លោក សម រង្ស៊ី ពេលចុះឈ្មោះក្នុងបញ្ជីឈ្មោះបោះឆ្នោត
ប្រធានគណបក្សសង្គ្រោះជាតិ លោក សម រង្ស៊ី នៅថ្ងៃចន្ទ វេលាម៉ោងជិត៣រសៀលនេះ បានចុះឈ្មោះក្នុងបញ្ជីឈ្មោះបោះឆ្នោត រួចរាល់ហើយ។
លោក សម រង្ស៊ី បានចុះទៅចុះឈ្មោះក្នុងបញ្ជីឈ្មោះអ្នកបោះឆ្នោត នៅការិយាល័យមួយ ក្នុងភូមិព្រែកតាគង់ទី១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយមានសាក្សីចំនួនពីរនាក់ចូលរួមផងដែរ។
លោក សម រង្ស៊ី បានឆ្លើយសំណួរអ្នកសារព័ត៌មាន បន្ទាប់ពីចុះឈ្មោះបោះឆ្នោតថា លោក មិនទាន់មានគម្រោងថាតើនឹងចុះឈ្មោះជាតំណាងរាស្រ្តនៅមណ្ឌលណានៅឡើយទេ។
លោក សម រង្ស៊ី មានប្រសាសន៍ថា លោកនឹងចាកចេញទៅ អង់គ្លេស សហភាពអឺរ៉ុប និងសហរដ្ឋ អាមេរិកនៅយប់ថ្ងៃចន្ទ ដើម្បីជំរុញឲ្យសហគមន៍អន្តរជាតិ កុំទទួលស្គាល់រាជរដ្ឋាភិបាលកម្ពុជា និងរឹតបន្តឹងជំនួយមកកម្ពុជា។ លោកបន្តថា លោកនឹងជួបជាមួយមន្រ្តីអង្គការសហប្រជាជាតិ នៅសហ រដ្ឋអាមេរិក ដើម្បីជំរុញឲ្យដកអាសនៈរដ្ឋាភិបាល ដែលដឹកនាំដោយលោកនាយករដ្ឋមន្រ្តី ហ៊ុន សែន។
VOD មិនទាន់អាចទាក់ទងមន្រ្តីរដ្ឋាភិបាល ដើម្បីសុំការអត្ថាធិប្បាយលើបញ្ហានេះ បាននៅឡើយទេ។
កន្លងទៅ លោក សម រង្ស៊ី មិនមានឈ្មោះជាបេក្ខជនជាប់ជាតំណាងរាស្ត្រ សម្រាប់នីតិកាលទី៥នេះទេ បើយោងតាមបញ្ជីឈ្មោះតំណាងរាស្ត្រជាប់ឆ្នោត ចេញផ្សាយដោយ គជប។លោក សម រង្ស៊ី មិនបានឈរឈ្មោះជាតំណាងរាស្ត្រ ដោយសារ គជប សម្រេចមិនចុះឈ្មោះលោក ពេលលោកមានជាប់ពិរុទ្ធរឿងដកតម្រុយបង្គោលព្រំដែន។ នៅពេលលោកត្រឡប់មកពីប្រទេសបារាំងវិញ មុនការបោះឆ្នោត ថ្ងៃទី២៨ខែកក្កដា គជប លើកឡើងថា វាយឺតពេលទៅហើយ ដោយសារការបោះឆ្នោត ខិតជិតមកដល់។
គណបក្សសង្គ្រោះជាតិ បានទាមទារឲ្យគណៈកម្មាធិការជាតិរៀបចំការបោះឆ្នោត(គ.ជ.ប) លើកពេល ឬពន្យារពេលពិនិត្យបញ្ជីឈ្មោះ និងចុះឈ្មោះបោះឆ្នោត ដែលកំណត់ធ្វើចាប់ពីថ្ងៃទី០១ ដល់ថ្ងៃទី២០ ខែតុលានេះ ដោយសំអាងថា កម្ពុជាកំពុងរងគ្រោះដោយសារទឹកជំនន់ និងមិនទាន់មានឯកភាពជាតិជុំវិញលទ្ធផលបោះឆ្នោត។
ការទាមទារឲ្យលើកពេល ឬពន្យារពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតនេះ គឺដើម្បីទុកពេលឲ្យគណបក្សសង្គ្រោះជាតិ និងគណបក្សប្រជាជនកម្ពុជា បន្តពិភាក្សាគ្នាដោះស្រាយបញ្ហាលទ្ធផលបោះឆ្នោត៕
ប្រភពពី VOD
No comments:
Post a Comment
yes