ប្រជាពលរដ្ឋរស់នៅខេត្តមណ្ឌលគិរី ចោទប្រកាន់ក្រុមហ៊ុនសម្បទានសេដ្ឋកិច្ចមួយថា បានឈូសឆាយរំលោភយកដីពួកគាត់។ ពួកគាត់អះអាងទៀតថា ក្រុមអាជ្ញាធរមូលដ្ឋានមិនបានយកចិត្តទុកដាក់ជួយដោះស្រាយពាក្យប្ដឹងតវ៉ារបស់ប្រជាពលរដ្ឋបានត្រឹមត្រូវឡើយ។
ប្រជាពលរដ្ឋបីគ្រួសាររស់នៅភូមិពូជ្រីចាង ក្នុងឃុំពូជ្រី ស្រុកពេជ្រាដា ខេត្តមណ្ឌលគិរី នៅថ្ងៃអាទិត្យ ទី២ ខែកញ្ញា អំពាវនាវទៅប្រមុខរាជរដ្ឋាភិបាល លោកនាយករដ្ឋមន្ត្រី ហ៊ុន សែន ឲ្យជួយរកយុត្តិធម៌ដល់ពួកគាត់ដែលកំពុងបាត់បង់ដីស្រែចំការដោយសារក្រុមហ៊ុនសម្បទានសេដ្ឋកិច្ចឈ្មោះ ធី.ប៉ី.ស៊ី. (TBC) រំលោភយក។
ប្រជាពលរដ្ឋឈ្មោះ ពៅ តុលា មានប្រសាសន៍បញ្ជាក់ថា កាលពីឆ្នាំ២០១០ ក្រុមហ៊ុន ធី.ប៉ី.ស៊ី. បានឈូសឆាយពង្រីកផ្ទៃដីក្រុមហ៊ុនសម្បទានចូលមកលើដីស្រែចំការប្រជាពលរដ្ឋប្រមាណ ៥០គ្រួសារ ជាពិសេសក្រុមគ្រួសារជនជាតិដើមភាគតិចនៅក្នុងភូមិ ដោយសំអាងថា លោកនាយករដ្ឋមន្ត្រីបានប្រគល់ដីនោះទៅឲ្យក្រុមហ៊ុន។
លោកបន្តថា ប្រជាពលរដ្ឋបានប្ដឹងតវ៉ាពីករណីនេះទៅអាជ្ញាធរភូមិ ឃុំ ស្រុក ខេត្ត រួចហើយ ក៏ប៉ុន្តែដំណោះស្រាយរបស់មន្ត្រីមូលដ្ឋានទាំងអស់មិនបានផ្ដល់យុត្តិធម៌ជូនប្រជាពលរដ្ឋនោះទេ។ លោកបន្តថា ប្រជាពលរដ្ឋមួយចំនួនធំបានទទួលយកប្រាក់តិចតួច ខ្លះទៀតសុខចិត្តទទួលយកលក្ខខណ្ឌរបស់ក្រុមហ៊ុន គឺក្រុមហ៊ុនអនុញ្ញាតឲ្យប្រជាពលរដ្ឋបន្តដាំដុះលើដីរបស់ខ្លួនរយៈពេលបីឆ្នាំតាមការសម្របសម្រួលពីអាជ្ញាធរមូលដ្ឋាន ដោយសារមន្ត្រីមូលដ្ឋានទាំងនោះអះអាងថា ដីទាំងអស់នោះជាសម្បត្តិរដ្ឋ ហើយរដ្ឋមានសិទ្ធិដកហូតដីប្រគល់ទៅឲ្យក្រុមហ៊ុនដោយគ្មានការតវ៉ា។
លោក ពៅ តុលា៖ «មកភ្ជួរដីខ្ញុំ សួរវាឆ្លើយថា ដីហ្នឹងសម្ដេចនាយកដកយកមកឲ្យវា (ក្រុមហ៊ុន) ហើយ អ៊ីចឹងបានជាខ្ញុំចង់ផ្សាយហ្នឹង ចង់សំណូមពរថា ដីខ្ញុំហ្នឹងសម្ដេចនាយកដកយកមែន ឬអត់? ប៉ុន្តែដីខ្ញុំហ្នឹងខ្ញុំមានប្លង់ភូមិ ឃុំ គេដឹងឮ ហើយប្រធានភូមិគេទទួលស្គាល់»។
ដូចគ្នានេះដែរ ប្រជាពលរដ្ឋឈ្មោះ ទេព ខន មានប្រសាសន៍បញ្ជាក់ថា ពួកគាត់ទាំងបីគ្រួសារមិនយល់ព្រមទទួលយកលក្ខខណ្ឌនេះទេ ហើយបន្តការទាមទាររហូតបច្ចុប្បន្ន ក៏ប៉ុន្តែមិនមានស្ថាប័នណាជួយផ្តល់យុត្តិធម៌ដល់ពួកគាត់ឡើយ។
លោកបន្តថា បច្ចុប្បន្ននេះក្រុមនិស្សិតចុះវាស់វែងដីជូនប្រជាពលរដ្ឋតាមគោលនយោបាយរបស់រាជរដ្ឋាភិបាល ក៏ប៉ុន្តែដីរបស់ប្រជាពលរដ្ឋក្នុងភូមិត្រូវក្រុមហ៊ុនរំលោភយកដាំកៅស៊ូអស់គ្មានសល់៖ «ទៅប្រជុំនៅសាលាខេត្ត គេថា មិនបាច់តវ៉ាទេ គេឲ្យដីធ្វើបីឆ្នាំ។ ខ្ញុំថា ខ្ញុំមិនអាចទទួលបានទេ បើធ្វើបីឆ្នាំរួចផុតបីឆ្នាំទៅខ្ញុំបានដីឯណាធ្វើបន្តទៀត?»។
ឆ្លើយតបសេចក្ដីចោទប្រកាន់នេះ ប្រធានរដ្ឋបាលនៃក្រុមហ៊ុន ធី.ប៉ី.ស៊ី. លោក តាំ ប៊ុនធឿន មានប្រសាសន៍បញ្ជាក់ថា ក្រុមហ៊ុនលោកបានដោះស្រាយផលប៉ះពាល់ជាមួយប្រជាពលរដ្ឋនៅតំបន់នោះរួចហើយ ដូច្នេះលោកមិនដឹងថា តើប្រជាពលរដ្ឋបីគ្រួសារនោះមានហេតុផលអ្វីចោទប្រកាន់ក្រុមហ៊ុនដូច្នេះឡើយ។
លោក តាំ ប៊ុនធឿន៖ «គេប្រកាសឲ្យមកដោះស្រាយ អ្នកដែលបានមកគេដោះស្រាយឲ្យ អ្នកដែលអត់ហ្នឹង គេមិនដោះស្រាយឲ្យទេ។ គាត់មិនមែនអ្នកនៅហ្នឹងទេ ភាគច្រើននៅឆ្ងាយៗណាស់ ចេះតែទិញចេះអីទៅ ចូលបីឆ្នាំហើយ»។
ក្រុមហ៊ុន ធី.ប៉ី.ស៊ី. បានស្នើសុំដីសម្បទានសេដ្ឋកិច្ចនៅស្រុកពេជ្រាដា ប្រមាណ ១ម៉ឺនហិកតារ ប៉ុន្តែមន្ត្រីរដ្ឋបាលក្រុមហ៊ុនឲ្យដឹងថា ក្រុមហ៊ុនទទួលបានដីដែលកាត់ផលប៉ះពាល់រួចរាល់នៅសល់តែ ៥.៧០៤ហិកតារប៉ុណ្ណោះ។
មេឃុំពូជ្រី លោក កើញ រដ្ឋា មានប្រសាសន៍បញ្ជាក់ថា ដីដែលកើតមានទំនាស់ជាមួយក្រុមហ៊ុន គឺជាដីព្រៃរបស់រដ្ឋ ហេតុនេះអាជ្ញាធរបានសម្របសម្រួលរវាងប្រជាពលរដ្ឋ និងក្រុមហ៊ុនរួចហើយ តាំងពីឆ្នាំ២០១១។ លោកបន្តថា មិនបានដឹងពីករណីប្រជាពលរដ្ឋបីគ្រួសារនោះទេ ក៏ប៉ុន្តែលោកអះអាងថា ប្រសិនប្រជាពលរដ្ឋនៅមានបញ្ហាសុំឲ្យរាយការណ៍មកអាជ្ញាធរឃុំដើម្បីពិភាក្សារកដំណោះស្រាយបន្តទៀត៖ «ខ្ញុំមិនថា មិនទទួលខុសត្រូវទេ ប៉ុន្តែរឿងហ្នឹងត្រូវបង្ហាញការពិតសិន អ៊ីចឹងរឿងហ្នឹងមិនមែនខ្ញុំម្នាក់អាចទៅបានទេ បើសិនគាត់មានចេញរូបភាពអ៊ីចឹង គឺខ្ញុំមានយោបល់មានស្រុកខេត្ត»។
យ៉ាងនេះក្តី ប្រជាពលរដ្ឋបីគ្រួសារអះអាងថា ពួកគាត់រង់ចាំជាង ២ឆ្នាំកន្លងទៅនេះ ដើម្បីឲ្យអាជ្ញាធរដោះស្រាយ ក៏ប៉ុន្តែរហូតបច្ចុប្បន្ន ដីរបស់ពួកគាត់ប្រមាណ ២០ហិកតារ ត្រូវក្រុមហ៊ុនយកដាំកៅស៊ូអស់៕
No comments:
Post a Comment
yes