្កដា ឆ្នាំ២០១២ បានលើកឡើងថា ការចោទប្រកាន់លោក ម៉ម សូណង់ដូ គឺករណីនយោបាយ ដែលបង្កឲ្យប្រជាពលរដ្ឋមានការភ័យខ្លាច ជាពិសេសអាចជះឥទ្ធិពលដល់សេរីភាពបញ្ចេញមតិ និងសេរីភាពបង្កើតសមាគម ស្របពេលដែលប្រទេសកម្ពុជាកំពុងដំណើរការរៀបចំការបោះឆ្នោតជ្រើសតាំងតំណាងរាស្ត្រឆ្នាំ២០១៣។
លោក ម៉ម សូណង់ដូ ជាប្រធានសមាគមអ្នកប្រជាធិបតេយ្យ ដែលបានពង្រីកសមាជិកខ្លួនរាប់សិបពាន់នាក់ដោយការស្ម័គ្រចិត្ត បានបញ្ចេញមតិទិតៀននយោបាយ ហើយជំរុញឲ្យគណបក្សប្រឆាំងរួមគ្នា និងអប់រំសមាជិកខ្លួនឲ្យយល់ពីកិច្ចការនយោបាយ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។
សេចក្តីប្រកាសព័ត៌មានរួម ចុះថ្ងៃទី១៧ ខែកក្កដា ឆ្នាំ២០១២ បានលើកឡើងថា ការចោទប្រកាន់លោក ម៉ម សូណង់ដូ គឺករណីនយោបាយ ដែលបង្កឲ្យប្រជាពលរដ្ឋមានការភ័យខ្លាច ជាពិសេសអាចជះឥទ្ធិពលដល់សេរីភាពបញ្ចេញមតិ និងសេរីភាពបង្កើតសមាគម ស្របពេលដែលប្រទេសកម្ពុជាកំពុងដំណើរការរៀបចំការបោះឆ្នោតជ្រើសតាំងតំណាងរាស្ត្រឆ្នាំ២០១៣។
លោក ម៉ម សូណង់ដូ ជាប្រធានសមាគមអ្នកប្រជាធិបតេយ្យ ដែលបានពង្រីកសមាជិកខ្លួនរាប់សិបពាន់នាក់ដោយការស្ម័គ្រចិត្ត បានបញ្ចេញមតិទិតៀននយោបាយ ហើយជំរុញឲ្យគណបក្សប្រឆាំងរួមគ្នា និងអប់រំសមាជិកខ្លួនឲ្យយល់ពីកិច្ចការនយោបាយ ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។
សេចក្តីប្រកាសលើកឡើងថា ការចោទប្រកាន់ និងចាប់ខ្លួនប្រធានសមាគម ឬអង្គការ ដោយគ្រាន់តែផ្អែកលើមូលហេតុមានសមាជិករបស់សមាគមក្នុងចំណោមសមាជិករាប់ពាន់នាក់បានប្រព្រឹត្តបទល្មើស គឺជាការរំលោភសេរីភាពបង្កើតសមាគម និងសេរីភាពបញ្ចេញមតិ។
សេចក្តីប្រកាស បានបន្ថែមទៀតថា លោកម៉ម សូណង់ដូ ជាប្រធានវិទ្យុសំបុកឃ្មុំ FM105MHz ដែលជាវិទ្យុឯកជន និងស្ថានីយតែមួយគត់ដែលផ្តល់ឱកាសឲ្យគ្រប់តួអង្គនយោបាយ រួមមានគណបក្សនយោបាយ អង្គការក្រៅរដ្ឋាភិបាល ប្រជាពលរដ្ឋ គ្រប់និន្នាការនយោបាយ និងវិទ្យុអន្តរជាតិ ផ្សាយជាភាសាខ្មែរ ចាក់ផ្សាយនៅក្នុងកម្មវិធីវិទ្យុនេះ ជាពិសេសវិទ្យុនេះបានផ្តល់ឱកាសដល់គណបក្សនយោបាយ ដូចជា គណបក្សប្រឆាំង និងមតិការពារគណបក្សកាន់អំណាច ដើម្បីបញ្ចេញទស្សនៈនយោបាយ កម្មវិធីនយោបាយ និងបញ្ហាសង្គមផ្សេងៗ។
ក្រៅពីមូលហេតុនយោបាយ ដែលដាក់សម្ពាធសេរីភាពបញ្ចេញមតិខាងនយោបាយ និងដកការទទួលខុសត្រូវរបស់រាជរដ្ឋាភិបាល ការចោទប្រកាន់របស់តុលាការ និងរាជរដ្ឋាភិបាលចំពោះលោក ម៉ម សូណង់ដូ ទាក់ទងវិវាទដីធ្លី នៅភូមិប្រម៉ា ឃុំដំរី ស្រុកឆ្លូង ខេត្តក្រចេះ ដែលនាំឲ្យស្លាប់កុមារី ហេង ចន្ថា អាយុ ១៤ឆ្នាំ គឺមិនមានភស្តុតាង មូលដ្ឋាន អង្គហេតុ និងដំណើរការនីតិវិធីផ្នែកច្បាប់គ្រប់គ្រាន់នោះទេ។
ខុមហ្វ្រែល និងនិកហ្វិច បានស្នើយ៉ាងទទូចថា ដើម្បីឲ្យបរិយាកាសបោះឆ្នោតខាងមុខបន្ថយការភ័យខ្លាច ពិសេសការការពារសេរីភាពបញ្ចេញមតិ និងសេរីភាពបង្កើតសមាគម លោកម៉ម សូណង់ដូ ត្រូវតែបានដោះលែង។
សូមបញ្ជាក់ថា លោក ម៉ម សូណង់ដូ ជាប្រធានសមាគមអ្នកប្រជាធិបតេយ្យ ត្រូវបានសម្តេចនាយករដ្ឋមន្ត្រី ហ៊ុន សែន បានប្រកាសនៅថ្ងៃទី២៦ ខែមិថុនា ឆ្នាំ២០១២ ថា ជាប់ទាក់ទងទៅនឹងការធ្វើតំបន់អបគមន៍ នៅឃុំដំរី ស្រុកឆ្លូង ខេត្តក្រចេះ ដែលទាញការទទួលខុសត្រូវចំពោះការស្លាប់របស់កុមារី ហេង ចន្ថា។
សេចក្តីប្រកាសលើកឡើងថា បន្ទាប់ពីការលើកឡើងរបស់សម្តេចនាយករដ្ឋមន្ត្រី ហ៊ុន សែន រួចមក លោក ម៉ម សូណង់ដូ បានវិលត្រឡប់មកប្រទេសកម្ពុជា នៅថ្ងៃទី១២ ខែកក្កដា ឆ្នាំ២០១២ និងនៅថ្ងៃទី១៤ ខែកក្កដា ឆ្នាំ២០១២ លោកបានចូលរួមខួបលើកទី២ នៃការបង្កើតសមាគមអ្នកប្រជាធិបតេយ្យ ដោយបានថ្លែងថា លោកមិនខ្លាចការចាប់ខ្លួនពីសំណាក់អាជ្ញាធរឡើយ ដោយសារតែលោកពុំមានជាប់ពាក់ព័ន្ធទៅនឹងករណីខាងលើនេះទេ។ នៅថ្ងៃទី១៥ ខែកក្កដា ឆ្នាំ២០១២ លោកម៉ម សូណង់ដូ ត្រូវបានចាប់ខ្លួននៅស្ថានីយវិទ្យុ FM105MHz តាមដីកាបង្គាប់ឲ្យចាប់ខ្លួនរបស់សាលាដំបូងខេត្តក្រចេះលេខ៧១ ច.ខ/១២ចុះថ្ងៃទី២ ខែកក្កដា ឆ្នាំ២០១២ ដោយចោទប្រកាន់ថា ជាអ្នកផ្តួចផ្តើមគំនិតប្រឆាំងអ្នករាជការសាធារណៈ, ធ្វើកុបកម្ម, ជ្រៀតជ្រែកដោយខុសច្បាប់ក្នុងការបំពេញការងារសាធារណៈ និងញុះញង់ឲ្យប្រជាពលរដ្ឋប្រឆាំងអាជ្ញាធរស្របច្បាប់ តាមមាត្រា២៨, ៥០៤, ៤៥៦, ៤៥៧, ៦០៩ និងមាត្រា ៤៦៤ នៃក្រមព្រហ្មទណ្ឌ ដែលអាចនឹងត្រូវជាប់ទោសជាច្រើនឆ្នាំ។ បន្ទាប់ពីការចាប់ខ្លួន លោក ម៉ម សូណង់ដូ ត្រូវបានឃុំខ្លួននៅក្រសួងមហាផ្ទៃ បន្ទាប់មកនៅថ្ងៃទី១៦ ខែកក្កដា ឆ្នាំ២០១២ លោកត្រូវបានសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅមណ្ឌលកែក្រែទី១ (ពន្ធនាគារព្រៃស)។
ទាក់ទងនឹងការចាប់ខ្លួនលោកម៉ម សូណង់ដូ ត្រូវបានលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន អះអាងថា រដ្ឋាភិបាលមិនមានគម្រោងបិទវិទ្យុសំបុកឃ្មុំ FM 105 MHz ឡើយ៕
No comments:
Post a Comment
yes