ព្រះវិហារ ៖ កាលពីថ្ងៃទី១៣ ខែកញ្ញា ឆ្នាំ២០១២ មានករណីបញ្ជូនជនរងគ្រោះម្នាក់មកមន្ទីរពេទ្យខេត្ត១៦មករា ប្រចាំខេត្តព្រះវិហារត្រូវរបួសដោយសារទាហានថៃបាញ់ ជនរងគ្រោះមានឈ្មោះ ស្រី សំណាង ភេទប្រុស អាយុ៣១ឆ្នាំ នៅលីវ។ បើតាមសម្តីជនរងគ្រោះបានឲ្យដឹងថា កាលពីព្រឹកថ្ងៃទី១២ខែកញ្ញានេះ ពួកគាត់មានគ្នាប្រហែល៤០នាក់ បានទៅកាប់ឈើគ្រញូងដោយឡើងតាមភ្នំ៧៦០ ក្បែរច្រកអានសេះស្រុកជាំក្សាន្តខេត្តព្រះវិហារ។
មានការរម្លឹកទៀតថា នៅវេលាម៉ោងប្រហែលជា ៨ព្រឹកពួកគាត់បានជួបទាហានថៃមួយក្រុមប្រដាប់ដោយអាវុធធ្វើការបាញ់រះមកលើឈ្មោះ ស្រី សំណាង និងប្រជាពលរដ្ឋឯទៀត ហើយពេលនោះ គាត់បានត្រូវទាហានថៃបាញ់ចំមួយគ្រាប់ត្រង់ក្បាលពោះផ្នែកខាងឆ្វេងចំពីក្រោយធ្លាយដល់ខាងមុខ។ ឈ្មោះ ស្រី សំណាង បានបន្តទៀតថា ពេលដឹងថាត្រូវគ្រាប់ហើយខ្លួនគាត់បានខំប្រឹងរត់ព្រមទាំងមានមិត្តភក្តិខ្លះបានជួយគ្រារត់រហូតបានរួចជីវិត ដោយមិនដឹងថាមាននរណា ម្នាក់ត្រូវរបួស ស្លាប់ឬចាប់ខ្លួនឡើយដោយចុះតាមច្រកអានសេះ។
ឈ្មោះ ស្រី សំណាង មានស្រុកកំណើតនៅភូមិពារាំង ឃុំពារាំង ស្រុកពារាំង ខេត្តព្រៃវែងដោយបានមកលេងបងស្រីនៅភូមិរុងរឿងពីរ ឃុំទឹកក្រហម ស្រុកជាំក្សាន្ត ខេត្តព្រះវិហារ។ តាមប្រភពព័ត៌មានច្បាស់ការមួយបានប្រាប់ឲ្យវរជនខ្មែរដឹងថា ពលករដែលចូលអូសឈើទាំងអស់នេះមានថៅកែម្នាក់ឈ្មោះ រិទ្ធ ដែលអូសឈើយកទៅលក់ឲ្យថៅកែដ៏ធំម្នាក់ដែលមានឈ្មោះ លី ដែលជាថៅកែល្បីខាងប្រមូលទិញឈើគ្រញូងខុសច្បាប់ប្រចាំច្រកអានសេះ គឺជាមេខ្លោងយ៉ាងធំក្នុងការបំផុសឲ្យប្រជាជនឡើងភ្នំកាប់លក់មកឲ្យខ្លួន។
ទាក់ទងនឹងបញ្ហានេះ វរជនខ្មែរ មិនអាចសុំការស្រាយបំភ្លឺពីលោក ម៉ក់ បញ្ញា នាយផ្នែករដ្ឋបាលព្រៃឈើជាំក្សាន្តបានទេ ដោយទូរស័ព្ទចូលពីរដងពុំមានអ្នកលើក។ ទាក់ទងបញ្ហានេះពុំមានសមត្ថកិច្ចមួយធ្វើការបកស្រាយ ឬទទួលខុសត្រូវឡើយដោយឆ្លើយដាក់គ្នាទៅវិញទៅមក។ ជាធម្មតារាជរដ្ឋាភិបាលបានចេញបទបញ្ជាឲ្យអាជ្ញាធរគ្រប់ជាន់ថ្នាក់យកចិត្តទុកដាក់ ទប់ស្កាត់កុំឲ្យប្រជាពលរដ្ឋខ្មែរ ឆ្លងដែនដោយប្រថុយប្រថាន ប៉ុន្តែឈ្មួញមួយចំនួននៅតែជំរុញឲ្យប្រជាពលរដ្ឋ ប្រថុយ ឆ្លងដែនដោយខុសច្បាប់ដដែល៕
No comments:
Post a Comment
yes