ប្រទេសកម្ពុជា ត្រៀមស្វាគមន៍អគ្គលេខាធិការអង្គការសហប្រជាជាតិ លោក បាន គីម៉ូន (Ban Ki-moon) មកទស្សនកិច្ចជាលើកទី២ នៅខែវិច្ឆិកា ឆ្នាំ២០១២ ខាងមុខនេះ។
អគ្គលេខាធិការអង្គការសហប្រជាជាតិ លោក បាន គីមូន (Ban Ki-moon) ក្នុងអំឡុងពេលធ្វើទស្សនកិច្ចនៅសារមន្ទីរប្រល័យពូជសាសន៍ខ្មែរក្រហម ឬគុកទួលស្លែង នៅថ្ងៃទី២៨ ខែតុលា ឆ្នាំ២០១០។
អគ្គលេខាធិការអង្គការសហប្រជាជាតិ លោក បាន គីម៉ូន គ្រោងមកទស្សនកិច្ច និងចូលរួមក្នុងកិច្ចប្រជុំកំពូលអាស៊ាន នៅប្រទេសកម្ពុជា ដែលគ្រោងធ្វើនៅខែវិច្ឆិកា ឆ្នាំ២០១២ ខាងមុខនេះ នៅគ្រាដែលប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) និងនាយករដ្ឋមន្ត្រីចិន លោក វិន ជាបាវ (Wen Jiabao) ក៏នឹងមកចូលរួមក្នុងកិច្ចប្រជុំកំពូលអាស៊ាននោះដែរ។
ដំណើរទស្សនកិច្ចរបស់លោក បាន គីម៉ូន ខាងមុខនេះ ត្រូវបានបញ្ជាក់ដោយអគ្គលេខាធិការរងអង្គការសហប្រជាជាតិ អ្នកស្រី ណូអីឡែន ហៃហ្សឺ (Noeleen Heyzer) ដែលបានមកជួបជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី នៅថ្ងៃទី២៣ ខែសីហា ឆ្នាំ២០១២ ផ្ដោតលើការអភិវឌ្ឍនៅប្រទេសកម្ពុជា និងការតភ្ជាប់ហេដ្ឋារចនាសម្ព័ន្ធអាស៊ាន នៅឆ្នាំ២០១៥។
គេរំពឹងថា មេដឹកនាំមកពីប្រទេសសំខាន់ៗចំនួន២៨ប្រទេស មកចូលរួមក្នុងកិច្ចប្រជុំកំពូលអាស៊ាន នោះ រាប់ទាំងមេដឹកនាំនៃប្រទេសសមាជិកអាស៊ានចំនួន១០ និងប្រទេសដៃគូរបស់អាស៊ាន ចំនួន១៨ទៀត។
រដ្ឋលេខាធិការក្រសួងការបរទេសកម្ពុជា លោក អ៊ុជ បូរិទ្ធិ បានមានប្រសាសន៍ប្រាប់អ្នកកាសែត នៅថ្ងៃទី២៣ ខែសីហា នៅក្រសួងការបរទេសថា កម្ពុជាកំពុងតែត្រៀមស្វាគមន៍ទស្សនកិច្ចសំខាន់នោះ៖ «លោកជំទាវសង្ឃឹមថា នឹងបានមកទស្សនកិច្ចជាថ្មីម្តងទៀតនៅកម្ពុជា ជាមួយឯកឧត្តមអគ្គលេខាធិការអង្គការសហប្រជាជាតិ ដែលនឹងគ្រោងមកបំពេញទស្សនកិច្ចកម្ពុជា ក្នុងឱកាសកិច្ចប្រជុំកំពូលអាស៊ាន ហើយនិងកិច្ចប្រជុំកំពូលអាស៊ីបូព៌ា (East Asian Summit) នៅខែវិច្ឆិកា ឆ្នាំ២០១២ នេះ។ ឯកឧត្តមឧបនាយករដ្ឋមន្ត្រី ហោ ណាំហុង ក៏បានសុំស្នើអញ្ជើញឯកឧត្តមអគ្គលេខាធិការមកចូលរួមហៅថា Asian Global Dialogue ដែលមានការចូលរួមប្រជុំពីសំណាក់ថ្នាក់ដឹកនាំពិភពលោក និងស្ថាប័នហិរញ្ញកិច្ចរបស់ពិភពលោកចូលរួមផងដែរ»។
ទាក់ទងនឹងដំណើរទស្សនកិច្ចខាងមុខនេះ របស់លោក បាន គីម៉ូន អ្នកនាំពាក្យសាលាក្តីខ្មែរក្រហម លោក នេត្រ ភ័ក្ត្រា បានមានប្រសាសន៍ថា ទស្សនកិច្ចរបស់លោក បាន គីម៉ូន និងផ្តល់មកនូវសញ្ញាវិជ្ជមានសម្រាប់សាលាក្តីខ្មែរក្រហមផង និងប្រទេសកម្ពុជា ផង៖ «ដោយសារថា ភាគីអង្គការសហប្រជាជាតិ គឺជាភាគីមួយនៅក្នុងដំណើរការតុលាការខ្មែរក្រហមនេះ ជាមួយនឹងរាជរដ្ឋាភិបាលកម្ពុជា អ៊ីចឹង ទាំងភាគីជាតិ និងអន្តរជាតិ នៅសាលាក្តីខ្មែរក្រហមនេះ កំពុងតែជួបប្រទះនូវបញ្ហាថវិកា។ ដូច្នេះ ការដំណើរទស្សនកិច្ចរបស់លោក បាន គីម៉ូន ក៏ដូចជាប្រទេសម្ចាស់ជំនួយនានា នៅក្នុងប្រទេសកម្ពុជា ជាការលើកទឹកចិត្ត ហើយយើងសង្ឃឹមថា ប្រទេសម្ចាស់ជំនួយលោកនឹងបន្តផ្តល់នូវជំនួយបន្ថែមទៀត មកកាន់តុលាការខ្មែរក្រហមនេះ ដើម្បីអាចឲ្យតុលាការនេះអាចដំណើរការរបស់ខ្លួនដោយចប់ចុងចប់ដើម»។
លោកបន្តថា កាលពីឆ្នាំ២០១១ កន្លងទៅនេះ សាលាក្តីខ្មែរក្រហមបានចំណាយថវិកាសរុបចំនួនជាង១៤១លានដុល្លារអាមេរិក ក្នុងនោះភាគីអន្តរជាតិបានចំណាយថវិកាចំនួន១០៧លានដុល្លារអាមេរិក និងភាគីកម្ពុជា បានចំណាយថវិកាចំនួន៣៤លានដុល្លារអាមេរិក។ បច្ចុប្បន្ន សាលាក្តីខ្មែរក្រហម ខាងភាគីអង្គការសហប្រជាជាតិ កំពុងតែខ្វះខាតថវិកា។
អគ្គលេខាធិការអង្គការសហប្រជាជាតិ លោក បាន គីម៉ូន ធ្លាប់បានមកទស្សនកិច្ចនៅប្រទេសកម្ពុជា ម្តងហើយ កាលពីខែតុលា ឆ្នាំ២០១០ កន្លងទៅនេះ នៅពេលនោះហើយ លោកនាយករដ្ឋមន្ត្រី ហ៊ុន សែន បានស្នើថា កម្ពុជាមិនចង់ឲ្យសាលាក្តីខ្មែរក្រហមបន្តឲ្យមានការកាត់ទោសមេដឹកនាំខ្មែរក្រហម នៅក្នុងសំណុំរឿង០០៣ ដោយសារតែលោកមានការព្រួយបារម្ភថា នឹងបង្កឲ្យមានអស្ថិរភាពជាតិ៕
No comments:
Post a Comment
yes