កណ្តាល ៖ តាមប្រភពរាយការណ៍ពីប្រជាពលរដ្ឋរស់នៅក្រុងតាខ្មៅ ខេត្តកណ្តាល បានឲ្យដឹងថា បច្ចុប្បន្ននេះនៅក្នុងសង្កាត់តាខ្មៅ ជាពិសេសនៅជុំវិញផ្សារតាខ្មៅមានបើកលេងល្បែងស៊ីសងគ្រប់ប្រភេទដូចជា បៀ អាប៉ោង កន្ទុយលេខ យ៉ាងគគ្រឹកគគ្រេងដោយមិនរំខានដល់សមត្ថកិច្ចប៉ូលិស ប៉េអឹមក្រុងតាខ្មៅ បន្តិចសោះឡើយ។ ព្រោះអីល្បែងស៊ីសងអស់ទាំងនេះគឺជាឆ្នាំងបាយរបស់សមត្ថកិច្ចប៉ូលិស និងប៉េអឹម ទើបគ្មានការបង្ក្រាបគឺជាការផ្គើនបំផុតទៅនឹង គោលនយោបាយភូមិឃុំមានសុវត្ថិភាព របស់រាជរដ្ឋាភិបាល។
ប្រភពបានបញ្ជាក់ឲ្យដឹងបន្តទៀតថា ជារៀងរាល់ថ្ងៃគេសង្កេតឃើញសមត្ថកិច្ចប៉ូលិស និងប៉េអឹមក្រុងតាខ្មៅ គិតតែដើរប្រមូលលុយពីវង់ល្បែង និងកន្លែងកត់កន្ទុយលេខតែប៉ុណ្ណោះ ដោយមានការកំណត់ត្រូវតែបង់ជូនដល់សមត្ថកិច្ចប៉ូលិស និងប៉េអឹមគឺក្នុងមួយកន្លែងចាប់ពី ៦ម៉ឺនរៀលដល់២០ ម៉ឺនរៀលក្នុងមួយខែដោយគេគិតតាមវង់តូច ឬធំ។ ទង្វើរបស់សមត្ថកិច្ចប៉ូលិស និងប៉េអឹមក្រុងតាខ្មៅដែលកំពុងតែឃុបឃិតបើកដៃឲ្យពួកក្រុមញៀនល្បែងស៊ីសងដូចជាបៀ អាប៉ោង និងកន្ទុយលេខបើកដំណើរការយ៉ាងគគ្រឹកគគ្រេង ធ្វើឲ្យប្រជាពលរដ្ឋនៅក្រុងតាខ្មៅមានការព្រួយបារម្ភជាខ្លាំងចំពោះភាពអសន្តិសុខនៅក្នុងសង្គម។
ករណីទាំងអស់នេះហើយដែលប្រជាពលរដ្ឋបានរិះគន់ដល់អាជ្ញាធរមូលដ្ឋានដែលហាក់បីដូចជាមានភាពកម្សោយក្នុងការបញ្ជាទៅលើកម្លាំងសមត្ថកិច្ចប៉ូលិស និងប៉េអឹម ឲ្យធ្វើការបង្ក្រាបទៅលើបនល្បែងស៊ីសងគ្រប់ប្រភេទដែលមានបើកលេងយ៉ាងគគ្រឹកគគ្រេងនៅក្រុងតាខ្មៅព្រោះកន្លែងខ្លះនៅនឹងចុងច្រមុះរបស់សមត្ថកិច្ចដូចជានៅជុំវិញផ្សារតាខ្មៅនេះតែម្តង។ ប្រជាពលរដ្ឋមានការព្រួយបារម្ភពីបញ្ហានេះដោយបានសំណូមពរដល់ឯឧត្តម ឈុន ស៊ីរុន ជាអភិបាលខេត្តនិង លោក អ៊ាវ ចំរើន ស្នងការនគរបាលខេត្តកណ្តាលមេត្តាចាត់កម្លាំងពិសេសឲ្យចុះស្រាវជ្រាវបញ្ហានេះជាបន្ទាន់៕
No comments:
Post a Comment
yes