កំពង់ចាម ៖ សព្វថ្ងៃនេះ លី ឈុនអ៊ូ មេឈ្មួញរកស៊ីឈើគ្រញូងខុសច្បាប់ នៅខេត្ដកំពង់ចាមបានពង្រីកអំណាចនិងបណ្ដុះបក្ខពួកដែលជាបងប្អូនកូនក្មួយរបស់ខ្លួនឲ្យចេះរកស៊ីដឹកជញ្ជូនឈើគ្រញួង យ៉ាងគគ្រឹកគគ្រេងពេញ ឃុំអូរស្វាយ ស្រុកកំពង់សៀម ដែលភាគច្រើនមានការ ដឹកជញ្ជូនឈើចេញពីខេត្ដ ព្រះវិហារ ឧត្ដរមានជ័យ ឆ្លងកាត់ខេត្ដកំពង់ចាមឆ្ពោះទៅកាន់ប្រទេសវៀតណាម គ្មានសមត្ថកិច្ចឬ មន្ត្រីជំនាញណាម្នាក់ហ៊ានចេញមុខបង្ក្រាបសោះឡើយ។
មន្ត្រីជំនាញមួយចំនួនដែលស្រេកឃ្លានតែផលប្រយោជន៍បានជួយសម្រួល រត់ការផ្លូវថែមទៀត ជាពិសេសអាជ្ញាធរឃុំ-ស្រុកព្រោះពួកគេបានផលប្រយោជន៏ពី លី ឈុនអ៊ូ ជាប់ជាប្រចាំ។ ម្យ៉ាងវិញទៀត បក្ខពួកកូនក្មួយ លី ឈុនអ៊ូ ដែលកំពុងរកស៊ីឈើគ្រញួងនោះមានឈ្មោះ លី ឈុនអាង ហៅពៅ ជាប្អូនប្រុស លី ឈុនអ៊ូ មានផ្ទះនៅឃុំអំពិលស្រុកកំពង់សៀមមានរថយន្ដដឹកឈើប្រភេទកាមរីឆ្លាម និងកាមរីស៊េរី ៩៣-៩៥ ចំនួន ៥-៧គ្រឿង។ ឈ្មោះ លី ឡាយ ជាក្មួយ លី ឈុនអ៊ូ មានផ្ទះនៅជិត លី ឈុនអ៊ូ មានរថយន្ដប្រភេទធុនត្រាប្រមាណ ៣-៥ គ្រឿង និង លី ឈុនអ៊ូ មានរថយន្ដ ឡង់គ្រីស័រ ឡង់រ៉វែរ និងលុចស៊ីស ចំនួន ៤-៦គ្រឿង។
ជាក់ស្ដែងកាលពីថ្ងៃទី ១៧-១៨ ខែសីហា ឆ្នាំ២០១២ ចាប់ពីម៉ោង ១៧ និង ១៥ នាទី និងនៅពេលយប់ចាប់ពីម៉ោង ១២ យប់ មានរថយន្តប្រភេទកាមរីហើម និងលុចស៊ីស ៤៧០ , ធុនត្រា, ឆេរលេច្ស ពី ៤ ទៅ ៧ គ្រឿង បើកដង្ហែគ្នាដូចគេហែកឋិននៅលើស្ពានគីហ្សូណា សព្វថ្ងែនេះប្រធានជំនាញរដ្ឋបាលព្រៃឈើខេត្តកំពង់ចាម ក្រោមការគ្រប់គ្រងដោយលោក ប្រាក់ ណូម៉ា បានចាត់តាំងបងើ្កតក្រុមចម្រុះ ដើម្បីទប់ស្កាត់បទល្មើសព្រៃឈើ មានលោក តយ ចាន់ផល នាយរងសង្កាត់រដ្ឋបាលព្រៃឈើស្រុកកងមាសដែលជាមនុស្សជំនិត របស់លោកប្រាក់ ណូម៉ា ជាប្រធាន និងលោក សួរ ដាវី លោក ទឹម សុខុម នាយសង្កាត់រដ្ឋបាលព្រៃឈើកំពង់ចាមគ្រប់គ្រងបីស្រុកគ្មានទប់ស្កាត់អី្វក្រៅពីរាប់ក្បាលឡានយកលុយនោះឡើយ។
គេនៅចាំបានថា លី ឈុនអ៊ូ តែងតែដើរអួតអាងប្រាប់គេឯងថា គាត់គឺជាកូនធម៌របស់អភិបាលខេត្ត កំពង់ចាមហើយយកឥទ្ធិពលរបស់ថ្នាក់ដឹកនាំមួយចំនួន ទៅប្រើប្រាស់ក្នុងការកាងជំនួញឈើខុសច្បាប់យ៉ាងអនាធិបតេយ្យ។ ដូចជាពេលកន្លងមក លី ឈុនអ៊ូ បានប្រើប្រាស់រថយន្តទំនើបៗដឹកជញ្ជូនឈើគ្រញូងដោយបង្កប់ ជាមួយក្បួនរថយន្តរបស់គណៈប្រតិភូ ប៉ុន្តែត្រូវបានកម្លាំងកងរាជអាវុធហត្ថបង្ក្រាបបានទាន់ពេលវេលា។ មន្ត្រី និងសមត្ថកិច្ចមួយចំនួនបានចាត់ទុកថា លី ឈុនអ៊ូ គឺជាប្រភេទខ្លាក្រដាស ដែលចូលចិត្តយកឥទ្ធិពលមន្ត្រីមានអំណាច ទៅប្រើប្រាស់ក្នុងការស្វែងរកផលប្រយោជន៍ផ្ទាល់ខ្លួន ដែលករណីនេះជាការផ្គើនចំពោះបទបញ្ជាលេខ ០១ របស់រាជរដ្ឋាភិបាលដែលកំពុងត្រូវបានរឹតបន្តឹងផងដែរ។
សមត្ថកិច្ចបានឱ្យដឹងថា មួយរយៈនេះ លី ឈុនអ៊ូ បានចេញមុខដោយផ្ទាល់នាំឡានខ្សែទំនើបៗដឹកឈើគ្រញូង ហើយចំពោះជំនាញរដ្ឋបាលព្រៃឈើតាំងពីខេត្ដសៀមរាប ដល់ខេត្តកំពង់ចាម បើដឹងថាឡានឈើរបស់ លី ឈុនអ៊ូ ម្នាក់ៗមិនហ៊ានប៉ះពាល់ទេ គ្រាន់តែរាប់ក្បាលឡានដើម្បីឱ្យ លី ឈុនអ៊ូ មកទូរទាត់ប្រាក់តែប៉ុណ្ណោះ។ កាលពីពេលមុន លី ឈុនអ៊ូ តែងតែប្រើប្រាស់ឡានខ្សែនិងឡានស៊ឺរ៉ែនដឹកជញ្ជូន ឈើគ្រញូងចេញពីខេត្ដសៀមរាប និងខេត្ដឧត្ដរមានជ័យ មកស្ដុកទុកនៅផ្ទះរបស់ខ្លួន ក៏ដូចជាផ្ទះបងប្អូននៅចំណុចត្រើង ផ្លូវបំបែកទៅស្រុកចំការលើ ខេត្ដកំពង់ចាម រួចហើយ លី ឈុនអ៊ូ តែងតែដឹកជញ្ជូនឈើទាំងនោះពីខេត្ដកំពង់ចាមទៅប្រទេស វៀតណាមតាមច្រកមួយចំនួនក្នុងស្រុកមេមត់ ។ ចំពោះមុខរបរដឹកជញ្ជូនឈើគ្រញូងកន្លងមក លី ឈុនអ៊ូ តែងតែប្រើប្រាស់ឈ្មោះថ្នាក់លើមួយចំនួន ដើម្បីកាងឡានដឹកឈើគ្រញូងទាំងខ្សែៗផងដែរ៕
No comments:
Post a Comment
yes