ភ្នំពេញៈ សមាជិកកំពូល នៃគណបក្សរាជានិយមចំនួនពីរបានបង្ហាញសារមួយ សម្រាប់ព្រះអង្គម្ចាស់ នរោត្តម រណឫទ្ធិ ថា ពួកគេកំពុងរួមបញ្ចូលគ្នាដោយមាន ឬមិនមានវត្តមានរបស់ព្រះអង្គ។
គណបក្សហ៊្វុនស៊ិនប៉ិច និងគណបក្សដែលមានឈ្មោះព្រះអង្គម្ចាស់ នរោត្តម រណឫទ្ធិ គឺគណបក្ស នរោត្តម រណឫទ្ធិ គ្រោងធ្វើសមាជមួយនៅខែនេះ សម្រាប់ការពិភាក្សាស្តីពីការរួមបញ្ចូលគ្នា ដែលក្នុងពេលថ្មីៗនេះមានភាពមិនចុះសម្រុងគ្នា រវាងព្រះអង្គម្ចាស់ នរោត្តម រណឫទ្ធិ និងលោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច។
លោក ញឹក ប៊ុនឆៃ និងលោក សៅ រ៉ានី អគ្គលេខាធិការនៃគណបក្សនរោត្តម រណឫទ្ធិ បានប្រាប់ភ្នំពេញ ប៉ុស្តិ៍ កាលពីថ្ងៃម្សិលមិញថា គណបក្សរាជានិយមទាំងពីរនឹងធ្វើសមាជរួមគ្នា បើទោះបីជាព្រះអង្គម្ចាស់ នរោត្តម រណឫទ្ធិ នៅតែប្រឆាំងយ៉ាងណាក៏ដោយ។
លោក សៅ រ៉ានី ដែលមានទំនាស់ជាមួយព្រះអង្គម្ចាស់ នរោត្តម រណឫទ្ធិ ចាប់តាំងពីពេលដែលលោកបានជំរុញជាសាធារណៈឲ្យអតីតនាយករដ្ឋ មន្រ្តីរូបនេះ«សម្រាក»ពីនយោបាយ កាលពីខែមុន។ ព្រះអង្គម្ចាស់នរោត្តម រណឫទ្ធិ បានតបតទៅលោកវិញ ដោយព្យាយាមដកតំណែងរបស់លោក តែមិនទទួលបានជោគជ័យ ឡើយ ហើយព្រះអង្គក៏ព្យាយាមបណ្តេញលោកចេញពីគណបក្សដែរ ប៉ុន្តែទង្វើនេះបានបរាជ័យ បន្ទាប់ពីលោក រ៉ានី បានប្តឹងទៅតុលាការ។
គណបក្សហ៊្វុនស៊ិនប៉ិច នឹងទទួលយកសមាជិកគណបក្ស នរោត្តម រណឫទ្ធិ ដើម្បីរក្សាសម្ព័ន្ធភាពជាផ្លូវការជាមួយគណបក្សពួកគេ រហូតដល់ការបោះឆ្នោតឃុំសង្កាត់ឆ្នាំ២០១៧ ដើម្បីកុំឲ្យបាត់បង់អាសនៈបច្ចុប្បន្នរបស់ពួកគេ។
ទាំងលោកញឹក ប៊ុនឆៃ និងលោក រ៉ានី បានអះអាងថា សមាជិកគណបក្សនរោត្តម រណឫទ្ធិ នៅកម្រិតថ្នាក់មូលដ្ឋានរហូតដល់ថ្នាក់កណ្តាល និងពីក្រោមរហូតដល់លើ នឹងចូលរួមសមាជនេះ បើទោះបីជាកាលបរិច្ឆេទជាក់លាក់មិនទាន់ត្រូវបានកំណត់ក៏ដោយ។
លោក រ៉ានី បានថ្លែងថា៖ «ប្រសិនបើព្រះអង្គម្ចាស់ នរោត្តម រណឫទ្ធិ មិនយល់ព្រមវាគឺជារឿងរបស់ព្រះអង្គ ប៉ុន្តែឆន្ទៈរបស់សមាជិកគឺ ពួកគេនឹងត្រូវរួមបញ្ចូលគ្នា»។ លោកបានបន្តថា៖ «ពួកគេគិតអំពីអនាគតរបស់ពួកគេ»។
អ្នកនាំពាក្យគណបក្សនរោត្តម រណឫទ្ធិ លោក ប៉ែន សង្ហា បានបដិសេធមិនធ្វើអត្ថាធិប្បាយ ដោយថ្លែងថា លោកកំពុងរង់ចាំមើលឲ្យច្បាស់ដែលថា សមាជនេះ នឹងធ្វើឡើងពិតប្រាកដឬអត់? PS
No comments:
Post a Comment
yes