លោក ខៀវ សំផន អតីតប្រធានគណៈប្រធានរដ្ឋ នៃរបបខ្មែរក្រហម
សើចនៅក្នុងសវនាការ សាលាក្តី នាពេលកន្លងមក
ភ្នំពេញៈ ភាពក្រីក្រ ខ្វះមុខខ្វះក្រោយ យ៉ាងខ្លាំង ក្នុងគ្រួសារបានជំរុញឲ្យលោក សួង ស៊ីកឿន ចូលរួមក្នុងចលនាតស៊ូខ្មែរក្រហមដែលនៅទីបំផុត បានធ្វើឲ្យប្រជាជនកម្ពុជាជិត ២ លាននាក់ត្រូវបានស្លាប់។ លោក សួង ស៊ីកឿន បុរសវ័យជរារាងស្តើង បានចាប់ផ្តើមផ្តល់ចម្លើយកសិណ នៅក្នុងសវនាការសាលាក្ដីខ្មែរក្រហមកាលពីម្សិលមិញ។
លោកបានប្រាប់ព្រះរាជអាជ្ញាថា៖ «ខ្ញុំចាប់កំណើតក្នុងគ្រួសារកសិករក្រីក្រមួយ។ ខ្ញុំគិតពីម្តាយខ្ញុំ ដែលមិនមានសម្លៀកបំពាក់សមរម្យ សម្រាប់ទៅវត្ត ហើយការរស់នៅរបស់យើង ពេញមួយឆ្នាំៗ មិនមានអាហារបរិភោគគ្រប់គ្រាន់ទេ។ យើងត្រូវខ្ចីបុលពីអ្នកដទៃ»។ ការធុញទ្រាន់នឹងភាពក្រីក្រ ដែលបានដក់ជាប់ក្នុងផ្នត់គំនិតតាំងពីកុមារភាព បានធ្វើឲ្យលោក ស៊ីកឿន ព្យាយាមគិតរកផ្លូវ ដើម្បីចូលរួមចំណែកក្នុងចលនារំដោះប្រទេស។
លោក សួង ស៊ីកឿន បានរៀបរាប់ពីកុមារភាពរបស់លោក ដែលចាប់ផ្តើម ពីសម័យមុនទទួលបានឯករាជ្យ ពេលកម្ពុជាស្ថិតនៅក្រោមការត្រួតត្រារបស់អាណានិគមបារាំង។ ឯករាជ្យទទួលបានក្នុងឆ្នាំ ១៩៥៣ ហើយ ៣ ឆ្នាំក្រោយមក លោក សួងស៊ីកឿន ទៅទីក្រុងប៉ារីសសិក្សាពីអាកាសចរស៊ីវិលក្រោមអាហារូបករណ៍។
នៅក្នុងប្រទេសបារំាង លោកស៊ីកឿន បានចូលរួមក្នុងចលនាតស៊ូនិសិ្សត ហើយក្រុមម៉ាកលេនីន ដែលមានប្រធាន គឺលោក ខៀវ សំផន អតីតប្រមុខរដ្ឋក្នុងរបបខ្មែរក្រហម។
លោកបានសិក្សាទ្រឹស្តីកុម្មុយនីស្ត ពេលទៅសាលារៀន ហើយទំនាក់ទំនងរបស់លោក នៅពេលនោះ បានជួយលោក ទទួលបានតំណែងក្នុងរណសិរ្សបង្រួបបង្រួមជាតិកម្ពុជា ជារដ្ឋាភិបាលនិរទេស នៅដើមទសវត្សរ៍ទី ៧០ ដែលសម្តេចព្រះ នរោត្តម សីហនុ ដឹកនាំពីទីក្រុងប៉េកាំង។
សាក្សីរូបនេះ បានគូសបញ្ជាក់ទៀតថា៖ «រណសិរ្សបង្រួបបង្រួមជាតិកម្ពុជា ត្រូវបានបង្កើតឡើង ក្រោយរដ្ឋប្រហារ ដោយលោកសេនាប្រមុខ លន់ នល់ [ក្នុងឆ្នាំ ១៩៧០]។ រណសិរ្សត្រូវបានបង្កើតឡើង ដើម្បីរំដោះប្រទេសពី លន់ នល់»។
លោកធ្វើការនៅផ្នែកសនិ្តសុខ និងព័ត៌មាន ហើយបានធ្វើដំណើរទៅបរទេស ជាមួយនឹងលោក អៀង សារី និងលោក ខៀវ សំផន សហជនត្រូវចោទ ជាសមាជិកប្រតិភូបរទេស។
លោកចាំថា លោកបានទៅបរទេស ដូចជា អេហ្ស៊ីប អាល់ហ្សេរី អតីតយូហ្គោស្លាវី រ៉ូម៉ានី។
លោកបានបន្តថា៖ «ដំណើរនោះគឺដើម្បីផ្សព្វផ្សាយ ពីចលនាតស៊ូរបស់កម្ពុជា ដល់បណ្តាប្រទេសជាមិត្ត»។
នៅពេលខ្មែរក្រហមឡើងកាន់អំណាចក្នុងឆ្នាំ ១៩៧៥ លោកទទួលបានការងារ នៅក្រសួងការបរទេស ដែលស្ថិតក្រោមការដឹកនាំរបស់លោក អៀង សារី។
នៅពេលព្រឹកម្សិលមិញ ក្រុមមេធាវីការពារលោក ខៀវ សំផន បានបញ្ចប់ការសួរចម្លើយលោក រចឹម ទន់ ដែលជាប្រធានរដ្ឋបាល នៃក្រសួងការបរទេស។ វាជាការឆ្លើយឆ្លង ទៅមកដែលធ្វើឲ្យលោក ទន់ រកាំចិត្ត ដែលត្រូវឆ្លើយសំណួរ ដែលលោកចាត់ទុកថា ជាសំណួរដដែលៗ។ លោកបានថ្លែងម្តងនោះថា៖ «ខ្ញុំបានឆ្លើយរួចហើយ។ ប្រសិនបើលោកនៅតែមិនយល់ វាគឺជាបញ្ហារបស់លោក»។
សវនាការសាលាក្តីខ្មែរក្រហមនៅក្នុងសំណុំរឿង ០០២ នេះ នឹងបន្តធ្វើនៅថ្ងៃចន្ទទៀត៕
No comments:
Post a Comment
yes