ប៉ោយប៉ែត ៖ កាលពីពេលថ្មីៗនេះគេ សង្កេតឃើញក្រុមមន្ត្រីគយ និងរដ្ឋាករប្រចាំការនៅច្រកទ្វារអន្ដរជាតិប៉ោយប៉ែត កំពុងតែញាប់ដៃញាប់ជើងបញ្ចេញ ឫកពារកាចៗដាក់កម្មករ អូសរទេះ ហើយក្រុមមន្ត្រីគយដែលប្រចាំការនៅចំណុចគល់ប្រាសាទបានប្រព្រឹត្ដផ្ទុយនឹងច្បាប់ប្រមូលពន្ធអាករជូនរដ្ឋ ដូចជាករណីគយខ្លះបានគំរាមកំហែងបង្ខំឲ្យកម្មករត្រូវតែបង់ប្រាក់ឲ្យពួកគាត់តាមតែការទាមទាររបស់ពួកគេ ដោយមិនបានចេញវិក្កយបត្រឲ្យបានត្រឹមត្រូវនោះទេ។
ជាក់ស្ដែងកាលពីថ្ងៃទី០៤ ខែកញ្ញា ឆ្នាំ២០១២នេះ គេបានឃើញសកម្មភាពរបស់មន្ត្រីគយឈ្មោះ លឹម វណ្ណី បានយកសម្ភារៈពីកម្មករអូសរទេះជាថ្នូរនឹងការបង់ប្រាក់ជូនឲ្យពួកគេក្នុងម្នាក់ៗចំនួន ៥០០០០រៀល ក្នុងទំនិញមួយរទេះ ប៉ុន្ដែកម្មករមានប្រាក់ត្រឹមតែ ៣០០០០រៀល ពេលនោះគយត្រូវតែរឹបអូសយកទំនិញនៅក្នុងរទេះ ដែលមានតម្លៃយកទៅដាក់ក្នុងការិយាល័យរបស់ខ្លួន ដើម្បីឲ្យកម្មករចូលទៅសុំយកវិញដែលពេលនោះត្រូវតែបង់ប្រាក់តាមតែក្រុមគយ បានទាមទារ។
កម្មករម្នាក់ដែលប្រកបអាជីព អូសរទេះ សុំមិនបញ្ចេញឈ្មោះ បានឲ្យដឹងថា សព្វថ្ងៃនេះពួកគាត់ជិតដាច់ពោះស្លាប់ហើយព្រោះមុខរបរអូសរទេះ មិនទទួលបានប្រាក់ទុកចិញ្ចឹមឆ្នាំងបាយឡើយ ពោលគឺទំនិញដែលពួកគាត់បាន អូសក្នុងមួយរទេះ ទទួលបានប្រាក់តែ ៥០០០០រៀល សម្រាប់ថ្លៃឈ្នួល ដែលក្នុងនោះត្រូវគយទារយកអស់២៥០០០រៀល កាំកុងត្រូលទារ៥០០០រៀល ប៉ូលិសទារ៥០០០រៀល នៅសល់ប្រាក់ចំនួន២០០០០រៀល ចែកគ្នា២នាក់ បានម្នាក់មួយម៉ឺនរៀល ហើយមានថ្ងៃខ្លះត្រូវរទេះបែកកង់ឯថ្ងៃខ្លះទៀតបាត់បង់ទំនិញត្រូវចេញប្រាក់សងគេ។
ដូច្នេះការប្រកបរបរអូសរទេះនេះមិនបានធ្វើឲ្យគ្រួសាររបស់ពួកគាត់បានធូរធារឡើយ ហើយបើតាមពិនិត្យលើរូបភាពជាក់ស្ដែងសព្វថ្ងៃនេះ ពួកគាត់ត្រូវក្រុមគយ ចោមរោមជាន់កធ្វើឲ្យពួកគាត់ជួបផលពិបាក ខ្លាំងឡើងៗពីមួយថ្ងៃទៅមួយថ្ងៃ ។ ដោយឡែក កាលពីប៉ុន្មានថ្ងៃកន្លងទៅនេះ មន្ដ្រីគយម្នាក់ប្រចាំការច្រកប៉ោយប៉ែត ឈ្មោះ ញ៉ឹម សុខណេង ត្រូវបានក្រុមហ៊ុនធំៗចំនួន១២ ដាក់ពាក្យបណ្តឹងមន្ដ្រីគយរូបនោះពីបទប្រព្រឹត្ដអំពើពុករលួយ កេងប្រវ័ញ្ចប្រាក់ចំណូលរដ្ឋជាដើម ហើយមកទល់ពេលនេះនៅពុំទាន់ដឹងថា ថ្នាក់លើសម្រេចយ៉ាងណានោះទេ។
ចំណែកប្រជាពលរដ្ឋមួយចំនួនបានលើកឡើងថា បើក្រុមគយប្រចាំច្រកទ្វារអន្តរជាតិប៉ោយប៉ែត នៅតែបន្ដប្រព្រឹត្ដអំពើពុករលួយគាបជំរិតទារប្រាក់ពីកម្មករអូសរទេះ បែបនេះតទៅទៀតនោះមុខជាមានផ្ទុះការតវ៉ានៅមុខការិយាល័យគយ និងរដ្ឋាករដូចពេលមុនៗជាក់ជាមិនខានឡើយ។ ជាក់ស្ដែងកាលពីប៉ុន្មានថ្ងៃកន្លងទៅនេះស្ដ្រីម្នាក់ដែលជាឈ្មួញកណ្ដាលបម្រុងនឹងផ្ទុះអំពើហិង្សាទៅលើក្រុមគយទាំងនោះម្ដងមកហើយ គឺដោយសារតែគាត់ ខឹងមន្ត្រី គយដែលហាមមិនឲ្យគាត់ ស៊ីឈ្នួលដឹកទំនិញឲ្យក្រុមហ៊ុនកាស៊ីណូ និងចាប់ទំនិញគាត់ឲ្យបង់ប្រាក់ទៅតាមទំនើងចិត្តរបស់ពួកគេទាមទារ។ ប៉ុន្ដែត្រូវបានលោក ហួន ហៃ ប្រធានការិយាល័យគយនិងរដ្ឋាករនៅទីនោះ បានធ្វើការសម្របសម្រួលឡើងវិញ។
នេះជាភាពអសកម្មដែលមន្ត្រីគយក្រោមការគ្រប់គ្រង របស់ ឈួន ហៃ ដែលទើបឡើងបុណ្យស័ក្តិថ្មីៗ បានប្រព្រឹត្តគឺវាបានឆ្លុះបញ្ចាំងឲ្យឃើញថា មន្ដ្រីគយប្រចាំច្រកទ្វារអន្ដរជាតិ ប៉ោយប៉ែតបានគាបជំរិតកម្មករអូសរទេះ ហើយធូររលុងបំផុតចំពោះក្រុមឈ្មួញធំៗ ដែលផ្តល់ផលប្រយោជន៍ដល់ពួកគេ។ ពាក់ព័ន្ធរឿងគយប្រចាំការក្បែរប្រាសាទច្រកទ្វារប៉ោយប៉ែតភ្នាក់ងារយើងបានទូរស័ព្ទទៅសុំការបំភ្លឺពីលោក ឈួន ហៃ ករណីដែលក្រុមគយរឹតបន្តឹងកម្មករ ប៉ុន្ដែទូរស័ព្ទរបស់លោកមិនអាចទាក់ទងបានទេដោយស្ថិតនៅក្រៅតំបន់ សេវា៕
No comments:
Post a Comment
yes