មន្ត្រីនគរបាលរាជធានីម្នាក់នេះ ទាត់ទៅលើស្រ្តីអ្នកភូមិបឹងកក់
នៅក្នុងការបង្ក្រាបការតវ៉ាកាលពីថ្ងៃទី ២៧ ខែមិថុនា
ភ្នំពេញៈ ស្ត្រីរងគ្រោះរលូតកូន ក្នុងព្រឹត្តិការណ៍វាយបង្ក្រាបយ៉ាងហិង្សា ពីកម្លាំងសមត្ថកិច្ចចម្រុះរាជធានី កាលពីថ្ងៃទី ២៧ ខែមិថុនា បានបញ្ចេញប្រតិកម្មតប ទៅនឹងការលើកឡើងរបស់លោក ភួង ម៉ាឡៃ ស្នងការរងនគរបាលរាជធានីដែលត្រូវបានភ្នំពេញ ប៉ុស្តិ៍ ដកស្រង់សម្តីយកមកចុះផ្សាយកាលពីថ្ងៃទី១ខែសីហា នោះថា ជាការលើកឡើងដោយ«គ្មានសីលធម៌ និងជាការប្រមាថដល់ស្ត្រីទាំងអស់ក្នុងប្រទេសកម្ពុជា»។
កាលពីថ្ងៃទី ៣១ ខែកក្កដា ឆ្នាំ ២០១២ បន្ទាប់ពីស្ត្រីរងគ្រោះឈ្មោះ បូវ ស្រីស្រស់ អាយុ ២៥ ឆ្នាំ បានដាក់ពាក្យប្ដឹងទៅតុលាការរាជធានីភ្នំពេញ ប្រឆាំងលោក ភួង ម៉ាឡៃ និងលោក សុខ ពេញវុធ អភិបាលរងខណ្ឌដូនពេញ ព្រមទាំងមន្ត្រីនគរបាលម្នាក់ទៀត ដែលជាជនដៃដល់ ពីបទ «ប្រើអំពើហិង្សា ដោយចេតនា» ទៅលើអ្នកភូមិដែលធ្វើការតវ៉ាដោយអហិង្សា លោកភួង ម៉ាឡៃ បានផ្ដល់បទសម្ភាស ជាមួយកាសែតភ្នំពេញប៉ុស្តិ៍ តាមប្រព័ន្ធទូរស័ព្ទ ជុំវិញបញ្ហាបណ្ដឹងរបស់ស្ត្រីរងគ្រោះ ដោយបានលើកឡើងបែបជាលក្ខណៈសំណួរមកភ្នំពេញប៉ុស្តិ៍វិញថា៖ «តើស្ត្រីរងគ្រោះក្មេងឬក៏ចាស់ ហើយតើគាត់ប្ដឹងហ្នឹងចង់ឲ្យខ្ញុំសងកូនគាត់វិញ ឬយ៉ាងណា? ខ្ញុំសូមប្រាប់វិញថា បើគាត់ចង់ឲ្យខ្ញុំសងកូនវិញ ខ្ញុំក៏នៅក្មេងដែរ...»។
ការលើកឡើងបែបនេះ ធ្វើឲ្យអ្នកស្រី បូវ ស្រីស្រស់ និងស្ត្រីក្នុងសហគមន៍បឹងកក់មួយចំនួន មានប្រតិកម្មតបវិញ កាលពីម្សិលមិញ ក្នុងសន្និសីទសារព័ត៌មានមួយដោយបានផ្ដោតសំខាន់ ទៅលើសម្រង់សម្ដីនេះ ហើយពួកគាត់ បានយល់ឃើញថា ការលើកឡើងបែបនេះ គឺជាការប្រមាថ មកលើរូបគាត់ជាស្ត្រីរងគ្រោះផង និងជាការទទួលសារភាពថា គាត់ (ភួង ម៉ាឡៃ) ជាអ្នកបញ្ជាឲ្យមន្ត្រីនគរបាល វាយបង្ក្រាបមកលើអ្នកស្រី និងពលរដ្ឋផ្សេងទៀត នៅក្នុងព្រឹត្តិការណ៍ថ្ងៃទី ២៧ ខែមិថុនានោះ។
នៅកន្លែងដែលមានការប្រមូលផ្ដុំធ្វើសន្និសីទសារព័ត៌មានក្នុង ភូមិ ២២ សង្កាត់ស្រះចក ខណ្ឌដូនពេញ អ្នកស្រី បូវ ស្រីស្រស់ បាននិយាយក្នុងបទសម្ភាសដាច់ដោយឡែកមួយ ជាមួយភ្នំពេញ ប៉ុស្តិ៍ ថា៖ «ខ្ញុំយល់ថា ការលើកឡើងរបស់គាត់[លោក ភួង ម៉ាឡៃ]បែបនេះគឺជាការប្រមាថមកលើរូបខ្ញុំ និងស្ត្រីក្នុងសហគមន៍បឹងកក់»។ អ្នកស្រីបានបញ្ជាក់ថា៖«ខ្ញុំមិនប្ដឹងឲ្យគាត់សងកូនខ្ញុំវិញទេ តែខ្ញុំចង់ឲ្យគាត់ទទួលទោសកំហុស និងនាំខ្លួនជនដៃដល់ទៅផ្ដន្ទាទោសតាមច្បាប់ ប៉ុណ្ណោះ»។
ជាមួយគ្នានោះ អ្នកស្រីបានអំពាវនាវ សុំឲ្យតុលាការ ចាត់វិធានការ ចំពោះពាក្យបណ្ដឹងរបស់អ្នកស្រី ដើម្បីផ្ដល់ភាពយុត្តិធម៌ ចំពោះអ្នកស្រី និងទារកជាងពីរខែក្នុងផ្ទៃរបស់អ្នកស្រី ដែលបានបាត់បង់ទៅ។
លោកភួង ម៉ាឡៃ ស្នងការរងរាជធានីភ្នំពេញ មិនអាចទំនាក់ទំនងសុំការបំភ្លឺបន្ថែមទៀតបានទេ កាលពីម្សិលមិញ ជុំវិញការលើកឡើងរបស់លោក កាលពីថ្ងៃទី ៣១ កក្កដា ដែលនាំឲ្យស្ត្រីរងគ្រោះ និងស្រ្តីអ្នកភូមិសហគមន៍បឹងកក់ បានបញ្ចេញប្រតិកម្មតបនេះ៕
No comments:
Post a Comment
yes