ភ្នំពេញ: ស្ថានភាពជំនន់ទឹកភ្លៀងបានធូរស្រាល ឯទឹកទន្លេមេគង្គបានស្រកចុះគ្រប់នៅស្ថានីយ តែវាអាចនឹងហក់ឡើងវិញ នៅពេលព្យុះទី១៧ ដែលពេលនេះស្ថិតនៅក្បែរប្រទេសហ្វីលីពីន វាបានទៅដល់អាងទន្លេមេគង្គលើ។ ទឹកទន្លេមេគង្គនៅតែត្រូវបានគេរំពឹងថា មានជំនន់ធំចៀសមិនផុត។
លោកចាន់ យុត្ថា អ្នកនាំពាក្យនិងជានាយកខុទ្ទកាល័យក្រសួងធនធានទឹក និងឧតុនិយម និយាយឲ្យដឹងនៅថ្ងៃទី២១ ខែកញ្ញា ឆ្នាំ២០១២ នេះថា ជំនន់ទឹកភ្លៀងដែលបានពន្លិចខេត្តមួយចំនួនប៉ុន្មានថ្ងៃកន្លងមកនេះវាបានស្រកអស់ទៅវិញហើយ តែភ្លៀងដោយសារឥទ្ធិពលប្រព័ន្ធសម្ពាធទាបនៅតែមានក្នុងក្របខណ្ធទូទាំងប្រទេសដដែល។
លោកចាន់ យុត្ថា បានបញ្ជាក់ថា ប្រព័ន្ធសម្ពាធទាបនៅតែមានឥទ្ធិពលលើព្រះរាជាណាចក្រកម្ពុជា ឯស្ថានភាពទឹកទន្លេមេគង្គបានស្រកបន្តិច តែវានឹងកើនឡើងវិញក្នុងប៉ុន្មានថ្ងៃខាងមុខហើយវាអាចនឹងឡើងដល់កម្រិតកម្ពស់ ៩,៥៥ ម៉ែត្រដូចការព្យាករណ៍លើកទីពីរដែលក្រសួងបានជូនដំណឹងនាពេលកន្លងមក។
ការអះអាងរបស់អ្នកនាំពាក្យខាងលើនេះ បានលើកឡើងដោយយោងទៅលើស្ថានភាពព្យុះ។ ព្យុះដែលបានកើតមានរួចចំនួន១៦ ទើបតែមានមួយទេ ដែលមានឥទ្ធិពលដល់អាងទន្លេមេគង្គ។ ព្យុះក្នុងតំបន់មួយឆ្នាំកើតមានពី២៥ទៅ២៧ព្យុះ និង តែងមានឥទ្ធិពលដោយប្រយោលមកលើព្រះរាជាណាចក្រកម្ពុជាពីបួនទៅប្រាំព្យុះ។
លោកចាន់ យុត្ថា បានឲ្យដឹងទៀតថា ពេលនេះមានព្យុះមួយទៀតបានកើតឡើងនៅភាគកើតប្រទេសហ្វីលីពីន ជាព្យុះទី១៧ មានឈ្មោះជីឡាវ៉ាត់ (JELAWAT) ព្យុះនេះអាចនឹងមានឥទ្ធិពលដល់អាងទន្លេមេគង្គលើហើយធ្វើឲ្យទឹកទន្លេនេះកើនឡើង។ ពេលនេះមន្ត្រីជំនាញកំពុងតែធ្វើការតាមដានដំណើររបស់ព្យុះនេះ។
លោកម៉ៅ ហាក់ អគ្កនាយករងទទួលបន្ទុកកិច្ចការបច្ចេកទេស និងជាប្រធាននាយកដ្ឋានជលសាស្ត្រ នៃក្រសួងធនធានទឹក និងឧតុនិយម និយាយឲ្យដឹងនៅថ្ងៃទី២១ ខែកញ្ញា ឆ្នាំ២០១២នេះថា ទឹកទន្លេមេគង្គបានស្រកចុះនៅគ្រប់ស្ថានីយ តែទឹកទន្លេនេះមិនតូចទេ គឺខ្ពស់ជាង៩ម៉ែត្រនៅពេលមានឥទ្ធិពលព្យុះចូលដល់អាងទន្លេមេគង្គលើ។ ព្យុះទី១៧ ដែលកំពុងមានសកម្មភាពនៅក្បែរប្រទេសហ្វីលីពីន មានដំណើរទៅរកអាងទន្លេមេគង្គលើហើយ។
ចំណែកឯទឹកទន្លេមេគង្គវិញ តាមការព្យាករណ៍របស់នាយកដ្ឋានជលសាស្ត្រនៃក្រសួងធនធានទឹក និង ឧតុនិយម ថ្ងែទី២១ កញ្ញា ឆ្នាំ២០១២ បង្ហាញឲ្យឃីញថា នៅស្ថានីយជលសាស្ត្រខេត្តស្ទឹងត្រែងទឹកមានកម្ពស់៦,៩៥ម៉ែត្រ ទាបជាងថ្ងៃទី២០ខែកញ្ញា០,១៦ម៉ែត្រ។ នៅស្ថានីយជលសាស្ត្រខេត្តក្រចេះទឹកមានកម្ពស់១៧,១១ម៉ែត្រ ទាបជាងថ្ងៃទី២០ខែកញ្ញា០,៣២ម៉ែត្រ។ នៅស្ថានីយជលសាស្ត្រខេត្តកំពង់ចាមទឹកមានកម្ពស់១២,២៤ម៉ែត្រ ទាបជាងថ្ងៃទី២០ ខែកញ្ញា០,២៣ម៉ែត្រ។ នៅស្ថានីយជលសាស្ត្រទន្លេបាសាក់ចតុមុខទឹកមានកម្ពស់៨,៣៦ម៉ែត្រទាបជាងថ្ងៃទី២០ខែកញ្ញា ០,០៤ម៉ែត្រ។ ទឹកបឹងទន្លេសាប នៅស្ថានីយ៍ជលសាស្ត្រក្រគរកំពុងលួង
មានកម្ពស់៦,៩១ម៉ែត្រខ្ពស់ជាងថ្ងៃទី២០ខែកញ្ញា០,០៧ម៉ែត្រ៕
No comments:
Post a Comment
yes