ក្រុមប្រឹក្សាឃ្លាំមើលកម្ពុជានៅថ្ងៃនេះ បានចេញសេចក្តីថ្លែងការណ៍មួយ ដោយធ្វើការថ្កោលទោសសកម្មភាពរបស់តុលាការ និងអាជ្ញាធរក្រុងភ្នំពេញ ដែលបានចាប់ និងឃុំខ្លួនសកម្មជនដីធ្លីចំនួនពីររូបជាបន្តបន្ទាប់ គឺអ្នកស្រី យោម បុប្ឆា សកម្មជនអ្នកបឹងកក់ និងអ្នកស្រី ទឹម សាក់មុន្នី តំណាងអ្នកសហគមន៍បុរីកីឡា ដោយភាពអយុត្តិធម៌បំផុត។
សេចក្តីថ្លែងការណ៍របស់ក្រុមប្រឹក្សាឃ្លាំមើលកម្ពុជាបានលើកឡើងថា ទង្វើរបស់តុលាការ និងអាជ្ញាធរនាពេលបច្ចុប្បន្ននេះ បានបង្ហាញឲ្យឃើញកាន់តែច្បាប់ថា បាននិងកំពុងយកតួនាទីដ៏សំខាន់ដែលសង្គមផ្តល់ឲ្យ ទៅបម្រើ និងការពារក្រុមហ៊ុន ហើយមកគាបសង្កត់លើប្រជាពលរដ្ឋស្លូតត្រង់ ដែលរងគ្រោះដោយសារក្រុមហ៊ុនរំលោភយកដីធ្លី និងវាយកម្ទេចផ្ទះសម្បែងរបស់ពួកគាត់គ្មានសល់។
ជាមួយគ្នាក្រុមប្រឹក្សាឃ្លាំមើលកម្ពុជាបានហៅតុលាការកម្ពុជាសព្វថ្ងៃនេះថា ជាឧបករណ៍របស់ក្រុមហ៊ុនអ្នកមានលុយ និងមានអំណាចប្រើប្រាស់ ដើម្បីប្រឆាំងជាមួយអ្នកសហជីព អ្នកការពារសិទ្ធិមនុស្ស និងអ្នកតវ៉ាស្របច្បាប់។ ហើយថា បើតុលាការបច្ចុប្បន្នគ្មានការកែលម្អ និងគ្មានឯករាជ្យទេ នោះការគោរពសិទ្ធិមនុស្សនៅកម្ពុជានឹងគ្មានទៀតទេ។
ក្រុមប្រឹក្សាឃ្លាំមើលកម្ពុជាដ៏បានធ្វើការអំពាវនាវផងដែរនៅក្នុងសេចក្តីថ្លែងការណ៍របស់ខ្លួន ឲ្យតុលាការក្រុងភ្នំពេញធ្វើការដោះលែងអ្នកស្រី យោម បុប្ឆា និងអ្នកស្រី ទឹម សាក់មុន្នី ឲ្យមានសេរីភាពឡើងវិញ ព្រោះពួកគាត់កំហុសនោះទេ៕
No comments:
Post a Comment
yes