ព្រះវិហារ ៖ ករណីមេឈ្មួញដឹកគ្រឿងសង្ហារឹមគ្មានច្បាប់អនុញ្ញាតឈ្មោះ ស៊ុន សំអាង តាមឡានកូរ៉េ១តោនកន្លះ និងឡានកាមរីកំពុងធ្វើសកម្មភាពយ៉ាងអនាធិបតេយ្យ គ្មានសមត្ថកិច្ចឬជំនាញរដ្ឋបាលព្រៃឈើណាមួយចេញមុខទប់ស្កាត់ឬបង្ក្រាបឡើយ។ ការដឹកជញ្ជូនដោយសេរីបែបនេះ ដោយសារមេឈ្មួញខាងលើបានរត់ការតាមផ្លូវជាមួយសមត្ថកិច្ចនានា ដែលមានភារកិច្ចឈរជើងតាមបណ្តោយផ្លូវលេខ៦២ ចាប់ពីស្រុកជាំក្សាន្តរហូតដល់ផ្លូវបំបែកខេត្តកំពង់ធំ និងពីផ្លូវបំបែកកំពង់ធំផ្លូវជាតិលេខ៦រហូតដល់ទីក្រុងភ្នំពេញបានយ៉ាងរលូន។
បើតាមសេចក្តីរាយការណ៍ព័ត៌មានពីប្រជាពលរដ្ឋបានឲ្យដឹងថា គ្រឿងសង្ហារឹមទាំងអស់នោះមានដូចជា តុ ទូ គ្រែ ធ្វើពីឈើប្រណិតៗមានពេលខ្លះឈ្មោះ ស៊ុន សំអាង បានលួចបង្កប់ឈើប្រណិតនៅពីក្រោមមានដូចជា ធ្នង់ បេង នាងនួន ឬគ្រញូងជាដើម។ មេឈ្មួញម្នាក់នេះតាមធម្មតា ស្លៀកពាក់ឯកសណ្ឋានជាកងទ័ពពាក់ស័ក្តិ៤កន្លះនៅលើស្មា តែបែរជាប្រកបមុខរបរដឹកឈើល្មើសច្បាប់យ៉ាងព្រងើយ។ គេមិនដឹងថាលោកវរសេនីយ៍ទោ ស៊ុន សំអាង នេះនៅអង្គភាពណាមួយឲ្យប្រាកដទេឃើញតែដឹកឈើសោះបែរជាមានស័ក្តិពាក់នៅលើស្មាទៅវិញ។
តាមប្រភពព័ត៌មានពីសមត្ថកិច្ចបានឲ្យដឹងថា លោកវរសេនីយ៍ទោ ស៊ុន សំអាង ហៅតាបាក់បានរកស៊ីដឹកឈើមួយឆ្នាំទល់មួយឆ្នាំមិនដែលមានអ្នកណាហ៊ានចាប់គាត់ឡើយ ប្រហែលជាតាបាក់ បានបង់លុយឲ្យសមត្ថកិច្ចអស់ហើយទើបគ្មាននរណាចាប់ឈើរបស់គាត់។ ប្រភពដដែលបានបន្តថា តាបាក់ តែងតែអួតប្រាប់សមត្ថកិច្ចថា គាត់គឺជាកូនធម៌របស់អ្នកធំម្នាក់ដ៏មានអំណាច បើអ្នកណាហ៊ានចាប់ គាត់នឹងសុំការអន្តរាគមន៍ពីឪពុកធម៌គាត់ភ្លាម។ ប្រភពដដែលបានបញ្ជាក់ថា មេឈ្មួញខាងលើនេះបានដឹកគ្រឿងសង្ហារឹមគ្រប់ប្រភេទទាំងឡានៗក្នុងមួយថ្ងៃៗចេញពីស្រុកជាំក្សាន្តយកទៅភ្នំពេញ ។
ប្រភពដដែលបានដាក់ការសង្ស័យថា ឋានន្តរស័ក្តិថ្នាក់វរសេនីយ៍ទោនេះ ប្រហែលជាឈ្មោះ ស៊ុន សំអាង បានមកពីការតស៊ូដឹកឈើខុសច្បាប់យូរឆ្នាំហើយមើលទៅ ព្រោះពេលខ្លះគាត់បានអួតអាងថា ការដឹកឈើបែបនេះគឺដើម្បីរកលុយសម្រាប់ដោះស្រាយក្នុងអង្គភាព។ គេឆ្ងល់ថា តើអង្គភាពមួយណាដែលខ្វះខាត បែរជាតែងតាំងមេឈ្មួញម្នាក់នេះ ឲ្យដឹកឈើសម្រាប់ ដោះស្រាយអង្គភាពនោះ។ នៅតាមបណ្តោយផ្លូវជាតិលេខ៦២មិនខ្វះទេសមត្ថកិច្ចឈរជើងតាមចំណុចនីមួយៗ ប៉ុន្តែឈ្មោះ ស៊ុន សំអាង បែរជាដឹកឈើប្រភេទគ្រឿងសង្ហារឹមបានដោយសេរី មិនឃើញមានសមត្ថកិច្ចឬជំនាញរដ្ឋបាលព្រៃឈើបង្ក្រាបម្តងណាឡើយ។
គេមិនច្បាស់ទេថាលោក ស៊ុន សំអាង បានប្រើថ្នាំសណ្តំអ្វីដាក់ សមត្ថកិច្ចនិងជំនាញពាក់ព័ន្ធទាំងអស់ឲ្យដេកលក់គ្រប់ៗគ្នា មិនហ៊ានប៉ះពាល់ការដឹកជញ្ជូនឈើខុសច្បាប់ឡើងដុះស្លែរបស់គាត់នោះទេ ។ វរជនខ្មែរ នឹងធ្វើការស៊ើបអង្កេតតាមដានមើលរាល់សកម្មភាពរបស់មេឈ្មួញម្នាក់នេះនិងស្រាវជ្រាវរកមើលថា តើឪពុកធម៌របស់គាត់មានចំណែកក្នងការរកស៊ីដឹកជញ្ជូនឈើខុស ច្បាប់ផ្ទុយពីបទបញ្ជារបស់រាជរដ្ឋាភិបាលឬក៏យ៉ាងណា៕
គេមិនច្បាស់ទេថាលោក ស៊ុន សំអាង បានប្រើថ្នាំសណ្តំអ្វីដាក់ សមត្ថកិច្ចនិងជំនាញពាក់ព័ន្ធទាំងអស់ឲ្យដេកលក់គ្រប់ៗគ្នា មិនហ៊ានប៉ះពាល់ការដឹកជញ្ជូនឈើខុសច្បាប់ឡើងដុះស្លែរបស់គាត់នោះទេ ។ វរជនខ្មែរ នឹងធ្វើការស៊ើបអង្កេតតាមដានមើលរាល់សកម្មភាពរបស់មេឈ្មួញម្នាក់នេះនិងស្រាវជ្រាវរកមើលថា តើឪពុកធម៌របស់គាត់មានចំណែកក្នងការរកស៊ីដឹកជញ្ជូនឈើខុស ច្បាប់ផ្ទុយពីបទបញ្ជារបស់រាជរដ្ឋាភិបាលឬក៏យ៉ាងណា៕
No comments:
Post a Comment
yes