រាជធានីភ្នំពេញ ៖ ជនបង្កគ្រោះថ្នាក់ចរាចរណ៍ ជេរប្រមាថ និងវាយតប់បង្ករបួសស្នាមទៅលើមន្ត្រីប៉ូញលិស៥នាក់ កំពុងជាប់ទ្រុងដែកនៅការិយាល័យព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ និងត្រៀមបញ្ជូនទៅសាលាដំបូងជម្រះក្តី បន្ទាប់ពីអ្នកលេងអ៊ុងអាត់ទាំង៣នេះ បើករថយន្តបុកបង្គោលភ្លើង ហើយរត់ និងជេរប្រមាថវាយតប់បង្កស្នាមរបួសមកលើ មន្ត្រីប៉ូលិសពេលបំពេញការងារ កាលពីវេលាម៉ោង១០ និង៣០នាទីយប់ថ្ងៃទី២៤ កញ្ញា ២០១២ ។
ជនទាំង៣នាក់ កោងកាចធ្វើមើលស្រុកខ្មែរមានតែឯងនេះ រួមមាន ១-ឈ្មោះលី ឆៃហាក់ ភេទប្រុស អាយុ៣២ឆ្នាំ ស្នាក់នៅផ្ទះលេខ៣៧A ផ្លូវលេខ១៦៣ សង្កាត់ផ្សារដេប៉ូទី៣២ ខណ្ឌទួលគោក ត្រូវបានអ្នកស្គាល់អះអាងថា ជាកូនអ្នកមានខ្លាំង ខ្លះថាកូនថៅកែលក់ពេជ្រ ។ ២-ឈ្មោះទា សុខឃឿន ភេទប្រុស អាយុ២២ឆ្នាំ ស្នាក់នៅផ្ទះគ្មានលេខ ផ្លូវលំ សង្កាត់បឹងទំពុន ខណ្ឌមានជ័យ ។ ៣-ឈ្មោះកេង ផារ៉ែន ហៅប៉ូច ភេទប្រុស អាយុ២៩ឆ្នាំ ស្នាក់នៅផ្ទះលេខ២៩០ ផ្លូវលេខ៦៩BT ភូមិក្បាលទំនប់ សង្កាត់បឹងទំពុន ខណ្ឌមានជ័យ ។
ចំណែកអ្នករងរបួសដែលឈ្មោះលី ឆៃហាក់ វាយតប់ទៅលើរួមមាន ១-ឈ្មោះដួង វិជិន ភេទប្រុស អាយុ៤៤ឆ្នាំ , ២-ឈ្មោះឃិន គិរីវណ្ណ ភេទប្រុស អាយុ៣០ឆ្នាំ , ៣-ឈ្មោះសាន សីហា ភេទប្រុស អាយុ២៦ឆ្នាំ, ៤-ឈ្មោះសេង វណ្ណៈ ភេទប្រុស អាយុ៥២ឆ្នាំ, និង៥-ឈ្មោះឡេង រតនា ភេទប្រុស អាយុ៣២ឆ្នាំ ។ អ្នកទាំង៥នេះ សុទ្ធតែជាមន្ត្រីប៉ូលិសទាំងអស់ ខ្លះហើមមុខ ហើយមាត់ ខ្លះបែកក្បាល ខ្លះត្រូវគេប្រមាថយ៉ាងចាស់មាត់ ។
សូមបញ្ជាក់ថា អំពើងហិង្សា ដែលបង្កឡើងដោយជនកោងកាចខាងលើ បានកើតឡើងនៅចំណុចមុខយានដ្ឋានជួសជុលរថយន្តមួយកន្លែងស្ថិតនៅ ភូមិ១ ផ្លូវលេខ៥១២ សង្កាត់ផ្សារដើមថ្កូវ ខណ្ឌចំការមន វេលាម៉ោង១០និង៣០នាទីយប់ថ្ងៃទី២៤ កញ្ញា បណ្តាលមកពីបុរសម្នាក់ឈ្មោះលី ឆៃហាក់ ដែលជាកូនអ្នកមានខ្លាំង បើករថយន្តម៉ាកនីស្សាន់ ណាវ៉ារ៉ា ពណ៌ឈាមជ្រូក បុកបង្គោលភ្លើងនៅតាមបណ្តោយផ្លូវលេខ៣៧១ ទល់មុខផ្ទះសំណាក់សុខសាន្ត សង្កាត់ស្ទឹងមានជ័យ ខណ្ឌមានជ័យ ហើយបើករថយន្តរត់គេចមកដល់ចំណុចយានដ្ឋានជួសជុលរថយន្ត ត្រូវសមត្ថកិច្ចតាមទាន់ ក៏កើតការប្រទូស្តរ៉ាយគ្នាឡើងបង្កឱ្យមានការភ្ញាក់ផ្អើលដល់សមត្ថកិច្ចនគរបាលខណ្ឌចំការមន និងកម្លាំងកងរាជអាវុធហត្ថខណ្ឌចំការមនរាប់សិបនាក់ចុះអន្តរាគមន៍ឃាត់ខ្លួនបុរសអ្នកបើកបរ ។
តាមប្រភពព័ត៌មានទាក់ទិននឹងការវាយតប់ប៉ូលិសនេះបានឱ្យដឹងថា រថយន្តម៉ាកនីស្សាន់ណាវ៉ារ៉ា បានបើកបរធ្វើដំណើរចេញពីផឹកស៊ីនៅផ្ទះមិត្តភក្តិ ឆ្ពោះទៅកន្លែងណាមួយ ។ ប៉ុន្តែនៅវេលាយប់នោះសមត្ថកិច្ចនគរបាលព្រហ្មទណ្ឌរាជធានីភ្នំពេញ និងសមត្ថកិច្ចនគរបាលប៉ុស្តិ៍ផ្សារដើមថ្កូវ បានប្រទះឃើញរថយន្តដែលមានភិនភាគដូចខាងលើបើកបរតាមបណ្តោយផ្លូវលេខ២៧១ ទាំងបែកកង់មុខខាងស្តាំ និងមានធ្លាក់កាងរថយន្តអូសថ្នល់ជាហេតុធ្វើឱ្យក្រុមសមត្ថកិច្ចមានការសង្ស័យថា រថយន្តមួយគ្រឿងនេះទំនងជាទើបនឹងបុកគ្នាហើយបើករត់គេចពីការទទួលខុសត្រូវ ។ ផ្តើមចេញពីការសង្ស័យបែបនេះក្រុមសមត្ថកិច្ចក៏នាំគ្នាជិះម៉ូតូដេញរថយន្តណាវ៉ារ៉ាខាងលើយ៉ាងប្រកិត តាំងពីមុខមន្ទីរពេទ្យមិត្តភាពខ្មែរ-សូវៀតរហូតដល់យានដ្ឋានជួសជុលរថយន្តខាងលើ ទើបម្ចាស់រថយន្ត ណាវ៉ារ៉ាឈប់ចត ហើយចុះពីលើរថយន្តគេចខ្លួនបាត់។
ក្នុងហេតុការណ៍ខាងលើនេះក្រុមសមត្ថកិច្ចមូលដ្ឋានបានព្យាយាមទំនាក់ទំនងរកម្ចាស់រថយន្តណាវ៉ារ៉ា ដើម្បីសួរនាំអំពីហេតុផលដោយសមត្ថកិច្ចបានឃើញរថយន្តនេះមានស្លាក់ស្នាមបុកគ្នា ។ ពេលនោះម្ចាស់យានដ្ឋានរថយន្តបានទំនាក់ទំនងទៅម្ចាស់រថយន្តឱ្យត្រឡប់មកយានដ្ឋានវិញ ព្រោះមានសមត្ថកិច្ចមកច្រើនណាស់ ។ នៅពេលដែលម្ចាស់រថយន្តណាវ៉ារ៉ា ត្រឡប់មកដល់ ស្រាប់តែបានទាស់គ្នាបែកផ្សែងជាមួយសមត្ថកិច្ចមូលដ្ឋាន បង្កឱ្យមានការប្រទូស្តរ៉ាយគ្នាមួយប្រាវធំ ។ ក្នុងហេតុការណ៍នោះក្រុមសមត្ថកិច្ចមូលដ្ឋានបានបង្កើនកម្លាំងចម្រុះនិងឃាត់ខ្លួនអ្នកបើកបររថយន្តណាវ៉ារ៉ាឈ្មោះ លី ឆៃហាក់ បញ្ចូនទៅប៉ុស្តិ៍ ហើយនៅវេលាម៉ោង៣ទៀបភ្លឺឈានចូលថ្ងៃទី២៥ កញ្ញា ទើបបញ្ជូនទៅកាន់ការិយាល័យនគរបាលចរាចរជើងគោករាជធានីភ្នំពេញ និងបន្តិចក្រោយមកបញ្ជូនទៅការិយាល័យព្រហ្មទណ្ឌ ដើម្បីចាត់ការបន្ត ។
សូមបញ្ជាក់ថា ក្នុងហេតុការណ៍ប្រទូស្តរ៉ាយគ្នាខាងលើនេះក្រុមសមត្ថកិច្ចមូលដ្ឋានបានប្រាប់ថា នឹងចាត់វិធានការប្តឹងលើបុគ្គលអ្នកបើកបររថយន្តណាវ៉ារ៉ា ពីបទបង្ករបួសស្នាមនិងជេរប្រមាថកម្លាំងសមត្ថកិច្ច ។ ក្រុមសមត្ថកិច្ចបានបញ្ជាក់ថា ទង្វើរបស់អ្នកបើកបររថយន្តណាវ៉ារ៉ានោះ មានចរិតច្រងេងច្រងាងខ្លាំងណាស់ ដូច្នេះសូមឱ្យសមត្ថកិច្ចថ្នាក់លើជួយមានវិធានការចាត់ការលើអ្នកបើកបររថយន្តខាងលើទៅតាមនីតិវិធី ។ មូលហេតុដែលក្រុមមន្ត្រីសមត្ថកិច្ចលើកឡើងដូច្នេះដោយសារនៅយប់កើតហេតុនោះគេបានឃើញមានក្រុមគ្រួសាររបស់ម្ចាស់រថយន្តណាវ៉ារ៉ានោះជិះសុទ្ធតែរថយន្តស៊េរីទំនើបៗ មកអន្តរាគមន៍សម្បើមណាស់ ។
អ្នកបើកបររថយន្តណាវ៉ារ៉ាបានស្រែកឡូឡាជេរប្រមាថសមត្ថកិច្ច ហើយគំរាមសមត្ថកិច្ចថា «ពួកឯងអត់រួចខ្លួនទេ»និងថែមទាំងព្រមានទៀតថា នឹងប្តឹងពួកប៉ូលិសដែលចាប់រូបគេដាក់ខ្នោះ ព្រោះគេមិនមានជាចោរប្លន់ទេហេតុអី្វទើបសមត្ថកិច្ចចាប់គេដាក់ខ្នោះបែបនេះទៅវិញ ... មិនមែនជាចោរប្លន់មែន ... ប៉ុន្តែស្រែកឡូឡា, ជេរប្រមាថប៉ូលិស វាយតប់ប៉ូលិសឱ្យរងរបួស, រារាំងដំណើរការអនុវត្តច្បាប់របស់សមត្ថកិច្ច...សមល្មម... ៕
No comments:
Post a Comment
yes