ប៉ោយប៉ែត ៖ តំបន់ប្រជុំជនជាយដែនប៉ោយប៉ែតគឺជាក្រុងមួយដែលមានមនុស្សមកតាំងលំនៅដ្ឋានពីបណ្តាខេត្តក្រុងនានាក្នុងព្រះរាជាណាចក្រកម្ពុជាហើយក្រុងមួយនេះសម្បូរពោរពេញទៅដោយបនល្បែងគ្រប់រូបភាពទាំងស្របច្បាប់ និងខុសច្បាប់បើទោះជាមានបនល្បែងច្រើនប្រភេទក៏ដោយក៏មន្ត្រីពាក់ព័ន្ធនៅជុំវិញក្រុងនេះមិនខ្ចីធ្វើដឹងធ្វើឮឡើយ។ ភាពអនាធិបតេយ្យនេះត្រូវបានរដ្ឋាភិបាលដាក់ចេញនូវគោលនយោបាយស្តីពីភូមិ-ឃុំមានសុវត្ថិភាពជាប្រយោជន៍ដើម្បីធ្វើឲ្យប្រជាពលរដ្ឋនៅថ្នាក់មូលដ្ឋានរស់ក្នុងភាពកក់ក្តៅគ្មានការភ័យខ្លាច។
ប៉ុន្តែផ្ទុយទៅវិញនៅតំបន់នៃក្រុងប៉ោយប៉ែត នេះក្នុងរយៈពេលថ្មីៗនេះមានក្រុមចោរឆក់ប្លន់ និងគាស់ផ្ទះបានធ្វើសកម្មភាពយ៉ាងគគ្រឹកគគ្រេងបង្កឲ្យប្រជាពលរដ្ឋក្នុងក្រុងប៉ោយប៉ែតមានការភិតភ័យជាខ្លាំង។ កត្តាទាំងនេះគឺវាបណ្តាលមកពីអាជ្ញាធរ និងសមត្ថកិច្ចពាក់ព័ន្ធខ្វះសមត្ថភាពលើការពង្រឹងប្រព័ន្ធសន្តិសុខសង្គម ប៉ុន្តែអ្វីដែលធ្វើឲ្យប្រជាពលរដ្ឋកើតការសង្ស័យនោះគឺហាងទទួលបញ្ចាំយីហោ ស្រីតុប នៅផ្លូវដើមពុទ្រាជាប់របងកាស៊ីណូដើមពុទ្រាស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ អាចជាប្រភពបទល្មើស គួរឲ្យព្រួយបារម្ភ។
ប្រភពមួយបានឲ្យដឹងថា ហាងយីហោ ស្រីតុប នេះមានការគាំទ្រពីអ្នកធំម្នាក់នៅក្រុងប៉ោយប៉ែតនេះហើយហាងទទួលបញ្ចាំនេះធ្លាប់ត្រូវបានសមត្ថកិច្ចប៉េអឹមក្រុងចុះទៅហ៊ុមព័ទ្ធម្តងរួចមកហើយ។ ក្រោយមកគេបានឃើញហាងមួយនេះត្រូវបានផ្អាកដំណើរការមួយរយៈ ប៉ុន្តែស្រាប់តែថ្មីៗនេះ ហាងទទួលបញ្ចាំខាងលើបើកដំណើរការយ៉ាងរលូនដោយគ្មានកិច្ចសហការជាមួយសមត្ថកិច្ចមូលដ្ឋានសោះឡើយ ហើយបុរសម្នាក់បានអះអាងថា ខ្លួនជាម្ចាស់ហាងបានប្រាប់ភ្នាក់ងារយើងថា ហាងរបស់គេមានការពឹងពាក់ពីបណ្តាញទូរទស្សន៍ក្នុងស្រុកមួយនៅក្រុងប៉ោយប៉ែតជាអ្នកនៅពីក្រោយខ្នងផងដែរ លើសពីនេះទៅទៀតបុរសរូបនេះបានបន្តប្រាប់ទៀតថា លោក អ៊ុំ សុផល ក៏ដឹងរឿងនេះផងដែរ។
ចំណែកលោក អ៊ុំ សុផល អធិការប៉ូលិសក្រុងបានប្រាប់ភ្នាក់ងារយើងថា ហាងយីហោ ស្រីតុប ខាងលើនេះលោកពិតជាគ្មានការពាក់ព័ន្ធជាមួយទេ ប៉ុន្តែកន្លងមកលោកធ្លាប់បានហៅសួរនាំអំពីការទទួលវត្ថុត្រូវគេបញ្ចាំ បើពាក់ព័ន្ធករណីទទួលផលចោរកម្មនោះត្រូវតែមានទោសព្រោះហាងនេះមិនមានច្បាប់គ្រប់គ្រាន់ទេ។ ដោយឡែកលោក ហម ម៉ុត មេបញ្ជាការប៉េអឹមក្រុងប៉ោយប៉ែតបានមានប្រសាសន៍ថា អារឿងហាងលើកយីហោទទួលបញ្ចាំនេះមិនទាន់មានច្បាប់ជាផ្លូវការទេហើយម្ចាស់ហាងក៏គេមិនបានជូនដំណឹងឲ្យលោកបានដឹងនោះទេ ប៉ុន្តែបើមានបញ្ហាលោកត្រូវតែមានវិធានការតាមផ្លូវច្បាប់។
បើទោះជាបែបណាក្តីសម្រាប់ម្ចាស់ហាងទទួលបញ្ចាំបានប្រាប់ភ្នាក់ងារយើងថា គេហ៊ានទទួលតែមាស ពេជ្រ ទូរស័ព្ទដៃ ប៉ុន្តែរឿងរថយន្តគេមិនមានជំនាញនៅឡើយទេ។ ចំណែកប្រជាពលរដ្ឋបាននាំគ្នាលើកឡើងថា បើមានហាងទទួលបញ្ចាំបែបនេះអំពើចោរកម្ម នឹងមិនស្ងប់ស្ងាត់ទេ ជាក់ស្តែងកាលពីប៉ុន្មានថ្ងៃមុននេះមានបទល្មើសកើតឡើងផ្ទួនៗគួរឲ្យព្រួយបារម្ភជាទីបំផុត៕
No comments:
Post a Comment
yes