ចលនាប្រជាធិបតេយ្យសង្គ្រោះជាតិ នឹងនាំមកនូវក្តីសង្ឃឹមថ្មីជូនប្រជាពលរដ្ឋខ្មែរ បន្ទាប់ពីបានបង្កើតគណបក្ស សង្គ្រោះជាតិ ដើម្បីចូលរួមក្នុងការបោះឆ្នោតឆ្នាំ២០១៣

អុប្រធាន និង ប្រធាន ចលនាប្រធាធិបតេយ្យសង្គ្រោះជាតិ

ដោយឈរលើស្មារតីស្រលាញ់ពលរដ្ឋ និងជាតិមាតុភូមិ គណបក្ស សម រង្ស៊ី និងគណបក្ស សិទ្ធិ មនុស្ស បានរួមបញ្ចូលគ្នាជាសម្លេងតែមួយ ដើម្បីចូលរួមក្នុងការបោះឆ្នោតថ្នាក់ជាតិ អាណត្តិទី៥ នៅថ្ងៃទី២៨ ខែកក្កដា ឆ្នាំ២០១៣ ដើម្បីសង្គ្រោះពលរដ្ឋ និងប្រទេសជាតិរបស់យើងពីគណបក្ស​កាន់អំណាចសព្វថ្ងៃ ដែលដឹកនាំប្រទេសតាមបែបផ្តាប់ការ បក្ខពួកនិយម និងគ្រួសារនិយម ដែល​ធ្វើ​បាបរាស្រ្តឲ្យរងទុក្ខគ្មានពេលស្បើយ ។

ដោយឈរលើឆន្ទះតែមួយបែបនេះហើយ បន្ទាប់ពីការប្រជុំអស់រយៈពេលពីរថ្ងៃនៅប្រទេស​ហ្វីលីពីន គណបក្ស សម រង្ស៊ី និងគណបក្ស សិទ្ធិមនុស្ស បានបង្កើត ចលនាប្រជាធិបតេយ្យ​សង្គ្រោះជាតិ ចេញជារូបរាងភ្លៀមៗដើម្បីទាញយកប្រជាប្រិយភាពពីប្រជាពលរដ្ឋដែរជាអ្នកគាំទ្រ គណបក្សទាំងពីរ ទាំងក្នុងប្រទេស និងក្រៅប្រទេស ។

លោកស្រី មូរ សុខហួរ ដែលជាប្រធានលេខាធិការរដ្ឋាន ចលនាប្រជាធិបតេយ្យសង្គ្រោះជាតិ នៅក្នុងពិធីចុះជួបជាមួយប្រជាពលរដ្ឋនៅតាមមូលដ្ឋានដែលជាអ្នកគាំទ្រ និង សកម្មជនរបស់ គណបក្សទាំងពីរបានមានប្រសាសន៏ឲ្យដឹងថា អ្វីដែលគណបក្ស សម រង្ស៊ី និងគណបក្ស សិទ្ធិ មនុស្ស សម្រេចបាននៅពេលនេះគឺជាអ្វីដែលប្រជាពលរដ្ឋខ្មែរទាំងក្នុងប្រទេសនិងក្រៅប្រទេស លោកចង់បាន ព្រោះមិនចង់ឲ្យមានសម្លេងគណបក្សប្រឆាំងពីរដែលធ្វើឲ្យបែកសម្លេង និង​មិន​ងាយអាចយកឈ្នះលើគណបក្សប្រជាជនរបស់លោក ហ៊ុន សែន បាន ព្រោះគណបក្សប្រជាជន គេមានខ្នងបង្អែករបស់គេដែលជាឧបករណ៏នយោបាយគឺគណៈកម្មាធិការជាតិរៀបចំការបោះឆ្នោត ដែលគេបានធ្វើប្រាស់ចាកពីឆន្ទះរបស់ប្រជាពលរដ្ឋ ដោយបានលួចបន្លំសន្លឹកឆ្នោត និង ផ្តល់ការពិបាកដល់ប្រជាពលរដ្ឋក្នុងការចុះឈ្មោះ និងទៅបោះឆ្នោត ដើម្បីជ្រើសរើសយក​តំ​ណាង​​​របស់ពួកគាត់ ដែលគេដឹងថាពលរដ្ឋទាំងនោះគឺជាអ្នកគាំទ្រគណប្រឆាំង ។

លោកស្រី មូរ សុខហួរ បានមានប្រសាសន៏ទៀតថា កម្លាំងអ្នកប្រជាធិបតេយ្យដែរចាប់ផ្តើមពី​គណ​បក្ស សម រង្ស៊ី និងគណបក្ស សិទ្ធិមនុស្ស បន្ទាប់ពីបង្កើតបាន ចលនាប្រជាធិបតេយ្យ​សង្គ្រោះជាតិ ហើយនោះនិងឆ្ពស់បន្តទៅបង្កើតគណបក្សថ្មីមួយទៀតគឺគណបក្ស សង្គ្រោះជាតិ ។ លោកស្រីថា គណបក្ស​ សង្គ្រោះជាតិ ពិតតែមិនទាន់បានបង្កើតជាផ្លូវការ និងធ្វើពីធីសមាជ គណបក្សក្តី ក៏ប៉ុន្តែយើងបានឃើញហើយថា គណបក្សមួយនេះមានមូលដ្ឋានគ្រឹះរួមជាស្រេច ទៅហើយ ដូចជាយើងមានកម្លាំងនៅតាមមូលដ្ឋាន និងថ្នាក់ជាតិ ហើយគណបក្សថ្មីដែលបាន បង្កើតឡើងដោយអ្នកប្រជាធិបតេយ្យនេះ នឹងទាមទារឲ្យមានការបោះឆ្នោតដោយសេរី ត្រឹមត្រូវ និង យុត្តិធម៌ តាមស្តង់ដាអន្តរជាតិ មិនមែនតាមគណៈកម្មាធិការជាតិរៀបចំការបោះឆ្នោតដែល មានក្បាលម៉ាស៊ីនជាមនុស្សរបស់គណបក្សប្រជាជន រហូតដល់ថ្នាក់ក្រោម ដែលពួកគេខិតខំធ្វើ​យ៉ាងណាឲ្យគណបក្សប្រជាជន ឈ្នះតែឯង ឈ្នះជានិច្ច ឈ្នះជារហូតនោះ ដោយមិនខ្ចីខ្វល់ពី​ការរិះគន់ជុំទិសនោះឡើយ ។

ជាមួយគ្នានោះលោកស្រី មូរ សុខហួរ ក៏បានមានប្រសាសន៏បញ្ជាក់បន្ថែមទៀតផងដែរថា ការ​បោះឆ្នោតនៅថ្ងៃទី២៨ ខែកក្កដា ឆ្នាំ២០១៣ ដែលធ្វើឲ្យយើងអាចទទួលយកបាន បន្ទាប់ពីមាន​ការកែសម្រួល ថ្នាក់ដឹកនាំស្ថាប័នគណៈកម្មាធិការជាតិរៀបចំការបោះឆ្នោតហើយនោះ លុះត្រា តែជាការបោះឆ្នោតមួយដែរអនុញ្ញាត្តិ និងផ្តល់នូវសិទ្ធិពេញលេញ ជូនទៅដល់ប្រធាននៃគណ​បក្សប្រឆាំង ឲ្យវិលត្រឡប់មកប្រទេសកម្ពុជាវិញដោយសេរី ដោយមិនមានការគាបសង្កត់តាម រយៈប្រព័ន្ធតុលាការ ដែលជាឧបករណ៏នយោបាយដូចសព្វថ្ងៃនេះ ។ លោកស្រី មូរ សុខហួរ បាន មានប្រសាសន៏ដោយអំពាវនាវឲ្យប្រជាពលរដ្ឋទាំងអស់ទទួលស្គាល់ថាលោក សម រង្ស៊ី ប្រធាន ចលនា​ប្រជាធិបតេយ្យសង្គ្រោះជាតិ មិនមែនជាទណ្ឌិតដូចជាការចោទប្រកាន់របស់តុលាការ​ដ៏អយុត្តិធម៌ នៅស្រុកខ្មែរ និងក្រុមគណបក្សប្រជាជនដែលបានលើកឡើងនោះទេ តែលោក សម រង្ស៊ី គឺជាអ្នកស្នេហាជាតិ ការពារផលប្រយោជន៏របស់ជាតិ និងការពារបូរណ​ភាពទឹកដី​របស់​យើង ដែលបានទទួលរងនូវការរំលោភបំពានពីសំណាក់ប្រទេសជិតខាង ជាពិសេសគឺយួនតែ​ម្តង​ តាមរយៈការបោះបង្គោលព្រំដែនរវាងរដ្ឋាភិបាលខ្មែរ ជាមួយនិងរដ្ឋាភិបាលយួនហាណូយ ។

លោកស្រី មូរ សុខហួរ ក៏បានបញ្ជាក់ផងដែរថា ថ្នាក់ដឹកនាំរបស់គណបក្ស សម រង្ស៊ី និងគណ​បក្ស សិទ្ធិមនុស្ស នៅមូលដ្ឋានចាប់ពីពេលនេះតទៅ គឺត្រូវតែធ្វើការរួមគ្នាតែមួយ ព្រោះយើងជា សម្លេងតែមួយហើយ ដើម្បីបំរើដល់ប្រជាពលរដ្ឋនៅក្នុងមូលដ្ឋាន ក៏ដូចជាកាពារផលប្រយោជន៏ របស់ប្រជាពលរដ្ឋនៅក្នុងមូលដ្ឋាននោះផងដែរ ចំណែកឯនៅថ្នាក់លើវិញ ក៏ដូចគ្នាផងដែរគឺត្រូវ តែបំពេញបេសក​កម្មការងារនេះឲ្យបាន និងឲ្យមានប្រសិទ្ធភាពបំផុត ដោយធ្វើយ៉ាងណា​ដើម្បី​យើងពង្រឹងកម្លាំង តតាំងមួយទល់និងមួយ ជាមួយនិងគណបក្សប្រជាជន ហើយដណ្តើមយក​ជោគជ័យឲ្យបាននៅថ្ងៃទី ២៨ ខែកក្កដា ឆ្នាំ២០១៣ខាងមុខនេះ ។

លោកស្រី មូរ សុខហួរ ប្រធានអគ្គលេខាធិការរដ្ឋាន ចលនាប្រជាធិបតេយ្យសង្គ្រោះជាតិ បាន​មានប្រសាន៏ឲ្យដឹងទៀតថា បើគិតមកដល់ពេលនេះ ចលនាប្រជាធិបតេយ្យសង្គ្រោះជាតិ បាន​ប្រសូត្រ​ឡើងមិនបានមួយខែផង តែសន្ទុះនៃការគាំទ្រមានការកើនឡើងគួរឲ្យកត់សម្គាល់ ដែល​អ្នកគាំ​ទ្រ​ទាំងអស់នោះ ក៏ជាអ្នកដែលមានប្រភពចេញមកពីគណបក្សប្រជាជនកាន់អំណាច​សព្វ​ថ្ងៃនេះផងដែរ ទាំងសមាជិកនៅថ្នាក់ភូមិ-ឃុំ-ស្រុក-ខេត្ត-ខណ្ឌ័ និងរាជធានី ហើយជាមួយគ្នានោះ​ក៏មានមន្រ្តីជាន់ខ្ពស់របស់គណបក្សប្រជាជន និងឥស្សរជននយោបាយឆ្នើមៗមួយចំនួនទៀត បាន​​សម្តែងការគាំទ្រ និងកោតសរសើរចំពោះគណបក្ស សម រង្ស៊ី និងគណបក្ស សិទ្ធិមនុស្ស ដែល​​បាននាំគ្នាតស៊ូ ជំនះរាល់គ្រប់ឧបស័គ្គ ហើយសម្រេចបានលទ្ធផលដ៏ជោគជ័យ​មួយនេះ​ឡើង ។

លោកស្រីប្រធានអគ្គលេខាធិការដ្ឋាន ចលនាប្រជាធិបតេយ្យសង្គ្រោះជាតិ ក៏បានមានប្រសាសន៏​ អំពាវនាវជាថ្មីម្តងទៀត ដោយស្នើរឲ្យប្រជាពលរដ្ឋខ្មែរអ្នកស្នេហាជាតិ អ្នកប្រជាធិបតេយ្យ​ទាំង​អស់ សូមរួបរួមគ្នានៅក្នុង​ជួរ ចលនាប្រជាធិបតេយ្យសង្គ្រោះជាតិ ព្រោះជាតិយើងកុំពុងតែលិច​លង់ ជាតិយើងកុំពុងតែហិនហោច ប្រទេសកម្ពុជាមានរបបដឹកនាំតាមរបៀបផ្តាច់ការ ដែលបំរើ​បរទេសឈ្លានពាន​ ធ្វើឲ្យប្រទេស​យើង​បាត់បង់ទឹកដី និងត្រូវគេបង្ខិត​ព្រំដែន​តាមតែអំពើចិត្ត ជា​មួយគ្នានោះ ជនអន្តោប្រវេសន៏ខុសច្បាប់កាន់តែច្រើនឡើងៗ​ចូលមករស់នៅស្រុកខ្មែរ ដែលជា​គ្រោះ​ថ្នាក់ដ៏ធំមយយដល់អាយុជីវិតរបស់ប្រទេសជាតិយើង ។

ដូចនេះដើម្បីកុំឲ្យប្រទេសកម្ពុជារបស់យើង ធ្លាក់ចូលទៅក្នុងកណ្តាមដៃរបស់យួន និងដើម្បីកុំឲ្យ ប្រទេសកម្ពុជាយើងក្លាយជាកម្ពុជាក្រោមទី២ សូមបងប្អូនប្រជាពលរដ្ឋខ្មែរទាំងអស់ចូលរួមជា​មួយ ចលនាប្រជាធិបតេយ្យសង្គ្រោះជាតិ ដែលមានលោក សម រង្ស៊ី ជាប្រធាន និងលោក កឹម សុខា​ជាអនុប្រធាន រួមជាមួយនិងអ្នកនយោបាយជើងចាស់មួយចំនួនទៀតក៏ស្ថិតនៅក្នុងជូរ ចល នាប្រជាធិបតេយ្យសង្គ្រោះជាតិ នេះផងដែរ ។