ភ្នំពេញ ៖ មានសំនួរជាច្រើនសុំឲ្យលោកប្រធានផ្សារដើមគ នៅក្នុងខណ្ឌទួលគោកជួយឆ្លើយបំភ្លឺអំពីការចាត់តាំងមន្ត្រីក្រោមឱវាទដើរប្រមូលលុយប្រចាំខែ ប្រចាំថ្ងៃ ពីអាជីវករក្រីក្រលក់ដូរនៅលើផ្លូវសាធារណះយ៉ាងអនាធិបតេយ្យជុំវិញផ្សារ។ មិនតែប៉ុណ្ណោះផ្លូវទាំងអស់នេះថែមទាំងមិនអាចធ្វើចរាចរបាននោះទេគឺបិទទាំងស្រុងតែម្ដង។ ការប្រមូលប្រាក់ក្នុង១ខែៗពីអាជីវករទាំងអស់នេះត្រូវបានគេបង្ហើបអោយដឹងថាជាង១០លានរៀលក្នុងមួយខែ គេពុំដឹងថាលោកប្រធានផ្សារយកទៅបង់ចូលរដ្ឋឬចូលហោប៉ៅផ្ទាល់ខ្លួននោះទេ ប៉ុន្តែបើតាមដឹងប្រហែលជាចូលហោប៉ៅរបស់គាត់ច្រើនជាងពីព្រោះការប្រមូលលុយពីអាជីវករ គេមិនបានប្រើក្រដាសស្នាមដូចអ្នកយកភាស៊ីដើម្បីបង់ចូលទៅរដ្ឋនោះទេ ពោលគឺគេដើរយកលុយពីអាជីវករឆៅៗក្រោមស្លាក យកលុយទៅចិញ្ចឹមសន្តិសុខ។
ជារៀងរាល់ថ្ងៃផ្លូវចំនួន២ខ្សែមានផ្លូវ៣៣៦ស្ថិតនៅខាងជើងផ្សារដើមគរនិងផ្លូវ២៣៥ ស្ថិតនៅខាងកើតផ្សារនិងផ្លូវ៣៤៦ស្ថិតនៅខាងត្បូងផ្សារ ដែលបច្ចុប្បន្នផ្លូវទាំង៣នេះត្រូវបានគេយកទៅពុះចែកគ្នាធ្វើអាជីវកម្មអស់ទៅហើយ បើគិតរយះពេលជិត២០ឆ្នាំមកហើយ។ ចំពោះអាជ្ញាធរដែនដីនៅទីនេះពុំមែនមិនដឹងមិនឮថាគេយកផ្លូវទាំងអស់នេះធ្វើអាជីវកម្មនោះដែរ តែសំខាន់អាជ្ញាធរដែនដីនេះ មិនមានចំណាត់ការ ចេះតែបណ្ដោយទៅៗ ព្រោះបានទទួលផលប្រយោជន៏នោះដែរ។ តែបើមិនបានផលប្រយោជន៏ស្មានតែប្រជាពលរដ្ឋអាចយកផ្លូវទាំងនេះទៅពុះចែកគ្នាធ្វើអាជីវកម្មបានមកដល់ពេលនេះ?
ប្រភពដែលបានធ្លាយចេញពីមន្ត្រីផ្សារដើមគរ គួរអោយជឿបាននោះ គឺប្រាក់ចំណូលដែលគណះកម្មការប្រមូលបានពីអាជីវករលក់ដូរនៅលើផ្លូវសាធារណះខាងលើនេះ ក្នុងមួយខែ បានជាង១០លានរៀល ក្រោមស្លាកយកលុយនេះទៅចិញ្ចឹមសន្តិសុខផ្សារ។ ប៉ុន្តែធាតុពិតសន្តិសុខផ្សារនេះមានគ្នាមិនច្រើននោះទេ ដោយម្នាក់បានប្រាក់ខែតិចបំផុត បើយកទៅទិញបាយស្រូបរាល់ព្រឹកវិញមិន គ្រាន់ទេក្នុងមួយខែៗ។ តើការប្រមូលប្រាក់ពីអាជីវករជ្រកក្រោមស្លាកយកទៅផ្គត់ផ្គង់សន្តិសុខ ហើយបែរជាបង្កើតភាពអនាធិបតេយ្យ គ្មានសណ្ដាប់ធ្នាប់ និងយកផ្លូវសារធារណះធ្វើអាជីវកម្មបែបនេះ កំពុងផ្ទុយពីការរៀបចំសណ្តាប់ធ្នាប់របស់សាលារាជធានីភ្នំពេញទៅហើយ។
ចំពោះការយកលុយទៅបើកបៀវត្សរ៍អោយសន្តិសុខនោះថែមទៀត ធ្វើអោយប្រជាពលរដ្ឋ កាន់តែមានចម្ងល់ថា សាលាខណ្ឌទួលគោកឬសាលារាជធានីភ្នំពេញមិនមានលុយបើកអោយសន្តិ សុខ បែរជាត្រូវយកលុយពីអាជីវករលក់ដូរក្រីក្រ ឬក៏អាជ្ញាធរាជធានីបណ្ដែតបណ្ដោយឲ្យប្រធានផ្សារដើមគធ្វើរបៀបនេះដើម្បីដោះស្រាយប្រាក់បៀវត្សរ៍សន្តិសុខ? តែប្រជាពលរដ្ឋមិនជឿថា សាលារាជធានីភ្នំពេញ មិនអាចធ្វើបែបនេះបានទេ។ ព្រោះឯកឧត្តម កែប ជុតិមា កំពុងព្យាយាមខ្លាំងបំផុតក្នុងការ រៀបចំសណ្តាប់ធ្នាប់ និងសោភណ្ឌភាពក្នុងរាជធានីឲ្យកាន់តែស្រស់បំព្រងគួរឲ្យកោតសរសើរ៕
No comments:
Post a Comment
yes