ព្រៃស្អាក ដែលស្ថិតនៅឃុំអន្លង់វែង គឺជាតំបន់ឧទ្យានជាតិជម្រកសត្វព្រៃដ៏ធំមួយ ដែលតភ្ជាប់ពីតំបន់ឧទ្យានជាតិគូលែនព្រហ្មទេព ខេត្តព្រះវិហារ ទៅដល់តំបន់ព្រៃសហគមន៍សង្ឃរុក្ខវ័ន្ត នៃទឹកដីក្រុងសំរោង ខេត្តឧត្តរមានជ័យ កំពុងបាត់បង់ព្រៃឈើជាច្រើន គួរឲ្យព្រួយបារម្ភ ដោយសារតែមានការលួចចូលទៅកាប់ដើមឈើធំៗ ដើម្បីធ្វើជំនួញខុសច្បាប់។
សហគមន៍សង្គ្រោះព្រៃឈើភូមិអូរតាម៉េង របស់ឃុំអន្លង់វែង បានឱ្យដឹងថា ពួកគេនឹងមិនអាចការពារព្រៃឈើជាច្រើនពាន់ហិកតារ នៅតំបន់ព្រៃស្អាក ចម្ងាយប្រមាណ៣០គីឡូម៉ែត្រភាគខាងកើតពីទីរួមស្រុកអន្លង់វែង បានទៀតឡើយ ប្រសិនបើមន្ត្រីរដ្ឋាភិបាលដែលពាក់ព័ន្ធ មិនបានចាត់វិធានការជួយជ្រោមជ្រែងពួកគេឱ្យមានប្រសិទ្ធភាពលើកិច្ចការពារទេនោះ។
លោក ឡេវ សែត ជាប្រធានសហគមន៍សង្គ្រោះព្រៃឈើ ភូមិអូរតាម៉េង នៃឃុំអន្លង់វែង លោកបានមានប្រសាសន៍កាលពីរសៀលថ្ងៃចន្ទ ទី៣ ខែកញ្ញា ថា ពេលបច្ចុប្បន្ននេះ ព្រៃសហគមន៍របស់លោកនៅក្នុងតំបន់ព្រៃស្អាក កំពុងទទួលរងការលួចកាប់ ហើយក្រុមឈ្មួញបានដឹកជញ្ជូនយកចេញទៅធ្វើអាជីវកម្មខុសច្បាប់ស្ទើរតែរៀងរាល់ថ្ងៃ។ ប្រធានសហគមន៍ការពារព្រៃឈើដដែល បានបញ្ជាក់ថា មានក្រុមហ៊ុនខ្លះ និងឧកញ៉ាខ្លះ គឺជាអ្នកចាំទទួលទិញឈើដែលគេលួចកាប់ចេញពីតំបន់ព្រៃស្អាក នោះ។
លោក ឡេវ សែត៖ «អារដឹកចេញទៅខាងក្រុមហ៊ុនសំរោងរ៉ាប់ប័រ ហើយខ្លះមួយចំនួននោះ ដឹកចេញមកក្នុងវត្ត ឱ្យឧកញ៉ាឯណានោះ។ ប្រភេទឈើដើមគគីរ ដើមឈើទាល ដើមត្រាច ដើមពពេល។ ឥឡូវនេះ វាអស់អា១២០-១៣០ ហើយមុខ២០ មុខ៣០ ក៏អារដែរ។ ខ្ញុំព្រួយណាស់ តែមិនដឹងថាគិតយ៉ាងម៉េច បើកម្លាំងសមាជិកសហគមន៍ចេះតែទៅការពារ ទៅហាមឃាត់ដេញគេ។ ពេលដេញគេចេញ ដល់ពេលយប់គេចូលទៅធ្វើទៀត»។
ទោះយ៉ាងណា លោក ហួ គន្ធា ជានាយសង្កាត់រដ្ឋបាលព្រៃឈើស្រុកអន្លង់វែង បានបដិសេធមិនធ្វើការអធិប្បាយលើបញ្ហានេះថាយ៉ាងណាឡើយ ដោយលោកមានប្រសាសន៍ថា លោកមិនអាចនិយាយឆ្លើយឆ្លងគ្នាតាមរយៈទូរស័ព្ទបានទេ ប្រសិនបើចង់ដឹងរឿងផ្សេងៗ ទាល់តែទៅជួបផ្ទាល់នៅកន្លែងរបស់លោក។
សមាជិកសហគមន៍សង្គ្រោះព្រៃឈើ ភូមិអូរតាម៉េង ខ្លះ បានរិះគន់ទៅលើមន្ត្រីរដ្ឋបាលព្រៃឈើប្រចាំតំបន់នោះថា មានកិច្ចសហការតិចតួច នៅពេលដែលពួកគេត្រូវការជំនួយពីរដ្ឋបាលព្រៃឈើ ដើម្បីបង្ក្រាបការកាប់ឈើខុសច្បាប់ ដែលកំពុងតែកើតឡើងនោះ។
សមាជិកសហគមន៍សង្គ្រោះព្រៃឈើ ភូមិអូរតាម៉េង ម្នាក់ ដែលសុំមិនបញ្ចេញឈ្មោះ បានមានប្រសាសន៍ថា អ្នកកាប់ឈើខុសច្បាប់នៅព្រៃស្អាក ខ្លះ ជាប្រជាពលរដ្ឋចំណាកស្រុក និងខ្លះពាក់ព័ន្ធនឹងកម្លាំងប្រដាប់អាវុធ ក៏ប៉ុន្តែ គេឃើញមន្ត្រីរដ្ឋបាលព្រៃឈើមានការចុះបង្ក្រាបតិចតួច៖ «ពេញតែព្រៃហ្នឹងឯង ត្រង់ណាក៏កាប់ដែរ។ ខ្ញុំដើរទៅមើលថ្ងៃមុន ឃើញកាប់ទាំងអស់ ឃើញម៉ាស៊ីនង៉ោងកាត់ឡើងពេញទាំងហ្នឹង។ ដូចអត់ឃើញមានសមត្ថកិច្ចចុះទៅស៊ើបទៅសួរទៅចាប់ទៅចងអីទេ។ ខាងពួកខ្ញុំ មិនដឹងជួយបង្ក្រាបយ៉ាងម៉េចបាន ព្រោះអីយើងបង្ក្រាបទៅមានទាហានអីគេទៅសម្លុត គំរាម ពួកខ្ញុំក៏ខ្លាចគេ ព្រោះគេមានអាវុធ»។
សហគមន៍សង្គ្រោះព្រៃឈើ ភូមិអូរតាម៉េង បានឱ្យដឹងថា គេបានចុះកិច្ចព្រមព្រៀងជាមួយរដ្ឋាភិបាល ដោយទទួលការពារព្រៃស្អាក ទំហំជាង៤.១៥០ហិកតារ ក៏ប៉ុន្តែ បច្ចុប្បន្ននេះ គេប៉ាន់ប្រមាណថា ព្រៃឈើនៅក្នុងសហគមន៍របស់គេប្រមាណ១០០ហិកតារ បានបាត់បង់ ដោយសារតែក្រុមជនខិលខូចតែងតែលួចចូលកាប់យកទៅធ្វើអាជីវកម្មខុសច្បាប់៕
No comments:
Post a Comment
yes