ក្រុមកូដករ កម្មកររោងចក្រអូសេអង់ ទម្លាយរបាំងរារាំងរបស់សមត្ថកិច្ច
ដើរក្បួនពីម្សិលមិញ
ភ្នំពេញៈ កម្មករជាង២៥០០នាក់នៅរោងចក្រអូសេអង់ បានប៉ះទង្គិចជាមួយនឹងកម្លាំងរាជអាវុធហត្ថនិងនគរបាលប្រមាណ ១០០នាក់ នៅក្នុងខណ្ឌដង្កោ រាជធានីភ្នំពេញ ពីម្សិលមិញ នៅក្នុងការដើរក្បួនតវ៉ាជាលើកទីពីរពាក់ព័ន្ធនឹងករណីបៀតបៀន ផ្លូវភេទលើកម្មការិនី៤នាក់។
កម្មករជាងពាក់កណ្តាលនៃកម្មករជាង៤ពាន់នាក់នៅរោងចក្រនេះ បាននាំគ្នាហែក្បួនទៅផ្ទះលោកនាយករដ្ឋមន្រ្តី ហ៊ុន សែន ដើម្បីដាក់ញត្តិ ប៉ុន្តែត្រូវបានបញ្ឈប់ដោយកម្លាំងកងរាជអាវុធហត្ថប្រដាប់ដោយ ខែល និងដំបង។
ភាគីរោងចក្រអូសេអង់ម្សិលមិញបដិសេធមិនធ្វើតាមការទាមទារ របស់ក្រុមកូដករ ដែលស្នើឲ្យបណ្តេញអ្នកគ្រប់គ្រងនោះទេ។
កម្មការិនី ណារី ក្នុងចំណោមកម្មការិនីបួននាក់ ដែលចោទអ្នកគ្រប់គ្រងថាបៀតបៀនកេរ្តិ៍ខ្មាសបានប្រាប់ភ្នំពេញ ប៉ុស្តិ៍ថា សមត្ថកិច្ចបានរុញច្រានក្រុមកម្មករដោយកម្លាំងបាយ ហើយកម្មករពីរនាក់បានរងរបួស។
អ្នកនាងថា អ្នកគ្រប់គ្រងជនជាតិបង់ក្លាដែសឈ្មោះ Faruk Ahmad បានស្ទាបអង្អែលដៃនាង ហើយបានឲ្យលេខទូរស័ព្ទប្រាប់ឲ្យអ្នកនាងតេទៅគាត់។
នៅពេលនាងមិនធ្វើតាមគាត់ចង់បាន គាត់បានហាមមិនឲ្យអ្នកនាងធ្វើការងារថែមម៉ោង។
ណារី បន្តថា៖ «ខ្ញុំប្រាប់នគរបាលអំពីអ្វីដែលបានកើតឡើងចំពោះខ្ញុំ ហើយខ្ញុំបានដាក់ពាក្យប្តឹងរកយុត្តិធម៌សម្រាប់ខ្លួនខ្ញុំ និងសម្រាប់កម្មករដទៃទៀត»។
កម្មការិនីម្នាក់ទៀតដែលសុំមិនបញ្ចេញឈ្មោះ ក៏មានភស្តុតាងចំពោះករណីបៀតបៀនកេរ្តិ៍ខ្មាសនេះដែរ ដោយអ្នកនាងមានសារផ្ញើតាមទូរស័ព្ទពីបុរសនោះ។
នាងថា៖ «គាត់ឮថា ខ្ញុំត្រូវការប្រាក់ ហើយបានសុំឲ្យខ្ញុំទៅក្រៅជាមួយគាត់ និងគេងជាមួយគាត់ ក្នុងតម្លៃ២០ដុល្លារ ក្នុង១យប់។ ខ្ញុំប្រាប់គាត់ថា ខ្ញុំត្រូវការប្រាក់ដែលបានពីការងាររបស់ខ្ញុំ មិនមែនពីការដេកជាមួយគាត់ទេ»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករថ្លែងថា លោកខកចិត្តដែលក្រុមហ៊ុនមិនរកដំណោះស្រាយមួយសម្រាប់ កម្មការិនីទាំងនោះ។
អ្នកស្រី Jill Tucker ទីប្រឹក្សា បច្ចេកទេសនៃកម្មវិធីរោងចក្រកាន់តែប្រសើរនៅកម្ពុជា បានថ្លែងថា គាត់បារម្ភយ៉ាងខ្លាំងពាក់ព័ន្ធនឹងការបៀតបៀនកេរ្តិ៍ខ្មាស។
អ្នកស្រីបន្តថា៖ «ដោយយើងរកមិនឃើញករណីនេះនៅរោងចក្រដទៃទៀត វាមិនមានន័យថា ករណីបែបនេះមិនកើតមាននៅរោងចក្រផ្សេងនោះទេ។ វាពិបាកនឹងឲ្យកម្មការិនីស្តែងចេញ»។
អ្នកស្រីបន្តថា ៖ «កម្មករខ្លះស្ទាក់ស្ទើរមិនហ៊ាននិយាយទេដោយសារពួកគេមិនចង់ បាត់បង់ការងារ ប៉ុន្តែបើមានការគាំទ្រទាំងស្រុងពីរោងចក្រ បញ្ហានេះងាយនឹងប្រាប់ទេ»។
អ្នកស្រី Tucker បន្តថា ៖ «វាមិនមែនជាអ្វីដែល Gap នឹងអត់ឱនឲ្យនោះទេ ហើយពួកគេបានស្នើសុំឲ្យយើងធ្វើការស៊ើបអង្កេត»។
លោក Dave Welsh នាយកប្រចាំប្រទេសនៃមជ្ឈមណ្ឌលអាមេរិកដើម្បីសាមគ្គីភាពពលកម្មអន្តរជាតិ(ACILS) ថ្លែងថា ការដែលមានចំនួនកម្មករដ៏ច្រើនបែបនេះនាំគ្នាធ្វើការតវ៉ា សម្រាប់បញ្ហានោះ វាបង្ហាញយ៉ាងច្បាស់អំពីតម្រូវការឲ្យមានការដោះស្រាយបញ្ហានោះ។
លោក ជួន វិច្ឆិកា ប្រធានរដ្ឋបាលនៅរោងចក្រអូសេអង់មិនអាចទាក់ទងបានទេ កាលពីម្សិលមិញ៕
No comments:
Post a Comment
yes