លោកស្រី មូរ សុខហួរ អ្នកតំណាងរាស្រ្តគណបក្សសមរង្ស៊ីមណ្ឌលកំពត នៅរសៀលថ្ងៃព្រហស្បតិ៍នេះ បានដាក់លិខិតមួយច្បាប់ទៅកាន់សាលាឧទ្ធរណ៍របស់ប្រទេសកម្ពុជា ប្រយោជន៍ឲ្យតុលាការថ្នាក់កណ្តាលនេះ បញ្ជាក់ពីការផ្តល់អភ័យឯកសិទ្ធិសភារបស់លោកស្រី។
លោកស្រី មូរ សុខហួរ អ្នកតំណាងរាស្រ្តគណបក្សសមរង្ស៊ី
លោកស្រី មូរ សុខហួរ ត្រូវបានរដ្ឋសភាកម្ពុជាដកអភ័យឯកសិទ្ធិ បន្ទាប់ពីលោកស្រីមានជម្លោះជាមួយលោកនាយករដ្ឋមន្រ្តី ហ៊ុន សែន ក្នុងបណ្តឹងបរិហាកេរ្តិ៍កាលពីឆ្នាំ២០០៩។ បន្ទាប់ពីបញ្ចប់រឿងក្តីនៅថ្ងៃទី០៣ ខែសីហា ឆ្នាំ២០១២ ក្រុមប្រឹក្សាជំនុំជម្រះសាលាឧទ្ធរណ៍បានប្រកាសថា លោកស្រីត្រូវទទួលបាននីតិសម្បទាជាអ្នកតំណាងរាស្រ្តឡើងវិញ ប៉ុន្តែតុលាការទុកពេល៣០ថ្ងៃ ឲ្យតំណាងអយ្យការប្តឹងទាស់ មុននឹងចេញសាលដីកាស្ថាពរ។
បើតាមក្រុមអ្នកច្បាប់ គិតមកត្រឹមថ្ងៃទី០៦ កញ្ញា ឆ្នាំ២០១២នេះ លោកស្រី មូរ សុខហួរ បានបំពេញនីតិវិធីពេញលេញហើយ ដូច្នេះសាលាឧទ្ធរណ៍ត្រូវចេញដីកាស្ថាពរចុងក្រោយ ហើយជំរាបទៅលោក ហេង សំរិន ប្រធានរដ្ឋសភាជាតិ ដើម្បីឲ្យអង្គការនីតិប្បញ្ញត្តិមួយនេះ ប្រគល់អភ័យឯកសិទ្ធិសមាជិកសភាពេញលេញជូនលោកស្រី មូរ សុខហួរ វិញ៕
No comments:
Post a Comment
yes