កំពត: អំឡុងពេលពីរថ្ងៃនេះ (ថ្ងៃទី១៩-២០កក្កដា) ទំនិញប្រភេទជីរនាងវង និងម្អម ហាក់មានហាងឆេងខ្ពស់ ដោយសារការឮតៗ ពីមាត់មួយ ទៅមាត់មួយថា ស្ងោរលាយគ្នា ឱ្យកុមារងូត អាចបង្ការទប់ទល់នឹងមេរោគ EV71 ប្រភេទជំងឺថ្មីបាន។ ទោះបីមិនទាន់មានកុមារណាម្នាក់ ឆ្លងមេរោគនេះ ក្ដីនៅខេត្តកំពត តែមន្ដ្រីជំនាញសុខាភិបាល មិនហ៊ានអះអាងថា ប្រភេទរុក្ខជាតិទាំងពីរមុខនោះ មានប្រសិទ្ធភាព ឬយ៉ាងណាឡើយ។
ប្រភពពីអាជីករជាច្រើន បាននិយាយនៅថ្ងៃទី២០ ខែកក្កដា ឆ្នាំ២០១២ ថា តាំងពីម្សិលមិញ រហូតដល់ថ្ងៃនេះ ជីរនាងវង និងម្អមស្រែ ដែលធ្លាប់ទិញតម្លៃ ១០០ រៀល បានហូបនោះ ឥឡូវមិនអាចទៅរួចទេ ពោលគឺតម្លៃបានកើនខ្ពស់ ព្រោះតែការសម្រុកទិញពីសំណាក់ប្រជាពលរដ្ឋទូទៅ ដោយអះអាងថា ស្ងោរលាយគ្នាឱ្យកុមារងូត អាចបង្ការទប់ទល់ជាមួយមេរោគថ្មី ដែលកំពុងកើតលើកុមារ តាមបណ្ដាខេត្ដមួយចំនួននោះបាន។ ដោយសារឮ និងឃើញគេផ្អើលទិញគ្រប់គ្នានេះ ពួកគាត់ក៏បានចំណាយលុយទិញជាមួយគេឯងយកទៅស្ងោរឱ្យកូនចៅងូត ដើម្បីការពារកុំឱ្យមេរោគដ៏សាហាវនោះ ឆ្លងផងដែរ។
ជុំវិញបញ្ហានេះ លោកវេជ្ជបណ្ឌិត កែវ សុផាន់ អនុប្រធានមន្ទីរសុខាភិបាលខេត្ដកំពត បញ្ជាក់តាមទូរស័ព្ទថា ការនិយាយពីប្រសិទ្ធភាព នៃរុក្ខជាតិទាំងពីរសម្រាប់បង្ការទប់ស្កាត់ EV71 នោះ លោកមិនហ៊ានអះអាងថា យ៉ាងណាទេ តែតាមការសិក្សា រុក្ខជាតិម្អម ជាប្រភេទឱសថបុរាណ ដែលអាចពិសាទៅធ្វើឱ្យសាច់ត្រជាក់ គឺបញ្ចុះកម្ដៅបាន។ ពាក់ព័ន្ធនឹងហេតុការណ៍ នៃមេរោគជំងឺប្រភេទថ្មីដដែលនោះ លោកវេជ្ជបណ្ឌិតបញ្ជាក់ថា មកដល់រសៀលថ្ងៃទី២០ ខែកក្កដានេះ មិនទាន់មានករណីកុមារណាម្នាក់ឆ្លងមេរោ EV71 នៅឡើយទេ ដោយតាមន្ទីរពេទ្យចំនួន៥ និងមណ្ឌលសុខភាពទាំង ៥០ កន្លែង ទូទាំងខេត្ដកំពត មានមន្ដ្រីស្ម័គ្រចិត្ដ និងមន្ដ្រីជំនាញប្រយុទ្ធប្រឆាំងជំងឺឆ្លងប្រចាំការជានិច្ច ព្រមទាំងរាយការណ៍ មកមន្ទីររយៈពេលពីរម៉ោងម្ដង។
គួរបញ្ជាក់បន្ថែមផងដែរថា ចូលដល់ល្ងាចថ្ងៃដដែលនេះ នៅឯផ្សារសាមគ្គីទីរួមខេត្ដកំពត កំពុងល្បីពីការប្រើប្រាស់ទឹកឃ្មុំ លាយភេសជ្ជៈគោជល់ មានប្រសិទ្ធភាពបង្ការមេរោគប្រភេទថ្មីនោះបាន។
ជាមួយនឹងការផ្ទុះចេញនូវពាក្យនិយាយតគ្នាមួយទៀតនេះ គេហទំព័រ CEN មិនទាន់រកប្រភពជំនាញណាមួយ មកពន្យល់បាននៅឡើយ៕
No comments:
Post a Comment
yes